ಭೂಮಿಯ ಮೇಲೆ ಅತ್ಯಾಚಾರವೆಸಗದಿರಿ!

ಇದು ನಮ್ಮ ದೇಶದ ಸಮುದ್ರ ತೀರಗಳೇಕೆ ಹೀಗೆ ಎಂದು ನಾವು ಗಂಭೀರವಾಗಿ ಪ್ರಶ್ನಿಸಿಕೊಳ್ಳುವ ಹೊತ್ತು. ಬೀಚುಗಳ ಸಹಜ ಸೌಂದರ್ಯದ ಅಥವಾ ಸಾಧಾರಣ ರೂಪಿನ ಬಗ್ಗೆಯಲ್ಲ ಈ ಮಾತು. ಕೆಲವು ಬೀಚುಗಳು ಅಲ್ಲಿನ ಜೀವಿಗಳಿಂದಾಗಿ ದುರ್ಗಂಧ ಬೀರುವುದುಂಟು. ಇಲ್ಲಿ ವಿಷಯ ಅದಲ್ಲ. ಸ್ವಚ್ಛತೆಯ ವಿಚಾರದಲ್ಲಿ ಭಾರತದ ಬೀಚುಗಳೇಕೆ ಇಷ್ಟು ನಿರ್ಲಕ್ಷ್ಯಕ್ಕೆ ಒಳಗಾಗುತ್ತಿದೆ. ಇದಕ್ಕೆ ಕಾರಣ ಯಾರು ಎಂಬುದು ಚರ್ಚಿಸಬೇಕಾದ ವಿಷಯ. ಇತ್ತೀಚೆಗೆ ವಿದೇಶಿ ಪ್ರವಾಸಿಗನೊಬ್ಬ ಭಾರತದ ಸ್ವಚ್ಛತಾ ನಿರ್ಲಕ್ಷ್ಯದ ಬಗ್ಗೆ ಮತ್ತು ತ್ಯಾಜ್ಯ ನಿರ್ವಹಣೆ ಬಗ್ಗೆ ಗಂಭೀರ ಸ್ವರ ಎತ್ತಿದ್ದಾನೆ. ಅದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಕೂಡ ಆಗಿದೆ.

ಇದನ್ನೂ ಓದಿ: ಖುಷಿಯಾಗಿ ಹೋಗಿ ಕ್ಷೇಮವಾಗಿ ಬನ್ನಿ!

ಹೋಮ್ ಲೆಸ್ ಡಿಜಿಟಲ್ ನೊಮ್ಯಾಡ್ ಎಂಬ ಇನ್ ಸ್ಟಾ ಖಾತೆಯ ಜೋಯ್ ಎಂಬಾತ, ಮಹಾಬಲಿಪುರಂ ಸಮುದ್ರ ತೀರದ ವಿಡಿಯೋ ತೆಗೆದು ತೋರಿಸಿ, ನಾನು ಜಗತ್ತಿನಲ್ಲಿ ಕಂಡ ಅತ್ಯಂತ ಕೆಟ್ಟ ಮತ್ತು ಗಲೀಜಾದ ಬೀಚ್ ಇದು ಎಂದು ಹೇಳಿದ್ದಾನೆ. ಅಲ್ಲಿ ಬೇಕಾಬಿಟ್ಟಿಯಾಗಿ ಎಸೆದಿರುವ ಕಸ ಮತ್ತು ಪ್ಲಾಸ್ಟಿಕ್ ತೋರಿಸಿ ಇಂಥ ಬೇಜವಾಬ್ದಾರಿಯುತ ನಾಗರಿಕ ಪ್ರಜ್ಞೆಯ ವಿರುದ್ಧ ಕಿಡಿಕಾರಿದ್ದಾನೆ. ಅವನು ಹೇಳಿರುವ ಕೆಲವು ಮಾತುಗಳು ನಿಜಕ್ಕೂ ಚಿಂತನಾರ್ಹವಾಗಿವೆ. ಪ್ರವಾಸಿಗರಿಗೆ ಎಲ್ಲೆಂದರಲ್ಲಿ ಕಸ ಎಸೆಯುವ ಅಭ್ಯಾಸ ಬಂದಿರುವುದಕ್ಕೆ ಶಿಕ್ಷಣದ ಕೊರತೆ ಕಾರಣವಲ್ಲ. ನಾಗರಿಕ ಪ್ರಜ್ಞೆ ಕಾರಣ. ಸ್ವಚ್ಛವಾಗಿಡುವುದು ಮತ್ತು ತ್ಯಾಜ್ಯ ನಿರ್ವಹಣೆ ಸರಕಾರದ ಜವಾಬ್ದಾರಿ ಅಂತ ಜನತೆ ಭಾವಿಸಿದ್ದಾರೆ. ತಮ್ಮ ಪಾತ್ರವೇನೂ ಇಲ್ಲ. ತಾವು ಎಲ್ಲೆಂದರಲ್ಲಿ ಕಸ ಎಸೆಯಬೇಕು ಮತ್ತು ಅದನ್ನು ಸರಕಾರ ನೇಮಿಸಿರುವ ಕಾರ್ಮಿಕರು ಸ್ವಚ್ಛಗೊಳಿಸಬೇಕ ಭಾವಿಸಿದ್ದಾರೆ.

