ಪಾರಂಪರಿಕ ಆಟಿಕೆ ರೈಲು ಸೇವೆ ಪುನರಾರಂಭ

ಹಿಮಾಚಲ ಪ್ರದೇಶದ ಐತಿಹಾಸಿಕ ಹಾಗೂ ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣವಾಗಿರುವ ಕಲ್ಕಾ–ಶಿಮ್ಲಾ ರೈಲು ಮಾರ್ಗದಲ್ಲಿ ಭಾಗಶಃ ರೈಲು ಸೇವೆ ಪುನರಾರಂಭಗೊಂಡಿದ್ದು, ಪ್ರವಾಸಿಗರಲ್ಲಿ ಸಂತಸ ಮೂಡಿಸಿದೆ.

ಭಾರಿ ಮಳೆಯಿಂದ ಉಂಟಾದ ಭೂಕುಸಿತದಿಂದ ಸೋಲನ್ ಜಿಲ್ಲೆಯ ಪರ್ವಾನೂ ಸಮೀಪದ ರೈಲು ಹಳಿಯ ಕೆಳಭಾಗದ ಮಣ್ಣು ಕೊಚ್ಚಿಹೋಗಿದ್ದ ಹಿನ್ನೆಲೆಯಲ್ಲಿ ಒಂದು ವಾರಕ್ಕೂ ಹೆಚ್ಚು ಕಾಲ ಸೇವೆ ಸ್ಥಗಿತಗೊಂಡಿತ್ತು.

ಪರಿಣಾಮ ಆರು ಪ್ರಯಾಣಿಕ ರೈಲು ಸೇವೆಗಳು ರದ್ದಾಗಿದ್ದವು. ಇದೀಗ ಧರಂಪುರದಿಂದ ಶಿಮ್ಲಾವರೆಗೆ ರೈಲು ಸಂಚಾರಕ್ಕೆ ಅನುಮತಿ ನೀಡಲಾಗಿದೆ. ಆದರೆ, ಪರ್ವಾನೂ ಬಳಿಯ ಹಾನಿಗೊಳಗಾದ ಹಳಿಯಲ್ಲಿ ದುರಸ್ತಿ ಕಾರ್ಯ ಮುಂದುವರಿದಿರುವುದರಿಂದ ಕಲ್ಕಾದಿಂದ ನೇರ ರೈಲು ಸೇವೆ ಇನ್ನೂ ಸ್ಥಗಿತವಾಗಿದೆ. ಕಲ್ಕಾದಿಂದ ಧರಂಪುರದವರೆಗೆ ಪ್ರವಾಸಿಗರು ಬಸ್ ಮೂಲಕ ತೆರಳಿ, ಅಲ್ಲಿಂದ ಆಟಿಕೆ ರೈಲಿನಲ್ಲಿ ಶಿಮ್ಲಾ ಪ್ರಯಾಣಿಸಬೇಕಾಗಿದೆ.

ಪ್ರವಾಸಿಗರು ಈ ಪರ್ಯಾಯ ವ್ಯವಸ್ಥೆಯ ನಡುವೆಯೂ ಸುಂದರ ಪರ್ವತ ದೃಶ್ಯಗಳನ್ನು ಕಣ್ತುಂಬಿಕೊಂಡು ಪ್ರಯಾಣದ ಅನುಭವವನ್ನು ಮೆಚ್ಚಿಕೊಂಡಿದ್ದಾರೆ. ರೈಲು ಸೇವೆ ಪುನರಾರಂಭವಾಗಿರುವುದು ಸ್ಥಳೀಯ ಟ್ಯಾಕ್ಸಿ ಚಾಲಕರು, ವ್ಯಾಪಾರಿಗಳು ಹಾಗೂ ಪ್ರವಾಸೋದ್ಯಮ ಅವಲಂಬಿತ ಉದ್ಯಮಗಳಿಗೂ ನೆಮ್ಮದಿ ತಂದಿದೆ. ಮುಂಬರುವ ಪ್ರವಾಸಿ ಋತುವಿನೊಳಗೆ ಸಂಪೂರ್ಣ ಮಾರ್ಗವನ್ನು ಪುನಃ ಆರಂಭಿಸಲು ದುರಸ್ತಿ ಕಾರ್ಯ ವೇಗವಾಗಿ ನಡೆಯುತ್ತಿದೆ.