ಆಮ್‌ಸ್ಟರ್‌ಡಮ್‌ ಪ್ರವಾಸಿಗರಿಗೆ ಬಿಗ್‌ ಶಾಕ್‌!

ನೆದರ್‌ಲ್ಯಾಂಡ್ಸ್ ಸುಂದರ ರಾಜಧಾನಿ ಮತ್ತು ಜಾಗತಿಕ ಪ್ರವಾಸಿಗರ ನೆಚ್ಚಿನ ತಾಣವಾದ 'ಆಮ್‌ಸ್ಟರ್‌ಡಮ್‌' ಇನ್ನು ಮುಂದೆ ಪ್ರವಾಸಿಗರಿಗೆ ಅತ್ಯಂತ ದುಬಾರಿಯಾಗಲಿದೆ. ನಗರದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ಅತಿಯಾದ ಪ್ರವಾಸಿಗರ ದಟ್ಟಣೆಯನ್ನು ನಿಯಂತ್ರಿಸಲು ಮತ್ತು ಸ್ಥಳೀಯ ನಾಗರಿಕರ ಜೀವನಮಟ್ಟವನ್ನು ರಕ್ಷಿಸುವ ನಿಟ್ಟಿನಲ್ಲಿ ಆಮ್ಸ್ಟರ್ಡ್ಯಾಮ್‌ನ ಹೊಸ ಸಮ್ಮಿಶ್ರ ಸರಕಾರವು ಕ್ರಾಂತಿಕಾರಕ ಹಾಗೂ ಅತ್ಯಂತ ಕಠಿಣವಾದ ಪ್ರವಾಸೋದ್ಯಮ ನೀತಿಗಳನ್ನು ಅಧಿಕೃತವಾಗಿ ಪ್ರಕಟಿಸಿದೆ. ಈ ಹೊಸ ನೀತಿಯ ಅಡಿಯಲ್ಲಿ, ನಗರದಲ್ಲಿ ತಂಗುವ ವಿದೇಶಿ ಪ್ರವಾಸಿಗರ ಮೇಲಿನ 'ಪ್ರವಾಸಿ ತೆರಿಗೆಯನ್ನು' ಹಂತ ಹಂತವಾಗಿ 20%ಕ್ಕೆ ಏರಿಸಲು ನಿರ್ಧರಿಸಲಾಗಿದೆ.

ಪ್ರಸ್ತುತ ಆಮ್‌ಸ್ಟರ್‌ಡಮ್‌ ನಗರವು ಯುರೋಪ್‌ನಲ್ಲಿಯೇ ಅತ್ಯಂತ ಹೆಚ್ಚಿನ ಪ್ರವಾಸಿ ತೆರಿಗೆಯನ್ನು ಹೊಂದಿರುವ ನಗರಗಳಲ್ಲಿ ಒಂದಾಗಿದೆ. ಸದ್ಯಕ್ಕೆ ಪ್ರವಾಸಿಗರು ತಾವು ತಂಗುವ ಹೊಟೇಲ್ ಅಥವಾ ರೆಸಾರ್ಟ್‌ನ ಒಟ್ಟು ವೆಚ್ಚದ ಮೇಲೆ 12% ಪ್ರವಾಸಿ ತೆರಿಗೆಯನ್ನು ಪಾವತಿಸುತ್ತಿದ್ದಾರೆ. ಆದರೆ, ಹೊಸದಾಗಿ ಅಧಿಕಾರಕ್ಕೆ ಬಂದಿರುವ ಮುನ್ಸಿಪಲ್ ಕೌನ್ಸಿಲ್‌ನ ಮೈತ್ರಿ ಸರಕಾರ ಸಿದ್ಧಪಡಿಸಿರುವ ನೀತಿ ಒಪ್ಪಂದದ ಪ್ರಕಾರ, ಈ ತೆರಿಗೆಯನ್ನು ಮುಂದಿನ ವರ್ಷದಿಂದಲೇ ಆರಂಭಿಕವಾಗಿ 16% ಗೆ ಹೆಚ್ಚಿಸಲಾಗುವುದು. ಆ ನಂತರ ಪ್ರತಿ ವರ್ಷ 1% ರಷ್ಟು ಹೆಚ್ಚಳ ಮಾಡುತ್ತಾ, ಅಂತಿಮವಾಗಿ 2030ರ ವೇಳೆಗೆ ಇಡೀ ಜಗತ್ತಿನಲ್ಲಿಯೇ ಅತ್ಯಂತ ಗರಿಷ್ಠ ಮಟ್ಟದ ಅಂದರೆ 20% ಪ್ರವಾಸಿ ತೆರಿಗೆಯನ್ನು ಕಡ್ಡಾಯಗೊಳಿಸಲಾಗುವುದು.