ಪ್ರತಿ ಪ್ರವಾಸಿಗೂ ಪ್ಲಾಸ್ಟಿಕ್ ನ ಅಪಾಯ, ತ್ಯಾಜ್ಯ ನಿರ್ವಹಣೆಯ ಅರಿವಿದ್ದಿದ್ದರೆ. ತಮ್ಮ ಸುತ್ತಲಿನ ಪರಿಸರ ಸ್ವಚ್ಛವಾಗಿಟ್ಟುಕೊಳ್ಳುವಲ್ಲಿ ತಮ್ಮ ಪಾತ್ರ ಪ್ರಮುಖವುದುದು ಎಂಬುದು ಅರ್ಥವಾಗಿದ್ದಿದ್ದರೆ ನಮ್ಮ ಬೀಚುಗಳು, ನಮ್ಮ ದೇಶ ಎಂದಿಗೋ ಕ್ಲೀನೆಸ್ಟ್ ಕಂಟ್ರಿ ಆಗಿರುತ್ತಿತ್ತು. ನೈರುತ್ಯ ದೇಶಗಳಲ್ಲಿರುವ ಸ್ವಚ್ಛತೆ ಪ್ರಜ್ಞೆ ಮತ್ತು ಜವಾಬ್ದಾರಿ ಇತರ ರಾಜ್ಯಗಳಲ್ಲಿಲ್ಲ. ವಿದೇಶಿ ಪ್ರವಾಸಿಗರಿಂದ ಭಾರತ ಇಂಥ ಕಮೆಂಟ್ ಗಳನ್ನು ಮತ್ತು ವಿಮರ್ಶೆಗಳನ್ನು ಪಡೆಯುವುದು ದೇಶದ ಇಮೇಜ್ ದೃಷ್ಟಿಯಿಂದ ಹಿತಕರವಲ್ಲ. ವಿದೇಶಿ ಪ್ರವಾಸಿಗರು ನಮ್ಮ ದೇಶದ ನೆಗೆಟಿವ್ಸ್ ತೋರಿಸಲು ಪ್ರವಾಸ ಬಂದಿರುವುದಿಲ್ಲ. ಭಾರತದ ಬಗ್ಗೆ ಹತ್ತು ಹಲವು ಅಚ್ಚರಿಗಳನ್ನು ಓದಿ ತಿಳಿದುಕೊಂಡು ಪ್ರತ್ಯಕ್ಷ ಸವಿಯಲು ಬಂದಿರುತ್ತಾರೆ. ಅವರಿಗೆ ಇಂಥ ಅವ್ಯವಸ್ಥೆ, ಅಶಿಸ್ತು ಮತ್ತು ಕೊಳಕುತನಗಳು ಭ್ರಮನಿರಸನ ಮತ್ತು ಬೇಸರ ಮೂಡಿಸುತ್ತವೆ.