ಗಂಡಸರೇ ಅಪರೂಪವಾಗಿರುವ ಈ ಊರಲ್ಲಿ ಅಂದಗಾತಿಯರದೇ ಅಧಿಪತ್ಯ!

ನಾನು ಕೆಲವು ವರ್ಷಗಳ ಹಿಂದೆ ಬೋಸ್ನಿಯಾ ಮತ್ತು ಹರ್ಜೆಗೋವಿನಾದ ‘ಬಂಜಾ ಲೂಕಾ’ ಎಂಬ ನಗರಕ್ಕೆ ಹೋಗಿದ್ದೆ. ರಾಜಧಾನಿ ಸರಜೇವೋ ನಂತರ, ಇದು ಆ ದೇಶದ ಎರಡನೆಯ ಅತಿದೊಡ್ಡ ನಗರ. ತನ್ನ ನೈಸರ್ಗಿಕ ಸೌಂದರ್ಯ ಮತ್ತು ಐತಿಹಾಸಿಕ ಸ್ಮಾರಕಗಳಿಗಿಂತ ಹೆಚ್ಚಾಗಿ ವಿಶ್ವದಾದ್ಯಂತ ಚರ್ಚೆಯಾಗುವುದು ಅಲ್ಲಿನ ವಿಶಿಷ್ಟ ಜನಸಂಖ್ಯಾ ಅನುಪಾತದಿಂದಾಗಿ. ಈ ನಗರಕ್ಕೆ ಹತ್ತಿಕೊಂಡಿರುವ 'ಹೆಣ್ಣುಮಕ್ಕಳ ನಗರ' (City of Women) ಎಂಬ ಹೆಸರು ಕೇವಲ ಪ್ರವಾಸೋದ್ಯಮದ ಆಕರ್ಷಣೆಯಲ್ಲ, ಬದಲಿಗೆ ಅಲ್ಲಿನ ಕಹಿ ಇತಿಹಾಸ ಮತ್ತು ಸಾಂಸ್ಕೃತಿಕ ಹೆಮ್ಮೆಯ ಸಂಕೇತವೂ ಹೌದು. ಕಾರಣ ಆ ನಗರದಲ್ಲಿ ಗಂಡಸರೇ ಅಪರೂಪ. ಎಲ್ಲಿ ನೋಡಿದರೂ ಮಹಿಳೆಯರೇ!

ಸೋಜಿಗದ ಸಂಗತಿಯೆಂದರೆ, ಬಂಜಾ ಲೂಕಾದಲ್ಲಿ ಪುರುಷರಿಗಿಂತ ಮಹಿಳೆಯರ ಸಂಖ್ಯೆ ಏಳು ಪಟ್ಟು ಹೆಚ್ಚಿದೆ. ಈ ಅಸಮತೋಲನಕ್ಕೆ ಮುಖ್ಯ ಕಾರಣ 1990ರ ದಶಕದಲ್ಲಿ ನಡೆದ ಭೀಕರ ಬೋಸ್ನಿಯನ್ ಯುದ್ಧ. ಆ ಸಮಯದಲ್ಲಿ ನಡೆದ ಜನಾಂಗೀಯ ಸಂಘರ್ಷಗಳಲ್ಲಿ ಸಾವಿರಾರು ಪುರುಷರು ಪ್ರಾಣ ಕಳೆದುಕೊಂಡರು ಅಥವಾ ದೇಶ ಬಿಟ್ಟು ಓಡಿಹೋದರು. ಯುದ್ಧದ ನಂತರ ನಗರದಲ್ಲಿ ಉಳಿದವರು ಬಹುತೇಕ ಮಹಿಳೆಯರು, ವೃದ್ಧರು ಮತ್ತು ಮಕ್ಕಳು ಮಾತ್ರ.

ನಗರದ ಕಾಫಿ ಹೌಸ್‌ಗಳು, ಮಾರುಕಟ್ಟೆಗಳು ಮತ್ತು ಕಚೇರಿಗಳಲ್ಲಿ ಮಹಿಳೆಯರೇ ಬಹುಸಂಖ್ಯಾತರಾಗಿ ಕಾಣಸಿಗುತ್ತಾರೆ. ಇದು ಕೇವಲ ಅಂಕಿ-ಅಂಶವಾಗಿ ಉಳಿಯದೇ, ನಗರದ ಆತ್ಮವನ್ನೇ ಬದಲಿಸಿತು.

