ಭಾರತ–ನೇಪಾಳ: ಗಡಿ ಪ್ರಯಾಣ ಸುಗಮಗೊಳಿಸುವ ಭರವಸೆ

ಭಾರತ ಮತ್ತು ನೇಪಾಳದ ನಡುವಿನ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸುವ ಅಗತ್ಯವಿದೆ ಎಂದು ಉತ್ತರ ಪ್ರದೇಶದ ಸಾರಿಗೆ ಸಚಿವ ದಯಾಶಂಕರ್ ಸಿಂಗ್ ಹೇಳಿದ್ದಾರೆ. ಉಭಯ ದೇಶಗಳ ಗಡಿಭಾಗದಲ್ಲಿ ಜನರ ಸಂಚಾರ, ವ್ಯಾಪಾರ ಮತ್ತು ಸಂಪರ್ಕ ವ್ಯವಸ್ಥೆ ಸುಗಮವಾಗುವಂತೆ ಕ್ರಮ ಕೈಗೊಳ್ಳುವ ಭರವಸೆಯನ್ನೂ ನೀಡಿದ್ದಾರೆ.

ಭಾರತ– ನೇಪಾಳ ಗಡಿ ಎರಡೂ ದೇಶಗಳ ಜನರ ದೈನಂದಿನ ಜೀವನ, ವ್ಯಾಪಾರ ಮತ್ತು ಉದ್ಯೋಗದೊಂದಿಗೆ ನಿಕಟವಾಗಿ ಬೆಸೆದುಕೊಂಡಿದೆ. ವಿಶೇಷವಾಗಿ ಉತ್ತರ ಪ್ರದೇಶದ ಗಡಿಭಾಗವು ನೇಪಾಳದೊಂದಿಗೆ ಪ್ರಮುಖ ಸಂಪರ್ಕ ಹೊಂದಿದ್ದು, ರುಪೈಡಿಹಾ– ನೇಪಾಳಗಂಜ್ ಮಾರ್ಗದಂಥ ಗಡಿ ಸಂಪರ್ಕ ಕೇಂದ್ರಗಳು ವ್ಯಾಪಾರ ಮತ್ತು ಜನರ ಸಂಚಾರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ.

ಗಡಿ ಸಂಪರ್ಕವನ್ನು ಸುಧಾರಿಸುವುದರಿಂದ ಪ್ರವಾಸೋದ್ಯಮ, ವ್ಯಾಪಾರ ಹಾಗೂ ಸ್ಥಳೀಯ ಆರ್ಥಿಕ ಚಟುವಟಿಕೆಗಳಿಗೆ ಉತ್ತೇಜನ ದೊರೆಯಲಿದೆ. ಭಾರತ ಮತ್ತು ನೇಪಾಳ ನಡುವಿನ ಸಂಬಂಧವು ವ್ಯಾಪಾರ- ವಾಣಿಜ್ಯಕ್ಕೆ ಮಾತ್ರ ಸೀಮಿತವಾಗದೆ ಜನರಿಂದ ಜನರಿಗೆ ಇರುವ ಬಾಂಧವ್ಯ, ಸಂಸ್ಕೃತಿ, ಧಾರ್ಮಿಕ ಪ್ರವಾಸ ಮತ್ತು ಸಾಮಾಜಿಕ ಸಂಪರ್ಕವನ್ನೂ ಒಳಗೊಂಡಿದೆ.

ಇತ್ತೀಚಿನ ದ್ವಿಪಕ್ಷೀಯ ಮಾತುಕತೆಗಳಲ್ಲಿಯೂ ಸಂಪರ್ಕ, ವ್ಯಾಪಾರ, ಇಂಧನ, ಅಭಿವೃದ್ಧಿ ಸಹಕಾರ ಮತ್ತು ಜನರ ನಡುವಿನ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸುವ ಕುರಿತು ಎರಡೂ ದೇಶಗಳು ಒತ್ತು ನೀಡಿವೆ.

ಗಡಿ ಪ್ರದೇಶಗಳಲ್ಲಿ ಸುಗಮ ಸಂಚಾರಕ್ಕೆ ಅಗತ್ಯ ಸೌಲಭ್ಯಗಳನ್ನು ಅಭಿವೃದ್ಧಿಪಡಿಸುವುದು ಎರಡೂ ದೇಶಗಳ ಆರ್ಥಿಕ ಹಾಗೂ ಪ್ರವಾಸೋದ್ಯಮ ಸಂಬಂಧಗಳಿಗೆ ಹೊಸ ವೇಗ ನೀಡುವ ನಿರೀಕ್ಷೆಯಿದೆ.