ಆಮ್‌ಸ್ಟರ್‌ಡಮ್‌ ನಗರಕ್ಕೆ ಕೇವಲ 2024ರ ಒಂದೇ ವರ್ಷದಲ್ಲಿ ಸರಿಸುಮಾರು 23 ಮಿಲಿಯನ್ ಪ್ರವಾಸಿಗರು ರಾತ್ರಿ ತಂಗಲು ಭೇಟಿ ನೀಡಿದ್ದು, 14 ಮಿಲಿಯನ್ ಜನ ಕೇವಲ ಡೇ-ಟ್ರಿಪ್ ಪ್ರವಾಸಿಗರಾಗಿ ಬಂದಿದ್ದಾರೆ. ಇಷ್ಟೊಂದು ಭಾರಿ ಪ್ರಮಾಣದ ಜಾಗತಿಕ ಪ್ರವಾಸಿಗರ ಒಳಹರಿವಿನಿಂದಾಗಿ ನಗರದ ಸಾರ್ವಜನಿಕ ಮೂಲಸೌಕರ್ಯ, ಸ್ವಚ್ಛತೆ ಮತ್ತು ಸ್ಥಳೀಯ ಮುನ್ಸಿಪಲ್ ಸೇವೆಗಳ ಮೇಲೆ ಭಾರಿ ಒತ್ತಡ ನಿರ್ಮಾಣವಾಗಿದೆ. ಈ ಹಿನ್ನೆಲೆಯಲ್ಲʼಪ್ರವಾಸಿಗರು ನಗರದ ನಿರ್ವಹಣೆಗೆ ತಮ್ಮ ನ್ಯಾಯಯುತ ಪಾಲನ್ನು ನೀಡಬೇಕುʼ ಎಂದು ಸರಕಾರ ಪ್ರತಿಪಾದಿಸಿದೆ.

ಕೇವಲ ತೆರಿಗೆ ಹೆಚ್ಚಳ ಮಾತ್ರವಲ್ಲದೆ, ಆಮ್ಸ್ಟರ್ಡ್ಯಾಮ್ ನಗರವನ್ನು ಪ್ರವೇಶಿಸುವ ಬೃಹತ್ ಐಷಾರಾಮಿ ಹಡಗುಗಳಿಗೆ ಭಾರಿ ಹೊಡೆತ ನೀಡಲು ಸರಕಾರ ನಿರ್ಧರಿಸಿದೆ. ನಗರದ ಮುಖ್ಯ ರೈಲ್ವೇ ನಿಲ್ದಾಣದ ಪೂರ್ವಕ್ಕಿರುವ ಪ್ರಮುಖ 'ಸಮುದ್ರ ಕ್ರೂಸ್ ಟರ್ಮಿನಲ್' ಅನ್ನು ಸಂಪೂರ್ಣವಾಗಿ ಮುಚ್ಚಲು ಪ್ರಸ್ತಾಪಿಸಲಾಗಿದೆ. ಸಮುದ್ರದ ಮೂಲಕ ಬರುವ ಪ್ರವಾಸಿಗರು ನಗರದಲ್ಲಿ ಯಾವುದೇ ಹೊಟೇಲ್ ಬುಕಿಂಗ್ ಮಾಡದೆ ಕೇವಲ ಕೆಲವು ಗಂಟೆಗಳ ಕಾಲ ಬಂದು ಭಾರಿ ದಟ್ಟಣೆ ಸೃಷ್ಟಿಸುತ್ತಾರೆ ಮತ್ತು ಪರಿಸರ ಮಾಲಿನ್ಯಕ್ಕೆ ಕಾರಣವಾಗುತ್ತಾರೆ ಎಂಬ ಕಾರಣಕ್ಕೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ದಿನದ ಪ್ರವಾಸಿಗರಿಂದ ಹೆಚ್ಚಿನ ಕೊಡುಗೆಯನ್ನು ಪಡೆಯಲು ಕಾಲುವೆಗಳಲ್ಲಿ ಸಂಚರಿಸುವ ಬೋಟ್‌ಗಳು ಮತ್ತು ಕ್ಯಾನೋಗಳ ಮೇಲಿನ ಎಂಟರ್‌ಟೈನ್‌ಮೆಂಟ್ ಲೇವಿಯನ್ನು ಕೂಡ ಹೆಚ್ಚಿಸಲಾಗುತ್ತಿದೆ.

