ಮರಗಳ ನೆರಳಲ್ಲಿ ಬಿಸಿ ಕಾಫಿ ಜತೆ ಹರಟೆಗೆ ಜೂನಿ ಬೆಸ್ಟ್‌

ಬೆಂಗಳೂರಿನಲ್ಲಿ ಕೆಫೆಗಳಿಗೆ ಏನೂ ಕೊರತೆಯಿಲ್ಲ. ಆದರೆ ಕೆಲವು ಕೆಫೆಗಳು ವಿಶೇಷವಾಗಿ ಗಮನ ಸೆಳೆಯುತ್ತವೆ. ಅಲ್ಲಿನ ಕಾಫಿ, ಸಿಹಿ ತಿನಿಸು, ವಿಶೇಷ ತಿಂಡಿಗಳ ಜತೆ ವಾತಾವರಣ ಈಗ ಬಹಳ ಮುಖ್ಯವಾಗುತ್ತದೆ. ಎಲ್ಲದರಲ್ಲೂ ಗಮನ ಸೆಳೆಯುವ ಕೆಫೆಯೊಂದು ಜಯನಗರದಲ್ಲಿದೆ. ʼಜೂನೀಸ್‌ ಬೇಕ್‌ ಹೌಸ್‌ʼ.

ಮರಗಳ ನೆರಳಿನ ನಡುವಲ್ಲಿ ಹಳೆಯ ಮನೆಯನ್ನು ನೆನಪಿಸುವಂಥ ಜೂನೀಸ್‌ ಬೇಕ್‌ಹೌಸ್‌ ಅಲ್ಲಿ ವಿಶೇಷ ತಿಂಡಿಗಳು, ಬಗೆಬಗೆಯ ಕಾಫಿ ಸಿಗುತ್ತವೆ. ಮನೆಯ ಅಂಗಳದಲ್ಲಿ ಕುಳಿತು ಹರಟೆ ಹೊಡೆಯುವ ಹಾಗೆ ಇಲ್ಲೂ ಕೆಫೆ ಅಂಗಳದಲ್ಲಿ ಕುರ್ಚಿ ಟೇಬಲ್‌ ಹಾಕಲಾಗಿದೆ. ಮರಗಳ ನೆರಳಿನ ತಂಪು, ಕಾಫಿಯ ಬಿಸಿ, ಎರಡೂ ಹಿತವಾದ ಅನುಭವವನ್ನು ಆಸ್ವಾದಿಸುತ್ತ ಗೆಳೆಯರ ಜತೆ ಹರಟೆ ಹೊಡೆಯಬಹುದು. ಬೆಂಗಳೂರಿನ ಅತ್ಯಂತ ಚರ್ಚಿತ ಡೆಸರ್ಟ್ ಕೆಫೆಗಳಲ್ಲಿ ಒಂದಾಗಿರುವ ಜೂನಿಸ್ ಬೇಕ್‌ಹೌಸ್ ಮನೆಗೆ ಬಂದ ಹಾಗೆ ಅಥವಾ ಅಜ್ಜಿ ಮನೆಗೆ ಹೋದ ಹಳೆಯ ನೆನಪುಗಳನ್ನು ಮರುಕಳಿಸುವಂತೆ ಮಾಡುತ್ತದೆ. ಜಯನಗರದ ಹೃದಯ ಭಾಗದಲ್ಲಿರುವ ಈ ಬೇಕ್‌ಹೌಸ್, ಕೇವಲ ತನ್ನ ಸಿಹಿ ತಿನಿಸುಗಳಿಗಾಗಿ ಮಾತ್ರವಲ್ಲದೆ, ಅಲ್ಲಿನ ವಾತಾವರಣಕ್ಕಾಗಿ ಜನಪ್ರಿಯತೆಯನ್ನು ಗಳಿಸಿದೆ. ಈ ಸ್ಥಳ ಅತ್ಯಂತ ಆಪ್ತವಾದ, ಬೆಚ್ಚಗಿನ ಭಾವವನ್ನು ನೀಡುತ್ತದೆ. ಆಹಾರವನ್ನು ಕಾಳಜಿಯಿಂದ ತಯಾರಿಸುವ ಮತ್ತು ಜನರು ನಿಧಾನವಾಗಿ ಕುಳಿತು ಆ ಕ್ಷಣವನ್ನು ಆನಂದಿಸಬಹುದಾದ ಜಾಗವಿದು.

