ಬುಕಿಂಗ್ ಇದ್ದರೂ ಕೋಣೆ ನಿರಾಕರಿಸಿದ್ದ ಹೊಟೇಲ್‌ಗೆ ರು. 31,000 ದಂಡ

ಮುಂಗಡ ಹಣ ಪಾವತಿಸಿ ಕನ್ಫರ್ಮ್ಡ್ ಬುಕಿಂಗ್ ಪಡೆದಿದ್ದರೂ, ಪ್ರವಾಸಕ್ಕೆ ಬಂದ ಕುಟುಂಬಕ್ಕೆ ಕೋಣೆ ನೀಡಲು ನಿರಾಕರಿಸಿ ಪ್ರವಾಸಿಗರನ್ನು ಪರದಾಡುವಂತೆ ಮಾಡಿದ್ದ ಹಿಮಾಚಲ ಪ್ರದೇಶದ ಮನಾಲಿಯಲ್ಲಿರುವ ಹೊಟೇಲ್ ಒಂದಕ್ಕೆ ಗ್ರಾಹಕ ನ್ಯಾಯಾಲಯವು ಕಟ್ಟುನಿಟ್ಟಿನ ದಂಡ ವಿಧಿಸಿದೆ. ಸೇವಾ ಲೋಪ ಹಾಗೂ ಅನಗತ್ಯ ಕಿರುಕುಳ ನೀಡಿದ್ದಕ್ಕಾಗಿ ಸಂತ್ರಸ್ತ ಕುಟುಂಬಕ್ಕೆ ಒಟ್ಟು ರು. 31,000 ಪರಿಹಾರ ನೀಡುವಂತೆ ಹಿಮಾಚಲ ಪ್ರದೇಶದ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗವು ಆದೇಶಿಸಿದೆ.

ಇದನ್ನೂ ಓದಿ: ಆನ್‌ಲೈನ್ ಬುಕಿಂಗ್ ಸಂಸ್ಥೆಗೆ 10,000 ರು. ದಂಡ ವಿಧಿಸಿದ ಗ್ರಾಹಕ ನ್ಯಾಯಾಲಯ!

ದೂರುದಾರ ಪ್ರವಾಸಿಗರು ತಮ್ಮ ಕುಟುಂಬದೊಂದಿಗೆ ಮನಾಲಿ ಪ್ರವಾಸ ಕೈಗೊಳ್ಳಲು ಮುಂಚಿತವಾಗಿಯೇ ಹೊಟೇಲ್ ಒಂದರಲ್ಲಿ ರೂಮ್ ಬುಕ್ ಮಾಡಿಕೊಂಡು, ನಿಗದಿತ ಅಡ್ವಾನ್ಸ್ ಮೊತ್ತವನ್ನು ಪಾವತಿಸಿದ್ದರು. ಕನ್ಫರ್ಮ್ಡ್ ಬುಕಿಂಗ್ ರಸೀದಿಯೊಂದಿಗೆ ದೂರುದಾರರು ಕುಟುಂಬ ಸಮೇತ ಮನಾಲಿ ತಲುಪಿ ಹೊಟೇಲ್‌ಗೆ ತೆರಳಿದಾಗ, ಆಡಳಿತ ಮಂಡಳಿಯು ಅವರ ಬುಕಿಂಗ್ ಅನ್ನು ಮಾನ್ಯ ಮಾಡಲು ನಿರಾಕರಿಸಿತು ಹಾಗೂ ಕೋಣೆ ಲಭ್ಯವಿಲ್ಲವೆಂದು ಹೇಳಿ ವಾಪಸ್ ಕಳುಹಿಸಿತು.

ಮಳೆ/ಚಳಿಯ ವಾತಾವರಣದಲ್ಲಿ ಅಪರಿಚಿತ ಪ್ರವಾಸಿ ತಾಣದಲ್ಲಿ ಕೊನೆಯ ಕ್ಷಣದಲ್ಲಿ ಬೇರೆ ಹೊಟೇಲ್ ಹುಡುಕಲಾಗದೆ, ಸಂತ್ರಸ್ತ ಕುಟುಂಬವು ತೀವ್ರ ಮಾನಸಿಕ ಯಾತನೆ ಅನುಭವಿಸಬೇಕಾಯಿತು. ಜತೆಗೆ ಕೊನೆ ಕ್ಷಣದಲ್ಲಿ ಭಾರಿ ಹೆಚ್ಚಿನ ದರ ತೆತ್ತು ಪರ್ಯಾಯ ವಸತಿ ವ್ಯವಸ್ಥೆ ಮಾಡಿಕೊಳ್ಳಬೇಕಾಯಿತು. ಹೊಟೇಲ್‌ನ ಈ ಅನುಚಿತ ನಡವಳಿಕೆಯಿಂದ ಕೆರಳಿದ ಪ್ರವಾಸಿಗರು ಗ್ರಾಹಕ ಆಯೋಗದ ಮೆಟ್ಟಿಲೇರಿದ್ದರು.

ವಿಚಾರಣೆ ನಡೆಸಿದ ಜಿಲ್ಲಾ ಗ್ರಾಹಕ ಆಯೋಗವು, ಹೊಟೇಲ್ ಆಡಳಿತ ಮಂಡಳಿಯ ನಡವಳಿಕೆಯನ್ನು ತೀವ್ರವಾಗಿ ಖಂಡಿಸಿತು. ಮುಂಗಡ ಬುಕಿಂಗ್ ಪಡೆದು ಹಣ ಸ್ವೀಕರಿಸಿದ ನಂತರ ಗ್ರಾಹಕರಿಗೆ ಸೇವೆ ನೀಡದಿರುವುದು 'ಸೇವಾ ನ್ಯೂನತೆ' ಮತ್ತು 'ಅನ್ಯಾಯದ ವ್ಯಾಪಾರ ಪದ್ಧತಿ'ಗೆ ಸ್ಪಷ್ಟ ಉದಾಹರಣೆಯಾಗಿದೆ ಎಂದು ನ್ಯಾಯಾಲಯ ಹೇಳಿದೆ.

ದಂಡದ ವಿವರ:

ಮಾನಸಿಕ ಯಾತನೆ ಮತ್ತು ನಷ್ಟಕ್ಕೆ ಪರಿಹಾರ: ರು. 25,000

ಕಾನೂನು ಮತ್ತು ಕೋರ್ಟ್ ವೆಚ್ಚ: ರು. 6,000

ಒಟ್ಟು ಪರಿಹಾರ ಮೊತ್ತ: ರು. 31,000