ಮತ್ತೊಂದು ಅಚ್ಚರಿಯ ಕ್ರಮವಾಗಿ, ಆಮ್‌ಸ್ಟರ್‌ಡಮ್‌ ಇನ್ನು ಮುಂದೆ ಜಾಗತಿಕವಾಗಿ ಪ್ರವಾಸಿಗರನ್ನು ಆಕರ್ಷಿಸುವ ಯಾವುದೇ ಅಧಿಕೃತ ಜಾಹೀರಾತು ಅಥವಾ ಪ್ರಚಾರಗಳನ್ನು ಮಾಡುವುದಿಲ್ಲ. ಇನ್ನು ಮುಂದೆ ಪ್ರವಾಸಿಗರನ್ನು ಸೆಳೆಯುವ ಬದಲು ಬಂದ ಪ್ರವಾಸಿಗರನ್ನು ವ್ಯವಸ್ಥಿತವಾಗಿ ನಿಯಂತ್ರಿಸುವತ್ತ ಗಮನ ಹರಿಸಲಾಗುವುದು.

ಹಿಂದಿನ ನಗರ ಸರಕಾರವು ಜಾರಿಗೆ ತರಲು ಉದ್ದೇಶಿಸಿದ್ದ ಅತ್ಯಂತ ವಿವಾದಾತ್ಮಕ ಯೋಜನೆಯಾದ 'ಎರೊಟಿಕ್ ಸೆಂಟರ್' ನಿರ್ಮಾಣದ ಪ್ರಸ್ತಾವನೆಯನ್ನು ಹೊಸ ಸರಕಾರವು ಸಂಪೂರ್ಣವಾಗಿ ರದ್ದುಗೊಳಿಸಿದೆ. ನಗರದ ಪ್ರಸಿದ್ಧ ರೆಡ್ ಲೈಟ್ ಡಿಸ್ಟ್ರಿಕ್ಟ್ ಪ್ರದೇಶದ ಭಾರಿ ಜನದಟ್ಟಣೆಯನ್ನು ಕಡಿಮೆ ಮಾಡಲು ಮತ್ತು ಸೆಕ್ಸ್ ವರ್ಕರ್ಸ್‌ಗಳ ಸುರಕ್ಷತೆಗಾಗಿ ಜೂಯಿಡ್ ಬಿಸಿನೆಸ್ ಜಿಲ್ಲೆಯ ಬಳಿ ಬೃಹತ್ ಬಹುಮಹಡಿ ಎರೊಟಿಕ್ ಸೆಂಟರ್ ನಿರ್ಮಿಸಲು ಯೋಜಿಸಲಾಗಿತ್ತು. ಆದರೆ ಸ್ಥಳೀಯ ನಿವಾಸಿಗಳ ಭಾರಿ ಪ್ರತಿರೋಧದ ಹಿನ್ನೆಲೆಯಲ್ಲಿ ಈ ಯೋಜನೆಯನ್ನು ಕೈಬಿಡಲಾಗಿದ್ದು, ಅದರ ಬದಲು ಸಣ್ಣ ಮಟ್ಟದ ಸ್ಥಳೀಯ ಉಪಕ್ರಮಗಳ ಮೂಲಕ ಸಮಸ್ಯೆ ಪರಿಹರಿಸಲು ನಿರ್ಧರಿಸಲಾಗಿದೆ.

ಈ ಹೊಸ ಪ್ರವಾಸೋದ್ಯಮ ನೀತಿಗಳ ಜಾರಿಯಿಂದಾಗಿ ಭಾರತ ಸೇರಿದಂತೆ ಜಾಗತಿಕ ಮಟ್ಟದ ಪ್ರವಾಸಿಗರು ಆಮ್‌ಸ್ಟರ್‌ಡಮ್‌ ಪ್ರವಾಸವನ್ನು ಯೋಜಿಸುವಾಗ ತಮ್ಮ ಬಜೆಟ್ ಅನ್ನು ಗಣನೀಯವಾಗಿ ಹೆಚ್ಚಿಸಿಕೊಳ್ಳಬೇಕಾಗುತ್ತದೆ. ಯುರೋಪ್‌ನ ಇತಿಹಾಸದಲ್ಲೇ ಅತ್ಯಂತ ಮಹತ್ವಾಕಾಂಕ್ಷೆಯ ಮತ್ತು ಕಠಿಣವಾದ ಈ ಪ್ರವಾಸೋದ್ಯಮ ಸುಧಾರಣಾ ಮಸೂದೆಯನ್ನು ಮುಂಬರುವ ಜೂನ್ 10ರ ನಗರ ಸಭೆಯ ಸಭೆಯಲ್ಲಿ ಚರ್ಚಿಸಿ ಅಧಿಕೃತವಾಗಿ ಅಂತಿಮಗೊಳಿಸಲಾಗುವುದು.