ಪ್ರವಾಸೋದ್ಯಮ ಅಭಿವೃದ್ಧಿಯಲ್ಲಿ ಛಾಯಾಗ್ರಾಹಕರು ಮತ್ತು ಪ್ರವಾಸಿ ಮಾರ್ಗದರ್ಶಿಗಳ ಪಾತ್ರವೇ ಪ್ರಮುಖ

ಕೆ. ರಾಧಾಕೃಷ್ಣ ಹೊಳ್ಳ

ಅಧ್ಯಕ್ಷರು, ಕರ್ನಾಟಕ ರಾಜ್ಯ ಟ್ರಾವೆಲ್ಸ್ ಮಾಲಿಕರ ಸಂಘ (ರಿ)

--

ಪ್ರವಾಸೋದ್ಯಮ ಕ್ಷೇತ್ರದ ಅಭಿವೃದ್ಧಿಯಲ್ಲಿ ಛಾಯಾಗ್ರಾಹಕರು ಮತ್ತು ಪ್ರವಾಸಿ ಮಾರ್ಗದರ್ಶಿಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತಾರೆ. ಛಾಯಾಗ್ರಾಹಕರು ಕ್ಯಾಮೆರಾ ಕಣ್ಣಿನಲ್ಲಿ ಸೆರೆಹಿಡಿಯುವ ನೈಸರ್ಗಿಕ ಸೌಂದರ್ಯ, ಐತಿಹಾಸಿಕ ಸ್ಮಾರಕಗಳು ಮತ್ತು ಸಾಂಸ್ಕೃತಿಕ ವೈಭವವು ಪ್ರವಾಸಿಗರ ಮನಸ್ಸಿನಲ್ಲಿ ಆ ಸ್ಥಳದ ಬಗ್ಗೆ ವಿಶೇಷ ಆಸಕ್ತಿ ಮೂಡಿಸುತ್ತದೆ. ಅದೇ ರೀತಿ ಪ್ರವಾಸಿ ಮಾರ್ಗದರ್ಶಿಗಳು ಸ್ಥಳದ ಇತಿಹಾಸ, ಸಂಸ್ಕೃತಿ, ಪರಂಪರೆ ಮತ್ತು ವೈಶಿಷ್ಟ್ಯತೆಯನ್ನು ಮನಮುಟ್ಟುವ ರೀತಿಯಲ್ಲಿ ಪರಿಚಯಿಸುವ ಮೂಲಕ ಪ್ರವಾಸಿಗರ ಅನುಭವವನ್ನು ಸಮೃದ್ಧಗೊಳಿಸುತ್ತಾರೆ. ಹಲವಾರು ಬಾರಿ ಸುಂದರ ಚಿತ್ರಗಳನ್ನು ನೋಡಿ ಪ್ರವಾಸಿಗರು ಮತ್ತೆ ಆ ಸ್ಥಳಗಳಿಗೆ ಭೇಟಿ ನೀಡಲು ಪ್ರೇರಿತರಾಗುತ್ತಾರೆ. ಇದರಿಂದ ಪ್ರವಾಸಿತಾಣಗಳ ಜನಪ್ರಿಯತೆ ಹೆಚ್ಚುವುದರ ಜತೆಗೆ ಸ್ಥಳೀಯ ಆರ್ಥಿಕತೆಯೂ ಬಲವಾಗುತ್ತದೆ.

