ಮೊರಕ್ಕೊದತ್ತ ಭಾರತೀಯ ಪ್ರವಾಸಿಗರ ಒಲವೇಕೆ?

ಆಫ್ರಿಕಾದ “ಬೆಳಕಿನ ಸಾಮ್ರಾಜ್ಯ” ಎಂದೇ ಪ್ರಸಿದ್ಧಿ ಹೊಂದಿರುವ ಮೊರಕ್ಕೊ, ಭಾರತೀಯ ಪ್ರವಾಸಿಗರ ಪಾಲಿಗೆ ವಿಶೇಷ ಅಕರ್ಷಕ ಪ್ರವಾಸಿ ತಾಣವಾಗುತ್ತಿದೆ. ಇತಿಹಾಸ, ಆರ್ಕಿಟೆಕ್ಚರ್ ಮತ್ತು ಅರಬ್-ಆಫ್ರಿಕನ್ ಸಂಸ್ಕೃತಿಯ ಗಮನ ಸೆಳೆಯುವ ಅಂಶಗಳಿರುವ ಈ ದೇಶವು ಭಾರತೀಯ ಪ್ರವಾಸಿಗರನ್ನು ಸೆಳೆಯಲು ಹೊಸ ಯೋಜನೆಗಳನ್ನು ರೂಪಿಸಿದೆ.

ಮೊರಕ್ಕೊ ರಾಷ್ಟ್ರೀಯ ಪ್ರವಾಸೋದ್ಯಮ ಕಚೇರಿ ಬಿಡುಗಡೆ ಮಾಡಿದ ಅಂಕಿಅಂಶಗಳ ಪ್ರಕಾರ 2019ಕ್ಕೆ ಹೋಲಿಸಿದರೆ ಭಾರತೀಯ ಪ್ರವಾಸಿಗರ ಸಂಖ್ಯೆಯಲ್ಲಿ 224% ರಷ್ಟು ಭಾರಿ ಏರಿಕೆ ಕಂಡುಬಂದಿದೆ. 2024ರಲ್ಲಿ ಸುಮಾರು 41,000 ಭಾರತೀಯರು ಭೇಟಿ ನೀಡಿದ್ದರೆ, 2025ರಲ್ಲಿ ಈ ಸಂಖ್ಯೆ 54,000ಕ್ಕೆ ಏರಿಕೆಯಾಗಿದೆ. ಅಂದರೆ ವಾರ್ಷಿಕವಾಗಿ 31% ಬೆಳವಣಿಗೆ ಕಂಡಿದೆ ಎಂದರ್ಥ. ಈ ವರ್ಷದ ಅಂತ್ಯದ ವೇಳೆಗೆ 80,000 ದಿಂದ 1 ಲಕ್ಷ ಭಾರತೀಯ ಪ್ರವಾಸಿಗರನ್ನು ಆಕರ್ಷಿಸುವ ಗುರಿಯನ್ನು ಮೊರಕ್ಕೊ ಹೊಂದಿದೆ.

ಇದನ್ನೂ ಓದಿ: ಥೈಲ್ಯಾಂಡ್ ಪ್ರವಾಸೋದ್ಯಮ ಬಿಕ್ಕಟ್ಟು

ಪ್ರಸ್ತುತ ಭಾರತ ಮತ್ತು ಮೊರಾಕೊ ನಡುವೆ ನೇರ ವಿಮಾನಯಾನ ಸೌಲಭ್ಯವಿಲ್ಲ. ಪ್ರವಾಸಿಗರು ದುಬೈ, ದೋಹಾ ಅಥವಾ ಯುರೋಪಿಯನ್ ನಗರಗಳ ಮೂಲಕ ಪ್ರಯಾಣಿಸಬೇಕಿದೆ. ಭಾರತೀಯ ಪ್ರವಾಸಿಗರ ಸಂಖ್ಯೆ ವರ್ಷಕ್ಕೆ 1 ಲಕ್ಷ ತಲುಪಿದ ತಕ್ಷಣ, ಎರಡೂ ದೇಶಗಳ ನಡುವೆ ನೇರ ವಿಮಾನಯಾನ ಪ್ರಾರಂಭಿಸಲು ಮೊರಕ್ಕೊ ಸರಕಾರ ಮಾತುಕತೆ ನಡೆಸುತ್ತಿದೆ.

ಭಾರತೀಯ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗಲು ಪ್ರಮುಖ ಕಾರಣ ಮೊರಕ್ಕೊ ಪರಿಚಯಿಸಿರುವ ಸುಲಭ ಇ-ವೀಸಾ ವ್ಯವಸ್ಥೆ. ಈ ವೀಸಾವನ್ನು ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿ ಕೇವಲ 24 ರಿಂದ 72 ಗಂಟೆಗಳಲ್ಲಿ ಪಡೆಯಬಹುದು. ಬಾಲಿವುಡ್ ಮತ್ತು ದಕ್ಷಿಣ ಭಾರತದ ಚಲನಚಿತ್ರ ನಿರ್ಮಾಪಕರಿಗೆ ಮೊರಕ್ಕೊ ಆಕರ್ಷಕ ರಿಯಾಯಿತಿಗಳನ್ನು ನೀಡುತ್ತಿದೆ. ಅಲ್ಲಿ ಚಿತ್ರೀಕರಣ ಮಾಡುವ ತಂಡಗಳಿಗೆ 30% ವರೆಗೆ ತೆರಿಗೆ ರಿಯಾಯಿತಿ ನೀಡುವ ಭರವಸೆ ನೀಡಲಾಗಿದೆ.