ಆಪರೇಷನ್ ಸಿಂದೂರ್: ರೈಲ್ವೆ ಇಲಾಖೆಯಿಂದ ಐದು ವಿಶೇಷ ರೈಲುಗಳ ಸಂಚಾರ!

ಪಾಕಿಸ್ತಾನದ ಭಯೋತ್ಪಾದಕರ ಪಹಲ್ಗಾಮ್ ದಾಳಿಗೆ ಪ್ರತೀಕಾರವಾಗಿ ಭಾರತೀಯ ಸೇನೆಯು ಆಪರೇಷನ್‌ ಸಿಂದೂರ್‌ ನಡೆಸಿದೆ. ಕಳೆದ ಮೂರ್ನಾಲ್ಕು ದಿನಗಳಿಂದ ಭಾರತ ಮತ್ತು ಪಾಕಿಸ್ತಾನದ ಮಿಲಿಟರಿ ಸಂಘರ್ಷ ನಡೆಯುತ್ತಲೇ ಇದೆ. ಈ ಮಧ್ಯೆ ಗಡಿ ನಗರಗಳಾದ ಜಮ್ಮು, ಉಧಂಪುರ ಮತ್ತು ಪಠಾಣ್‌ಕೋಟ್‌ಗಳಿಂದ ಸಿಲುಕಿರುವ ಪ್ರಯಾಣಿಕರಿಗೆ ಸಹಾಯ ಮಾಡಲು ಭಾರತೀಯ ರೈಲ್ವೆ ವಿಶೇಷ ರೈಲು ಸಂಚಾರವನ್ನು ಘೋಷಿಸಿದೆ. ಈ ಘೋಷಣೆಯನ್ನು ಶುಕ್ರವಾರ, ಮೇ 9 ರಂದು ಮಾಡಲಾಗಿದ್ದು, ಇದರಲ್ಲಿ ವಂದೇ ಭಾರತ್ ರೈಲಿನ ನಿಯೋಜನೆಯೂ ಸೇರಿದೆ ಎಂದು ಮೂಲಗಳು ತಿಳಿಸಿವೆ.

ಜಮ್ಮು ಮತ್ತು ಉಧಂಪುರದಿಂದ ದೆಹಲಿಗೆ ಬಹು ವಿಶೇಷ ರೈಲುಗಳು ಸಂಚರಿಸಲಿವೆ ಎಂಬ ಮಾಹಿತಿಯಿದೆ. ಮೇ 9, ಶುಕ್ರವಾರ ಬೆಳಗ್ಗೆ 10:45 ಕ್ಕೆ ಜಮ್ಮುವಿನಿಂದ ದೆಹಲಿಗೆ ಹೊರಟ ವಿಶೇಷ ರೈಲು, ಪಠಾಣ್‌ಕೋಟ್‌ನಲ್ಲಿ ನಿಲ್ದಾಣ ತಲುಪಿದೆ. ಮೇ 9 ರಂದು ಸಂಜೆ 7 ಗಂಟೆಗೆ ಜಮ್ಮುವಿನಿಂದ ದೆಹಲಿಗೆ ಮತ್ತೊಂದು ವಿಶೇಷ ರೈಲು ಕೂಡ ಹೊರಟಿದೆ. ನಾಲ್ಕನೇ ವಿಶೇಷ ರೈಲು ಮೇ 10 ರಂದು ಬೆಳಗ್ಗೆ 11:05 ಕ್ಕೆ ಉಧಂಪುರದಿಂದ ಹೊರಟು, ಜಮ್ಮು, ಕಥುವಾ ಮತ್ತು ಪಠಾಣ್‌ಕೋಟ್ ಕಂಟೋನ್ಮೆಂಟ್ ಮೂಲಕ ದೆಹಲಿಗೆ ಪ್ರಯಾಣಿಸಿದೆ.

ಅಷ್ಟೇ ಅಲ್ಲದೆ ಉತ್ತರ ಪ್ರದೇಶ ಮತ್ತು ಬಿಹಾರದ ಮೂಲಕ ಹಾದುಹೋಗುವ, ಹೆಚ್ಚಾಗಿ ಕಾಯ್ದಿರಿಸದ ರೈಲು ರಾತ್ರಿ 11:55 ಕ್ಕೆ ಜಮ್ಮುವಿನಿಂದ ಗುವಾಹಟಿಗೆ ಹೊರಟಿದೆ. ಇದಲ್ಲದೆ ವಂದೇ ಭಾರತ್ ರೈಲು ಮಧ್ಯಾಹ್ನ 12:45 ಕ್ಕೆ ಉಧಂಪುರದಿಂದ ಹೊರಡಲು ವ್ಯವಸ್ಥೆ ಮಾಡಲಾಗಿತ್ತು. ಇದು ಜಮ್ಮು ಮತ್ತು ಪಠಾಣ್‌ಕೋಟ್ ಮೂಲಕವೂ ಪ್ರಯಾಣಿಸಲಿದ್ದು, ಉತ್ತರ ಜಿಲ್ಲೆಗಳು ಮತ್ತು ರಾಷ್ಟ್ರ ರಾಜಧಾನಿಯ ನಡುವೆ ಸಂಪರ್ಕ ಸಾಧಿಸುತ್ತದೆ.