ವರ್ಲ್ಡ್ ಟ್ರಾವೆಲ್ ಅಂಡ್ ಟೂರಿಸಂ ಕೌನ್ಸಿಲ್ (WTTC) ಜತೆ ಕೈ ಜೋಡಿಸಿದ ಪೆರ್ನೋಡ್ ರಿಕಾರ್ಡ್

ಜಾಗತಿಕ ಪ್ರವಾಸೋದ್ಯಮ ಕ್ಷೇತ್ರದ ಕಾರ್ಯತಂತ್ರದ ಅಭಿವೃದ್ಧಿಯನ್ನು ಬೆಂಬಲಿಸುವ ಪ್ರಮುಖ ಸಂಸ್ಥೆಗಳನ್ನು ಮತ್ತಷ್ಟು ಬಲಪಡಿಸಲು, ವಿಶ್ವ ಪ್ರವಾಸ ಮತ್ತು ಪ್ರವಾಸೋದ್ಯಮ ಮಂಡಳಿ (WTTC) 'ಪೆರ್ನೋಡ್ ರಿಕಾರ್ಡ್' (Pernod Ricard) ಸಂಸ್ಥೆಯನ್ನು ತನ್ನ ನೂತನ ಉದ್ಯಮ ಪಾಲುದಾರನನ್ನಾಗಿ ಸ್ವಾಗತಿಸಿದೆ.

ಪ್ಯಾರಿಸ್‌ನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಪೆರ್ನೋಡ್ ರಿಕಾರ್ಡ್, ಸ್ಪಿರಿಟ್ಸ್ ಮತ್ತು ಶಾಂಪೇನ್ ಉದ್ಯಮದಲ್ಲಿ ಜಾಗತಿಕ ಮಟ್ಟದಲ್ಲಿ ಮುಂಚೂಣಿಯಲ್ಲಿದೆ. ಇದು 60ಕ್ಕೂ ಹೆಚ್ಚು ದೇಶಗಳಲ್ಲಿ ತನ್ನ ಅಧೀನ ಸಂಸ್ಥೆಗಳನ್ನು ಹೊಂದಿದೆ. ಈ ಸಮೂಹವು ಅಬ್ಸೊಲ್ಯೂಟ್, ಬ್ಯಾಲಂಟೈನ್ಸ್, ಚಿವಾಸ್ ರೀಗಲ್, ಜೇಮ್ಸನ್, ಮಾರ್ಟೆಲ್‌ನಂಥ ವಿಶ್ವದ ಅತ್ಯಂತ ಪ್ರಸಿದ್ಧ ಬ್ರಾಂಡ್‌ಗಳನ್ನು ಒಳಗೊಂಡಿದೆ. 2025ರ ಹಣಕಾಸು ವರ್ಷದಲ್ಲಿ ಪೆರ್ನೋಡ್ ರಿಕಾರ್ಡ್ ಸುಮಾರು 10,959 ಮಿಲಿಯನ್ ಯುರೋಗಳಷ್ಟು ಸಂಯೋಜಿತ ಮಾರಾಟವನ್ನು ಸಾಧಿಸಿದೆ.

ಇದನ್ನೂ ಓದಿ: ನೈಟ್ ಟೂರಿಸಂ ಭಾರತದ ಅತ್ಯಂತ 'ಹೀಲಿಂಗ್' ಪ್ರವಾಸದ ಅನುಭವವಾಗಿ ಏಕೆ ಬದಲಾಗುತ್ತಿದೆ?

18 ದೇಶಗಳಲ್ಲಿ ವ್ಯಾಪಿಸಿರುವ 28 'ಬ್ರಾಂಡ್ ಹೋಮ್‌ಗಳ' ಮೂಲಕ ವರ್ಷಕ್ಕೆ ಹತ್ತು ಲಕ್ಷಕ್ಕೂ ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸುವ ಪೆರ್ನೋಡ್ ರಿಕಾರ್ಡ್, ಅನುಭವ-ಆಧಾರಿತ ಮತ್ತು ಗಮ್ಯಸ್ಥಾನ-ಚಾಲಿತ ಪ್ರವಾಸೋದ್ಯಮದ ಭವಿಷ್ಯವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಲಿದೆ. ಈ ಸ್ಥಳಗಳು ಸ್ಥಳೀಯ ಪರಂಪರೆ, ಕಲೆ ಮತ್ತು ಸಂಸ್ಕೃತಿಯೊಂದಿಗೆ ಪ್ರವಾಸಿಗರನ್ನು ಬೆಸೆಯುತ್ತವೆ.

