2029ರ ವೇಳೆಗೆ 400 ಹೊಟೇಲ್‌ಗಳ ಗುರಿ: ಸರೋವರ್ ಹೊಟೇಲ್ಸ್

ಭಾರತದಲ್ಲಿ ದೇಶೀಯ ಪ್ರವಾಸೋದ್ಯಮ ವೇಗವಾಗಿ ಬೆಳೆಯುತ್ತಿರುವ ಹಿನ್ನೆಲೆಯಲ್ಲಿ, ಸರೋವರ್ ಹೊಟೇಲ್ಸ್ ತನ್ನ ವಿಸ್ತರಣಾ ಯೋಜನೆಯನ್ನು ಹೊಸ ದಿಕ್ಕಿನಲ್ಲಿ ಮುನ್ನಡೆಸುತ್ತಿದೆ. ದೊಡ್ಡ ನಗರಗಳಿಗಿಂತ ಇನ್ನೂ ಸಂಘಟಿತ ಆತಿಥ್ಯ ಸೇವೆಗಳು ತಲುಪದ ಉದಯೋನ್ಮುಖ ಪ್ರವಾಸಿ ತಾಣಗಳು, ಟಿಯರ್- 2 ಮತ್ತು ಟಿಯರ್- 3 ನಗರಗಳು ಹಾಗೂ ಧಾರ್ಮಿಕ– ವಿರಾಮ ಪ್ರವಾಸಿ ಕೇಂದ್ರಗಳ ಮೇಲೆ ಕಂಪನಿ ಹೆಚ್ಚಿನ ಗಮನ ಹರಿಸಿದೆ. ಈ ಮೂಲಕ 2029ರ ವೇಳೆಗೆ 400 ಹೊಟೇಲ್‌ಗಳನ್ನು ಹೊಂದುವ ಗುರಿಯನ್ನು ಹೊಂದಿದೆ.

ಸರೋವರ್ ಹೊಟೇಲ್‌ನ ಸಿಇಒ ಜತಿನ್ ಖನ್ನಾ ಅವರ ಪ್ರಕಾರ, ಕಂಪನಿಯ ಗುರಿ ಕೇವಲ ಹೊಟೇಲ್‌ಗಳ ಸಂಖ್ಯೆಯನ್ನು ಹೆಚ್ಚಿಸುವುದಲ್ಲ; ಸಂಘಟಿತ ಹೊಟೇಲ್ ಸೇವೆಗಳು ಇನ್ನೂ ತಲುಪದ ಹೊಸ ತಾಣಗಳಲ್ಲಿ ಪ್ರವಾಸೋದ್ಯಮಕ್ಕೆ ಉತ್ತೇಜನ ನೀಡುವುದಾಗಿದೆ. ಕಂಪನಿಯ ವಿಸ್ತರಣೆಯು ವಿಲೀನ ಅಥವಾ ಸ್ವಾಧೀನಗಳ ಮೂಲಕವಲ್ಲ, ಸಂಪೂರ್ಣವಾಗಿ ಸ್ವಾಭಾವಿಕ (ಆರ್ಗ್ಯಾನಿಕ್) ಬೆಳವಣಿಗೆಯ ಮೂಲಕ ಸಾಗುತ್ತಿದೆ ಎಂದು ಅವರು ತಿಳಿಸಿದ್ದಾರೆ.

ಪ್ರಸ್ತುತ ಸರೋವರ್ ಹೊಟೇಲ್ಸ್ 90ಕ್ಕೂ ಹೆಚ್ಚು ತಾಣಗಳಲ್ಲಿ 152 ಹೊಟೇಲ್‌ಗಳನ್ನು ನಿರ್ವಹಿಸುತ್ತಿದ್ದು, 11,000ಕ್ಕೂ ಹೆಚ್ಚು ಕೊಠಡಿಗಳನ್ನು ಹೊಂದಿದೆ. 2026ರಲ್ಲಿ ಇದುವರೆಗೆ 11 ಹೊಸ ಹೊಟೇಲ್‌ಗಳನ್ನು ಆರಂಭಿಸಿದ್ದು, 27 ಹೊಸ ಯೋಜನೆಗಳಿಗೆ ಸಹಿ ಹಾಕಿದೆ. ಮುಂದಿನ ಆರು ತಿಂಗಳಲ್ಲಿ ಇನ್ನೂ ಐದು ಹೊಟೇಲ್‌ಗಳನ್ನು ಆರಂಭಿಸಲು ಯೋಜಿಸಲಾಗಿದೆ. ಮುಂದಿನ ವರ್ಷ 100ಕ್ಕೂ ಹೆಚ್ಚು ತಾಣಗಳಲ್ಲಿ ತನ್ನ ಉಪಸ್ಥಿತಿಯನ್ನು ವಿಸ್ತರಿಸುವ ಗುರಿಯನ್ನೂ ಕಂಪನಿ ಹೊಂದಿದೆ.

ಕಂಪನಿಯು 2029ರ ವೇಳೆಗೆ ಕಾರ್ಯಾಚರಣೆಯಲ್ಲಿರುವ ಹಾಗೂ ಅಭಿವೃದ್ಧಿಯ ಹಂತದಲ್ಲಿರುವ ಒಟ್ಟು 400 ಹೊಟೇಲ್‌ಗಳನ್ನು 110ಕ್ಕೂ ಹೆಚ್ಚು ತಾಣಗಳಲ್ಲಿ ಸ್ಥಾಪಿಸುವ ಗುರಿ ಹೊಂದಿದೆ. ಜತೆಗೆ, ಬಲವಾದ ದ್ವಿಅಂಕಿಯ ಆದಾಯ ವೃದ್ಧಿಯನ್ನು ಮುಂದುವರಿಸುವ ಉದ್ದೇಶವನ್ನೂ ಪ್ರಕಟಿಸಿದೆ. ದೇಶೀಯ ಪ್ರವಾಸೋದ್ಯಮದ ಏರಿಕೆ, ಮೂಲಸೌಕರ್ಯ ಅಭಿವೃದ್ಧಿ ಹಾಗೂ ಹೊಸ ಪ್ರವಾಸಿ ತಾಣಗಳ ಬೇಡಿಕೆ ಈ ಬೆಳವಣಿಗೆಗೆ ಪ್ರಮುಖ ಆಧಾರವಾಗಿವೆ ಎಂದು ಕಂಪನಿ ಅಭಿಪ್ರಾಯಪಟ್ಟಿದೆ.