ರುಚಿಕರ ತಿನಿಸುಗಳು

ಜೂನೀಸ್ ಬೇಕ್‌ಹೌಸ್‌ನ ಮೂಲ ಮಂತ್ರವೇ ತಾಜಾವಾಗಿ ತಯಾರಿಸಿದ ಬೇಕರಿ ಪದಾರ್ಥಗಳು ಮತ್ತು ಸಿಹಿ ತಿನಿಸುಗಳು. ಇಲ್ಲಿನ ಮೆನುವಿನಲ್ಲಿ ವೈವಿಧ್ಯಮಯ ಕೇಕ್‌ಗಳು, ಪೇಸ್ಟ್ರಿಗಳು, ಕುಕೀಸ್ ಮತ್ತು ವಿಶೇಷ ಡೆಸರ್ಟ್‌ಗಳಿವೆ. ಇವೆಲ್ಲವನ್ನೂ ಉತ್ತಮ ಗುಣಮಟ್ಟದ ಪದಾರ್ಥಗಳನ್ನು ಬಳಸಿ ತಯಾರಿಸಲಾಗುತ್ತದೆ. ಗ್ರಾಹಕರು ಇಲ್ಲಿನ ಚೀಸ್‌ಕೇಕ್‌ಗಳು, ಚಾಕೊಲೇಟ್ ಕೇಕ್‌ಗಳು ಮತ್ತು ಕಲಾತ್ಮಕ ಬ್ರೆಡ್‌ಗಳನ್ನು ಅವುಗಳ ತಾಜಾತನ ಮತ್ತು ಸಮೃದ್ಧ ರುಚಿಗಾಗಿ ವಿಶೇಷವಾಗಿ ಇಷ್ಟಪಡುತ್ತಾರೆ. ಅಲ್ಲದೆ, ಜನ್ಮದಿನ ಮತ್ತು ಇತರ ವಿಶೇಷ ಸಮಾರಂಭಗಳಿಗಾಗಿ ಕಸ್ಟಮ್ ಆರ್ಡರ್‌ಗಳನ್ನು ಸಹ ಇಲ್ಲಿ ಸ್ವೀಕರಿಸಲಾಗುತ್ತದೆ.

ಇದನ್ನೂ ಓದಿ: ಓಬಿರಾಯನ ಕಾಲದ ಹೊಟೇಲ್!

ಇಲ್ಲಿಗೆ ಬರುವವರು ಹಾಟ್ ಚಾಕೊಲೆಟ್, ಪಾಸ್ಟಾ, ಗ್ನೋಕಿ ಮತ್ತು ಫ್ರೆಂಚ್ ಟೋಸ್ಟ್ ಅಂಥ ಪದಾರ್ಥಗಳನ್ನು ಕೂಡ ಇಷ್ಟಪಡುತ್ತಾರೆ. ಇಲ್ಲಿನ ಗೊಜ್ಜು ಜಾಮ್‌ ಬನ್‌ ಕೂಡ ಜನರು ಇಷ್ಟಪಡುತ್ತಿದ್ದು, ಕೆಲ ಸಮಯದಿಂದ ನಿಲ್ಲಿಸಲಾಗಿತ್ತು. ಈಗ ಪುನಃ ಶುರು ಮಾಡುವ ಯೋಚನೆ ಇಟ್ಟುಕೊಂಡಿದ್ದಾರೆ. ಸಣ್ಣ ಡೆಸರ್ಟ್ ಬ್ರೇಕ್‌ನಿಂದ ಹಿಡಿದು ಹೊಟ್ಟೆ ತುಂಬುವ ಬ್ರಂಚ್ ಅಥವಾ ಸಂಜೆಯ ಔಟಿಂಗ್‌ವರೆಗೆ ಎಲ್ಲವನ್ನೂ ಆನಂದಿಸಲು ಇಲ್ಲಿ ಅವಕಾಶವಿದೆ.

ಹಳೆಯ ಬೆಂಗಳೂರಿನ ಸೊಗಡು:

