ರೈಲ್ವೇಯಿಂದ 11 ದಿನಗಳ ‘ಗ್ರೀನ್ ಎಸ್ಕೇಪ್’ ಪ್ರವಾಸ ಪ್ಯಾಕೇಜ್

ಈಶಾನ್ಯ ಭಾರತದ ಪ್ರಕೃತಿ ಸೌಂದರ್ಯ, ವನ್ಯಜೀವಿ ಮತ್ತು ಪರ್ವತ ಪ್ರದೇಶಗಳನ್ನು ಒಂದೇ ಪ್ರವಾಸದಲ್ಲಿ ಅನುಭವಿಸಲು ಭಾರತೀಯ ರೈಲ್ವೇಯ ಪ್ರವಾಸೋದ್ಯಮ ವಿಭಾಗ IRCTC ‘ದಿ ಗ್ರೀನ್ ಎಸ್ಕೇಪ್-3 ಸ್ಟೇಟ್ಸ್, ಎಕ್ಸ್ ಗುವಾಹಟಿ’ ಎಂಬ 11 ದಿನ-10 ರಾತ್ರಿ ಪ್ರವಾಸ ಪ್ಯಾಕೇಜ್ ಘೋಷಿಸಿದೆ.

ಅಸ್ಸಾಂ, ಮೇಘಾಲಯ ಮತ್ತು ಅರುಣಾಚಲ ಪ್ರದೇಶಗಳನ್ನು ಒಳಗೊಂಡಿರುವ ಈ ಪ್ರವಾಸ ಗುವಾಹಟಿಯಿಂದ ಆರಂಭವಾಗುತ್ತದೆ. ಶಿಲ್ಲಾಂಗ್, ಚಿರಾಪುಂಜಿ, ಮಾವ್ಲಿನ್ನಾಂಗ್, ಡಾವ್ಕಿ, ಕಾಜಿರಂಗ, ದಿರಾಂಗ್ ಮತ್ತು ತವಾಂಗ್ ಪ್ರಮುಖ ತಾಣಗಳಾಗಿವೆ.

ಪ್ರವಾಸದಲ್ಲಿ ಕಾಮಾಖ್ಯಾ ದೇವಾಲಯ, ಉಮಿಯಂ ಸರೋವರ, ಎಲಿಫೆಂಟ್ ಫಾಲ್ಸ್, ನೊಹ್ಕಲಿಕೈ ಜಲಪಾತ, ಉಮಾಂಗೋಟ್ ನದಿ, ಸೇಲಾ ಪಾಸ್, ಜಸ್ವಂತ್ ಗಢ್ ಯುದ್ಧ ಸ್ಮಾರಕ, ಜಂಗ್ ಜಲಪಾತ ಮತ್ತು ತವಾಂಗ್ ಮಠಕ್ಕೆ ಭೇಟಿ ನೀಡಲಾಗುತ್ತದೆ. ತವಾಂಗ್‌ನಲ್ಲಿ ಸಂಗೇಸ್ಟರ್ ಸರೋವರ ಹಾಗೂ ಬುಮ್ಲಾ ಪಾಸ್ ಪ್ರವಾಸಕ್ಕೂ ಅವಕಾಶವಿದೆ.

ಪ್ಯಾಕೇಜ್ ದರ ವ್ಯಕ್ತಿಗೆ 49,170 ರು. ನಿಂದ ಆರಂಭವಾಗುತ್ತದೆ. ಹೊಟೇಲ್ ವಾಸ, ಉಪಾಹಾರ, ರಾತ್ರಿ ಊಟ, ಸ್ಥಳೀಯ ಸಾರಿಗೆ, ವೀಕ್ಷಣೆ, ವಿಮೆ, ಅಗತ್ಯ ಪರವಾನಗಿ ಮತ್ತು ಜಿಎಸ್‌ಟಿ ಒಳಗೊಂಡಿವೆ.