ರಾಷ್ಟ್ರೀಯ ಡಿಜಿಟಲ್ ಟೂರಿಸಂ ಸ್ಟ್ಯಾಕ್‌ಗೆ ಚಾಲನೆ

ವಿಶ್ವ ಪ್ರವಾಸೋದ್ಯಮ ದಿನ 2026ರ ಅಂಗವಾಗಿ ಭಾರತವು National Digital Tourism Stack ಅನ್ನು ಪರಿಚಯಿಸಿದ್ದು, ಪ್ರವಾಸ ಯೋಜನೆ ಮತ್ತು ಪ್ರವಾಸೋದ್ಯಮ ಸೇವೆಗಳನ್ನು ಹೆಚ್ಚು ಸುಲಭ ಹಾಗೂ ಸಂಪರ್ಕಿತಗೊಳಿಸುವ ಉದ್ದೇಶ ಹೊಂದಿದೆ. ಪ್ರವಾಸೋದ್ಯಮ ಸಚಿವಾಲಯವು Open Network for Digital Commerce (ONDC) ಮತ್ತು International Centre for DPI Innovation and Advancement (ICDIA) ಸಹಯೋಗದಲ್ಲಿ ಈ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುತ್ತಿದೆ.

ಹೊಸ ಡಿಜಿಟಲ್ ವ್ಯವಸ್ಥೆಯ ಮೂಲಕ ಹೊಟೇಲ್‌, ಹೋಮ್‌ಸ್ಟೇ, ಸ್ಥಳೀಯ ಪ್ರವಾಸ ಅನುಭವಗಳು, ಸಾರಿಗೆ, ಸಾಂಸ್ಕೃತಿಕ ತಾಣಗಳು, ಕಾರ್ಯಕ್ರಮಗಳು ಹಾಗೂ ಇತರ ಪ್ರವಾಸೋದ್ಯಮ ಸೇವೆಗಳನ್ನು ಒಂದೇ ಸಂಪರ್ಕಿತ ಡಿಜಿಟಲ್ ಜಾಲದಲ್ಲಿ ಪತ್ತೆಹಚ್ಚಲು ಪ್ರವಾಸಿಗರಿಗೆ ಸಾಧ್ಯವಾಗಲಿದೆ. ಪರಿಶೀಲಿತ ಸೇವಾದಾರರು, ಡಿಜಿಟಲ್ ಪಾವತಿ, ರೇಟಿಂಗ್‌ಗಳು ಮತ್ತು ದೂರು ಪರಿಹಾರ ವ್ಯವಸ್ಥೆಯೂ ಇದರಲ್ಲಿ ಇರಲಿದೆ.

2028ರ ಅಂತ್ಯದ ವೇಳೆಗೆ ಸುಮಾರು 23,000 ಪ್ರವಾಸೋದ್ಯಮ ಸೇವೆಗಳನ್ನು ಈ ಜಾಲಕ್ಕೆ ಸೇರ್ಪಡೆಗೊಳಿಸುವ ಗುರಿಯನ್ನು ಸರಕಾರ ಹೊಂದಿದೆ. ಇದರಲ್ಲಿ 14,000 ಪ್ರವಾಸ ಅನುಭವಗಳು ಮತ್ತು 9,000 ಹೋಮ್‌ಸ್ಟೇಗಳು ಸೇರಿವೆ. 2027ರ ಜನವರಿಯಲ್ಲಿ ಪ್ರಾಯೋಗಿಕ ಹಂತ ಆರಂಭವಾಗಲಿದ್ದು, ನಂತರ ಹಂತ ಹಂತವಾಗಿ ವಿಸ್ತರಣೆ ನಡೆಯಲಿದೆ.

ಕೃತಕ ಬುದ್ಧಿಮತ್ತೆಯ ನೆರವಿನಿಂದ ಪ್ರವಾಸಿಗರ ಆಸಕ್ತಿ, ಭಾಷೆ ಮತ್ತು ಬಜೆಟ್‌ಗೆ ಅನುಗುಣವಾಗಿ ಪ್ರವಾಸ ಸಲಹೆಗಳನ್ನು ನೀಡುವ ಸಾಧ್ಯತೆಯೂ ಇದೆ. ಇದೇ ವೇಳೆ, Dekho Apna Desh 2.0 ಮೂಲಕ ಕಡಿಮೆ ಪರಿಚಿತ ಪ್ರವಾಸಿ ತಾಣಗಳಿಗೆ ಹೆಚ್ಚಿನ ಗಮನ ನೀಡಲು ಸರಕಾರ ಮುಂದಾಗಿದೆ.