ಇದನ್ನೂ ಓದಿ: ಭಾರತದ ಪ್ರವಾಸೋದ್ಯಮಕ್ಕಿದೆ ಬೃಹತ್ ಭವಿಷ್ಯ – ಅಧ್ಯಯನಶೀಲ ಯೋಜನೆಗಳು ಅಗತ್ಯ

ಚಿತ್ರರಂಗ ಮತ್ತು ಧಾರಾವಾಹಿಗಳು ಕೂಡ ಪ್ರವಾಸೋದ್ಯಮದ ಬೆಳವಣಿಗೆಯಲ್ಲಿ ಮಹತ್ವದ ಪಾತ್ರ ವಹಿಸಿವೆ. ಮಲೆನಾಡಿನ ಸಹಜ ಸೌಂದರ್ಯ, ಪಶ್ಚಿಮ ಘಟ್ಟಗಳ ವೈಭವ, ಚಿಕ್ಕಮಗಳೂರು ಭಾಗದ ಹಸಿರು ಪ್ರಕೃತಿ, ಕೊಡೈಕನಾಲ್ ಪ್ರದೇಶದ ಮಂಜು ತುಂಬಿದ ವಾತಾವರಣ ಹಾಗೂ ರಾಮನಗರದ ಬೆಟ್ಟಗಳ ಸೊಬಗು ಹಲವು ಚಿತ್ರಗಳಲ್ಲಿ ಮೂಡಿಬಂದ ನಂತರ ಆ ಪ್ರದೇಶಗಳಿಗೆ ಪ್ರವಾಸಿಗರ ಭೇಟಿ ಗಣನೀಯವಾಗಿ ಏರಿಕೆಕಂಡಿದೆ.

ಉದಾಹರಣೆಗೆ ಕಾಂತಾರ ಚಿತ್ರದಲ್ಲಿ ಕರಾವಳಿಯ ಅರಣ್ಯ ವಾತಾವರಣ, ಗಾಳಿಪಟ ಚಿತ್ರದಲ್ಲಿ ಚಿಕ್ಕಮಗಳೂರು ಭಾಗದ ಹಸಿರು ಬೆಟ್ಟಗಳು, ಮನಸಾರೆ ಮತ್ತು ಮುಂಗಾರು ಮಳೆ ಚಿತ್ರಗಳಲ್ಲಿ ಸಕಲೇಶಪುರ ಪಶ್ಚಿಮ ಘಟ್ಟಗಳ ಮಳೆಯ ಸೌಂದರ್ಯ, ಶೋಲೆ ಚಿತ್ರದಲ್ಲಿ ರಾಮನಗರದ ಕಲ್ಲುಬೆಟ್ಟಗಳು ಹಾಗೂ ಮಾಲ್ಗುಡಿ ಡೇಸ್‌ ಧಾರಾವಾಹಿಯಲ್ಲಿ ತೋರಿಸಿದ ಆಗುಂಬೆ ಮತ್ತು ಮಲೆನಾಡಿನ ಗ್ರಾಮೀಣ ಸೌಂದರ್ಯ ದೇಶ-ವಿದೇಶಗಳಲ್ಲಿ ಪ್ರಸಿದ್ಧಿಯಾಯಿತು. ಒಂದು ಸುಂದರ ದೃಶ್ಯ, ಮನಮೋಹಕ ಫ್ರೇಮ್ ಅಥವಾ ಪ್ರೇರಣಾದಾಯಕ ದೃಶ್ಯಾವಳಿ ಸಾವಿರಾರು ಜನರನ್ನು ಆ ಸ್ಥಳವನ್ನು ಸ್ವತಃ ಅನುಭವಿಸಲು ಪ್ರೇರೇಪಿಸುತ್ತದೆ.

ಉತ್ತಮ ಭಾವಚಿತ್ರಗಳು, ಜವಾಬ್ದಾರಿಯುತ ಮಾರ್ಗದರ್ಶನ ಮತ್ತು ಸ್ಥಳೀಯ ಸಂಸ್ಕೃತಿಯ ಗೌರವದೊಂದಿಗೆ ಪ್ರವಾಸಿತಾಣಗಳನ್ನು ಪರಿಚಯಿಸಿದರೆ, ಪ್ರವಾಸಿಗರ ಮನಸ್ಸಿನಲ್ಲಿ ಆ ಸ್ಥಳದ ಸುಂದರ ನೆನಪು ಸದಾ ಉಳಿಯುತ್ತದೆ. ಇದರ ಪರಿಣಾಮವಾಗಿ ಅವರು ಮತ್ತೆ ಮತ್ತೆ ಭೇಟಿ ನೀಡಲು ಇಚ್ಛಿಸುತ್ತಾರೆ. ಹೀಗಾಗಿ ಛಾಯಾಗ್ರಾಹಕರು ಮತ್ತು ಪ್ರವಾಸಿ ಮಾರ್ಗದರ್ಶಿಗಳು ಪ್ರವಾಸೋದ್ಯಮ ಕ್ಷೇತ್ರದ ನಿಜವಾದ ರೋಲ್‌ ಮಾಡಲ್‌ ಆಗುತ್ತಾರೆ. ಇವರನ್ನು ಉತ್ತೇಜಿಸುವುದು, ತರಬೇತಿ ನೀಡುವುದು ಮತ್ತು ಅವರ ಕೌಶಲ್ಯವನ್ನು ಬೆಳೆಸುವುದು ಕಾಲದ ಅವಶ್ಯಕತೆಯಾಗಿದೆ.