ಜೂನೀಸ್ ಬೇಕ್‌ಹೌಸ್‌ನ ಪ್ರಮುಖ ಆಕರ್ಷಣೆಗಳಲ್ಲಿ ಒಂದು ಅಲ್ಲಿನ ಪರಿಸರ. ಇಂದಿನ ಆಧುನಿಕ ಮತ್ತು ಮಿನಿಮಲಿಸ್ಟ್ ಕೆಫೆಗಳಿಗಿಂತ ಭಿನ್ನವಾಗಿ, ಈ ಕೆಫೆಯು 'ಹಳೆಯ ಬೆಂಗಳೂರಿನ' ಸೊಗಡನ್ನು ಹೊಂದಿದ್ದು, ಅತ್ಯಂತ ಆಕರ್ಷಕವಾಗಿ ಕಾಣುತ್ತದೆ. ಯಾರನ್ನಾದರೂ ಮೊದಲ ಬಾರಿಗೆ ಡೇಟ್‌ಗೆ ಕರೆದುಕೊಂಡು ಹೋಗುವವರು, ಗೆಳೆಯರು ಗುಂಪಾಗಿ ಕುಳಿತು ಹರಟೆ ಹೊಡೆಯಲು ಅಥವಾ ಒಬ್ಬರೇ ಕುಳಿತು ಕಾಫಿ ಮತ್ತು ಕೇಕ್ ಸವಿಯುತ್ತಾ ವಿಶ್ರಾಂತಿ ಪಡೆಯಲು ಜೂನೀಸ್‌ ಉತ್ತಮ ಆಯ್ಕೆ. ಇಲ್ಲಿನ ಪ್ರಶಾಂತ ವಾತಾವರಣ ಮತ್ತು ಕಲಾತ್ಮಕ ಒಳಾಂಗಣ ವಿನ್ಯಾಸವೇ ಗ್ರಾಹಕರು ಮತ್ತೆ ಮತ್ತೆ ಇಲ್ಲಿಗೆ ಬರಲು ಮುಖ್ಯ ಕಾರಣಗಳಾಗಿವೆ.

ಗ್ರಾಹಕರ ಅನುಭವ

ಗ್ರಾಹಕರ ಅನುಭವದ ವಿಷಯಕ್ಕೆ ಬಂದರೆ, ಜೂನೀಸ್ ಬೇಕ್‌ಹೌಸ್ ಮಿಶ್ರ ಹಾಗೂ ಭಾವನಾತ್ಮಕ ಪ್ರತಿಕ್ರಿಯೆಗಳನ್ನು ಪಡೆಯುತ್ತಿದೆ. ಅನೇಕ ಗ್ರಾಹಕರು ಸಿಹಿ ತಿನಿಸುಗಳ ಗುಣಮಟ್ಟ ಮತ್ತು ರುಚಿಯನ್ನು ಕೊಂಡಾಡಿದ್ದು, ಅವುಗಳನ್ನು ನೆನಪಿನಲ್ಲಿ ಉಳಿಯುವಂಥ ಸ್ವಾದಿಷ್ಟ ತಿನಿಸುಗಳೆಂದು ಬಣ್ಣಿಸಿದ್ದಾರೆ. ಸಿಬ್ಬಂದಿಯ ಆತಿಥ್ಯ ಮತ್ತು ಸ್ವಾಗತಾರ್ಹ ನಡವಳಿಕೆಯನ್ನು ಸಹ ಅನೇಕರು ಮೆಚ್ಚಿದ್ದಾರೆ.

ಕಳೆದ ಹನ್ನೊಂದು ವರ್ಷಗಳಿಂದ ಆಹಾರ ಉದ್ಯಮದಲ್ಲಿದ್ದೇನೆ. ಇಂಥದ್ದೊಂದು ಆಹಾರ ಕೇಂದ್ರ ಮಾಡಬೇಕು ಎಂಬ ಆಸೆಯಿತ್ತು. ಜಯನಗರದಲ್ಲಿ ವಿಶಾಲವಾದ ಜಾಗ ಸಿಕ್ಕಿದ್ದಕ್ಕೆ ಅದರ ಸೌಂದರ್ಯವನ್ನು ಹಾಳು ಮಾಡದೆ ಕೆಫೆ ಮಾಡಿದ್ದೇವೆ. ಜನರು ಇಲ್ಲಿ ಸುಂದರ ಸಮಯವನ್ನು ಕಳೆಯಬಹುದು. ಇಲ್ಲಿನ ಚೀಸ್‌ಕೇಕ್‌ ಹಾಗೂ ಕಾಫಿ ವೆರೈಟಿ ಜನ ಇಷ್ಟಪಡುತ್ತಾರೆ. ನಾವು ಎಷ್ಟು ಸ್ಪೆಷಲ್‌ ಆಗಿ ಮಾಡುತ್ತೇವೆ ಅಂತ ಗೊತ್ತಿಲ್ಲ. ಆದರೆ, ಜನ ಇಷ್ಟಪಡುತ್ತಿದ್ದಾರೆ ಎಂಬ ಖುಷಿಯಿದೆ.

-ರಿಯಾ ಬೆಳ್ಳಿಯಪ್ಪ, ಜೂನೀಸ್‌ ಮುಖ್ಯಸ್ಥೆ

ವಿಳಾಸ:

1229, 34thಸಿ ಕ್ರಾಸ್‌ ರಸ್ತೆ, 4th ಟಿ ಬ್ಲಾಕ್‌ ಈಸ್ಟ್‌, ಪಟ್ಟಾಭಿರಾಮ ನಗರ, ಜಯನಗರ, ಬೆಂಗಳೂರು- 560041

Phone: 096866 87287