ಈ ಬಗ್ಗೆ WTTC ಅಧ್ಯಕ್ಷೆ ಮತ್ತು ಸಿಇಒ ಗ್ಲೋರಿಯಾ ಗೆವಾರಾ, “ಅನುಭವ-ಆಧಾರಿತ ಪ್ರವಾಸೋದ್ಯಮವು ಹೊಸ ಆಯಾಮವನ್ನು ಪಡೆಯುತ್ತಿರುವ ಈ ಸಮಯದಲ್ಲಿ ಪೆರ್ನೋಡ್ ರಿಕಾರ್ಡ್, ಡಬ್ಲ್ಯೂಟಿಟಿಸಿ ಸೇರುತ್ತಿರುವುದು ಸಂತೋಷದ ವಿಷಯ. ಜಾಗತಿಕ ಬ್ರಾಂಡ್‌ಗಳು ಹೇಗೆ ಸ್ಥಳೀಯ ಆರ್ಥಿಕತೆಗೆ ಕೊಡುಗೆ ನೀಡಬಹುದು ಮತ್ತು ಸಾಂಸ್ಕೃತಿಕ ಅನುಭವಗಳನ್ನು ನೀಡಬಹುದು ಎಂಬುದಕ್ಕೆ ಅವರ ಬ್ರಾಂಡ್ ಹೋಮ್‌ಗಳು ಉತ್ತಮ ಉದಾಹರಣೆ” ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ವಿಮಾನ ಪ್ರಯಾಣಿಕರಿಗೆ ಡಿಜಿಸಿಎ ಸಿಹಿ ಸುದ್ದಿ

ಉದ್ಯಮ ಪಾಲುದಾರರಾಗಿ ಸೇರುವ ಮೂಲಕ, ಪೆರ್ನೋಡ್ ರಿಕಾರ್ಡ್ ಸಂಸ್ಥೆಯು ಡಬ್ಲ್ಯೂಟಿಟಿಸಿಯ ಕಾರ್ಯಕ್ರಮಗಳು ಮತ್ತು ಕಾರ್ಯತಂತ್ರದ ಚರ್ಚೆಗಳಲ್ಲಿ ಭಾಗವಹಿಸಲಿದ್ದು, ಇದು ಜಾಗತಿಕವಾಗಿ ಪ್ರವಾಸಿಗರು, ವ್ಯವಹಾರಗಳು ಮತ್ತು ಸಮುದಾಯಗಳಿಗೆ ಹೆಚ್ಚಿನ ಆರ್ಥಿಕ ಮತ್ತು ಸಾಮಾಜಿಕ ಮೌಲ್ಯವನ್ನು ನೀಡುವಲ್ಲಿ ಸಹಕಾರಿಯಾಗಲಿದೆ.

WTTC ಬಗ್ಗೆ:

ವರ್ಲ್ಡ್ ಟ್ರಾವೆಲ್ ಅಂಡ್ ಟೂರಿಸಂ ಕೌನ್ಸಿಲ್ ಪ್ರವಾಸೋದ್ಯಮ ಕ್ಷೇತ್ರದ ಜಾಗತಿಕ ಖಾಸಗಿ ಧ್ವನಿ. ಇದು ವಿಶ್ವದ ಪ್ರಮುಖ ವಿಮಾನಯಾನ ಸಂಸ್ಥೆಗಳು, ಹೊಟೇಲ್‌ಗಳು ಮತ್ತು ಪ್ರವಾಸ ನಿರ್ವಾಹಕರ ಮುಖ್ಯಸ್ಥರನ್ನು ಒಳಗೊಂಡಿದೆ. ಸುಸ್ಥಿರ ಬೆಳವಣಿಗೆಯನ್ನು ಉತ್ತೇಜಿಸಲು ಮತ್ತು ಉದ್ಯೋಗಗಳನ್ನು ಸೃಷ್ಟಿಸಲು ಇದು ಸರಕಾರಗಳೊಂದಿಗೆ ಕೆಲಸ ಮಾಡುತ್ತದೆ.