ಕರ್ನಾಟಕದ ಪ್ರವಾಸೋದ್ಯಮ ವೈಭವದಲ್ಲಿ ಛಾಯಾಗ್ರಾಹಕರ ಪಾತ್ರ ಅತ್ಯಂತ ಅಮೂಲ್ಯವಾಗಿದೆ. ಮಂಡ್ಯ ಜಿಲ್ಲೆಯ ಕೆ.ಆರ್ ಪೇಟೆ ನದಿಯ ತೀರದ ನೈಸರ್ಗಿಕ ಸೌಂದರ್ಯ, ಬನ್ನೂರಿನ ಹಸಿರು ಹೊಲಗಳ ಶಾಂತ ವಾತಾವರಣ, ಬಂಡಿಪುರದ ಕಾಡಿನಂಚಿನ ಆನೆಗಳ ಹಿಂಡು, ಚಾರ್ಮಾಡಿಯ ವಿಶಿಷ್ಟ ಮಂಗಗಳ ಪರಿಚಯ ಹಾಗೂ ಕರಾವಳಿಯ ಕಾಂತಾರ ನೆನಪಿಸುವ ಅರಣ್ಯ ವಾತಾವರಣವು ಕರ್ನಾಟಕದ ವೈವಿಧ್ಯಮಯ ಪ್ರಕೃತಿ ಸೊಬಗನ್ನು ಪ್ರತಿಬಿಂಬಿಸುತ್ತದೆ. ಇಂಥ ದೃಶ್ಯಗಳನ್ನು ಪರಿಣಾಮಕಾರಿಯಾಗಿ ಚಿತ್ರಿಸಿ ಜನರಿಗೆ ಪರಿಚಯಿಸುವ ಮೂಲಕ ನಮ್ಮ ಛಾಯಾಗ್ರಾಹಕರು ಪ್ರವಾಸೋದ್ಯಮಕ್ಕೆ ಹೊಸ ಚೈತನ್ಯ ನೀಡುತ್ತಿದ್ದಾರೆ.

ಪ್ರವಾಸೋದ್ಯಮವು ಕೇವಲ ಒಂದು ಉದ್ಯಮವಲ್ಲ; ಅದು ಸಂಸ್ಕೃತಿ, ಪ್ರಕೃತಿ ಮತ್ತು ಆರ್ಥಿಕತೆಯನ್ನು ಒಟ್ಟುಗೂಡಿಸುವ ಶಕ್ತಿ. ಉತ್ತಮ ಛಾಯಾಗ್ರಾಹಕರು ಮತ್ತು ಪ್ರವಾಸಿ ಮಾರ್ಗದರ್ಶಿಗಳು ಈ ಕ್ಷೇತ್ರದ ನಿಜವಾದ ರಾಯಭಾರಿಗಳು. ಅವರ ಸೇವೆಯನ್ನು ಗುರುತಿಸಿ ಉತ್ತೇಜಿಸಿದರೆ ಕರ್ನಾಟಕದ ಪ್ರವಾಸೋದ್ಯಮ ಇನ್ನಷ್ಟು ಅಭಿವೃದ್ಧಿ ಹೊಂದಲಿದೆ.