ರಾಜಸ್ಥಾನಕ್ಕೆ 61.99 ಮಿಲಿಯನ್‌ ಪ್ರವಾಸಿಗರ ಭೇಟಿ

ಭಾರತದ ಅತ್ಯಂತ ಜನಪ್ರಿಯ ಸಾಂಸ್ಕೃತಿಕ ಪ್ರವಾಸಿ ತಾಣವಾದ ರಾಜಸ್ಥಾನದ ಪ್ರವಾಸೋದ್ಯಮ ಕ್ಷೇತ್ರವು ಪ್ರಸಕ್ತ ವರ್ಷದ ಆರಂಭದಲ್ಲೇ ಅಭೂತಪೂರ್ವ ಮೈಲಿಗಲ್ಲನ್ನು ಸಾಧಿಸಿದೆ. 2026ರ ಮೊದಲ ತ್ರೈಮಾಸಿಕದಲ್ಲಿ ಬರೋಬ್ಬರಿ 6.19 ಕೋಟಿಗೂ ಹೆಚ್ಚು ದೇಶೀಯ ಮತ್ತು ಜಾಗತಿಕ ಪ್ರವಾಸಿಗರು ರಾಜಸ್ಥಾನಕ್ಕೆ ಭೇಟಿ ನೀಡುವ ಮೂಲಕ ಸಾರ್ವಕಾಲಿಕ ಹೊಸ ದಾಖಲೆ ನಿರ್ಮಾಣವಾಗಿದೆ. ರಾಜ್ಯ ಸರಕಾರದ ಸುಧಾರಿತ ಪ್ರವಾಸೋದ್ಯಮ ನೀತಿಗಳು ಮತ್ತು ಜಾಗತಿಕ ಮಟ್ಟದ ಪ್ರಚಾರ ಅಭಿಯಾನಗಳು ಈ ಭಾರಿ ಯಶಸ್ಸಿಗೆ ಪ್ರಮುಖ ಕಾರಣವಾಗಿವೆ.

ಇದನ್ನೂ ಓದಿ: ‘ಹೀಲ್ ಇನ್ ರಾಜಸ್ಥಾನ’ ನೀತಿಯಿಂದ ಜಾಗತಿಕ ಗುರಿ

ಒಟ್ಟು ಪ್ರವಾಸಿಗರ ಪೈಕಿ ಸಿಂಹಪಾಲು ಭಾರತದ ವಿವಿಧ ರಾಜ್ಯಗಳಿಂದ ಬಂದ ದೇಶೀಯ ಪ್ರವಾಸಿಗರದ್ದಾಗಿದೆ. ವೀಕೆಂಡ್ ಪ್ರವಾಸೋದ್ಯಮ ಮತ್ತು ಧಾರ್ಮಿಕ ಪ್ರವಾಸೋದ್ಯಮದ ಬೆಳವಣಿಗೆ ಇದಕ್ಕೆ ಭಾರಿ ಬಲ ನೀಡಿದೆ. ಕೋವಿಡ್ ನಂತರದ ದಿನಗಳಲ್ಲಿ ಜಾಗತಿಕ ಪ್ರಯಾಣಿಕರ ಸಂಖ್ಯೆ ಸುಧಾರಿಸುತ್ತಿದ್ದು, ಯುರೋಪ್, ಅಮೆರಿಕ ಮತ್ತು ಮಧ್ಯಪ್ರಾಚ್ಯ ದೇಶಗಳಿಂದ ಲಕ್ಷಾಂತರ ವಿದೇಶಿ ಪ್ರವಾಸಿಗರು ರಾಜಸ್ಥಾನದ ಕೋಟೆ ಹಾಗೂ ಅರಮನೆಗಳನ್ನು ನೋಡಲು ಆಗಮಿಸಿದ್ದಾರೆ.

ಜೈಪುರ, ಉದಯಪುರ, ಜೋಧ್‌ಪುರ ಮತ್ತು ಜೈಸಲ್ಮೇರ್‌ನ ಮರುಭೂಮಿ ತಾಣಗಳು ಎಂದಿನಂತೆ ಪ್ರವಾಸಿಗರ ಮೊದಲ ಆಯ್ಕೆಯಾಗಿ ಮುಂದುವರಿದಿವೆ. ಈ ತ್ರೈಮಾಸಿಕದಲ್ಲಿ ನಡೆದ ಜೈಪುರ ಸಾಹಿತ್ಯ ಉತ್ಸವ, ಜೈಸಲ್ಮೇರ್ ಮರುಭೂಮಿ ಉತ್ಸವ ಮತ್ತು ಪುಷ್ಕರ್ ಪ್ರವಾಸೋದ್ಯಮ ಚಟುವಟಿಕೆಗಳು ಜಾಗತಿಕ ಪ್ರವಾಸಿಗರನ್ನು ದೊಡ್ಡ ಸಂಖ್ಯೆಯಲ್ಲಿ ಆಕರ್ಷಿಸಿವೆ.

ರಣಥಂಬೋರ್ ಮತ್ತು ಸರಿಸ್ಕಾ ರಾಷ್ಟ್ರೀಯ ಉದ್ಯಾನವನಗಳಲ್ಲಿ ಹುಲಿ ಸಫಾರಿಗಾಗಿ ಬುಕಿಂಗ್‌ಗಳು ದಾಖಲೆ ಮಟ್ಟದಲ್ಲಿ ಭರ್ತಿಯಾಗಿದ್ದವು. ಈ ದಾಖಲೆ ಮಟ್ಟದ ಪ್ರವಾಸಿಗರ ಆಗಮನವು ರಾಜಸ್ಥಾನದ ಸ್ಥಳೀಯ ಆರ್ಥಿಕತೆಗೆ ಬೂಸ್ಟರ್ ಡೋಸ್ ನೀಡಿದೆ.

ಈ ಐತಿಹಾಸಿಕ ಸಾಧನೆಯ ಕುರಿತು ಹರ್ಷ ವ್ಯಕ್ತಪಡಿಸಿರುವ ರಾಜಸ್ಥಾನ ಪ್ರವಾಸೋದ್ಯಮ ಇಲಾಖೆಯ ಹಿರಿಯ ಅಧಿಕಾರಿಗಳು, ʼರಾಜಸ್ಥಾನದ ಪಧಾರೋ ಮ್ಹಾರೆ ದೇಶ್ ಆತಿಥ್ಯದ ಪರಂಪರೆಗೆ ಜಾಗತಿಕವಾಗಿ ಸಿಕ್ಕ ದೊಡ್ಡ ಮನ್ನಣೆ ಇದಾಗಿದೆ. ಮುಂದಿನ ದಿನಗಳಲ್ಲಿ ಪ್ರವಾಸಿಗರ ಸುರಕ್ಷತೆ, ತಂತ್ರಜ್ಞಾನ ಆಧಾರಿತ ಗೈಡ್ ಸೌಲಭ್ಯಗಳು ಮತ್ತು ಸುಸ್ಥಿರ ಪರಿಸರ ಪ್ರವಾಸೋದ್ಯಮಕ್ಕೆ ಹೆಚ್ಚಿನ ಆದ್ಯತೆ ನೀಡುವ ಮೂಲಕ ಈ ವೇಗವನ್ನು ಕಾಯ್ದುಕೊಳ್ಳಲಾಗುವುದುʼ ಎಂದು ತಿಳಿಸಿದ್ದಾರೆ.