ದೆಹಲಿ ರಸ್ತೆಗಳಲ್ಲಿ ಡಬಲ್‌ ಡೆಕ್ಕರ್‌ ಬಸ್‌ ಸುತ್ತಾಟ ಮತ್ತೆ ಆರಂಭ

ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನಗರ ಸಂಚಾರಕ್ಕೆ ಡಬಲ್‌ ಡೆಕ್ಕರ್‌ ಎಲೆಕ್ಟ್ರಿಕ್‌ ಬಸ್‌ಗಳು ಸಜ್ಜಾಗಿವೆ. ದೆಹಲಿ ಪ್ರವಾಸೋದ್ಯಮಕ್ಕೆ ಇಂಬು ನೀಡುವ ಈ ಬಸ್‌ಗಳ ಓಡಾಟಕ್ಕೆ ಶುಕ್ರವಾರ ಸಿಎಂ ರೇಖಾ ಗುಪ್ತಾ ಚಾಲನೆ ನೀಡಿದರು.

ಈ ಕುರಿತು ಚಾಲನೆ ನೀಡಿ ನಂತರ ಮಾಧ್ಯಮಗಳೊಂದಿಗೆ ಸಿಎಂ ರೇಖಾ ಗುಪ್ತಾ ಮಾಹಿತಿ ಹಂಚಿಕೊಂಡಿದ್ದಾರೆ. ಈ ಹಿಂದೆ ದೆಹಲಿಯನ್ನು ಸುತ್ತಾಡಿದ್ದ ಡಬಲ್‌ ಡೆಕ್ಕರ್‌ ಬಸ್‌ಗಳು ಪ್ರವಾಸಿಗಳನ್ನು ಆಕರ್ಷಿಸಲು ಮತ್ತೆ ದೆಹಲಿಯ ರಸ್ತೆಗಳಲ್ಲಿ ಓಡಾಟ ಆರಂಭಿಸಿವೆ. 65 ಆಸನಗಳ ವ್ಯವಸ್ಥೆಯ ಜತೆಗೆ ಸಂಪೂರ್ಣ ಎಲೆಕ್ಟ್ರಿಕ್‌ ವಾಹನಗಳು ಇವಾಗಿವೆ. ಪರಿಸರ ಕಾಳಜಿಯ ಜತೆಗೆ ಪ್ರವಾಸಿಗರಿಗೂ ಉತ್ತಮ ಅನುಭವ ನೀಡಲಿವೆ ಎಂದಿದ್ದಾರೆ.

ಈ ಬಸ್‌ಗಳ ಸುತ್ತಾಟಕ್ಕೆ ದೆಹಲಿಯ ಐತಿಹಾಸಿಕ, ಸಾಂಸ್ಕೃತಿಕ ಮತ್ತು ಪರಂಪರೆಯನ್ನು ಸಾರುವ ತಾಣಗಳನ್ನು ಒಳಗೊಂಡ ಸರ್ಕ್ಯೂಟ್‌ ಸಿದ್ಧವಾಗಿದೆ. ಶಾಹೀದ್‌ ಸ್ಮಾರಕ, ಪ್ರಧಾನಮಂತ್ರಿ ಸಂಗ್ರಹಾಲಯದಂಥ ಸ್ಥಳಗಳೂ ಯೋಜನೆಯಲ್ಲಿವೆ ಎಂದು ಸಿಎಂ ಮಾಹಿತಿ ಹಂಚಿಕೊಂಡಿದ್ದಾರೆ.