ಇದನ್ನೂ ಓದಿ: ಸೋಷಿಯಲ್ ಮೀಡಿಯಾ ಪ್ರವಾಸ: ಮರೆಯಾಗುತ್ತಿದೆ ಪ್ರಕೃತಿಯ ಸಹವಾಸ!

ಪುರುಷರ ಅನುಪಸ್ಥಿತಿಯಲ್ಲಿ ಅಥವಾ ಕಡಿಮೆ ಸಂಖ್ಯೆಯ ಕಾರಣದಿಂದ, ಬಂಜಾ ಲೂಕಾದ ಮಹಿಳೆಯರು ಅನಿವಾರ್ಯವಾಗಿ ಮನೆಯ ಜವಾಬ್ದಾರಿಯ ಜತೆಗೆ ಸಮಾಜದ ಚುಕ್ಕಾಣಿಯನ್ನೂ ಹಿಡಿದರು. ಇಲ್ಲಿನ ಸರಕಾರಿ ಕಚೇರಿಗಳಿಂದ ಹಿಡಿದು ಬ್ಯಾಂಕುಗಳವರೆಗೆ, ಶಿಕ್ಷಣ ಸಂಸ್ಥೆಗಳಿಂದ ಹಿಡಿದು ಉದ್ಯಮಗಳವರೆಗೆ ಮಹಿಳೆಯರೇ ಪ್ರಮುಖ ಪಾತ್ರ ವಹಿಸುವುದನ್ನು ಕಾಣಬಹುದು. ಸಂಪ್ರದಾಯವಾದಿ ಸಮಾಜಗಳಲ್ಲಿ ಪುರುಷರು ತೆಗೆದುಕೊಳ್ಳುವ ನಿರ್ಧಾರಗಳನ್ನು ಇಲ್ಲಿ ಮಹಿಳೆಯರು ಸಮರ್ಥವಾಗಿ ನಿಭಾಯಿಸುತ್ತಾ ಬಂದಿದ್ದಾರೆ. ಇದು ನಗರದ ಆರ್ಥಿಕತೆಯನ್ನು ಸ್ಥಿರವಾಗಿಡಲು ಸಹಾಯ ಮಾಡಿತು.

ಬಂಜಾ ಲೂಕಾವನ್ನು 'ಸುಂದರಿಯರ ನಗರ' ಎಂದು ಕರೆಯಲು ಕೇವಲ ಅವರ ಬಾಹ್ಯ ರೂಪ ಕಾರಣವಲ್ಲ. ಇಲ್ಲಿನ ಮಹಿಳೆಯರು ಶಿಕ್ಷಣ, ಕಲೆ ಮತ್ತು ಫ್ಯಾಷನ್‌ನಲ್ಲಿ ಬಹಳ ಮುಂಚೂಣಿಯಲ್ಲಿದ್ದಾರೆ. ಯುರೋಪಿನ ಅತ್ಯಂತ ಸುಸಂಸ್ಕೃತ ನಗರಗಳಲ್ಲಿ ಇದೂ ಒಂದು ಎನಿಸಿಕೊಳ್ಳಲು ಇಲ್ಲಿನ ಮಹಿಳೆಯರ ಕೊಡುಗೆ ಅಪಾರ. ನಗರದ ಬೀದಿಗಳಲ್ಲಿ ನಡೆಯುವಾಗ ಅವರ ಆತ್ಮವಿಶ್ವಾಸ ಮತ್ತು ಸಂಸ್ಕೃತಿಯ ಪ್ರಜ್ಞೆ ಎದ್ದು ಕಾಣುತ್ತದೆ.

ಇತ್ತೀಚಿನ ವರ್ಷಗಳಲ್ಲಿ ಜನಸಂಖ್ಯಾ ಅನುಪಾತವು ಸ್ವಲ್ಪಮಟ್ಟಿಗೆ ಸುಧಾರಿಸಿದೆ (ಅಂದರೆ ಪುರುಷರ ಸಂಖ್ಯೆ ಅಲ್ಪ ಪ್ರಮಾಣದಲ್ಲಿ ಏರಿಕೆಯಾಗಿದೆ). ಆದರೆ, 'ಸಿಟಿ ಆಫ್ ವುಮೆನ್' ಎಂಬ ಬಿರುದು ಮಾತ್ರ ಹಾಗೆಯೇ ಉಳಿದಿದೆ. ಇಲ್ಲಿನ ಮಹಿಳೆಯರು ತಮ್ಮ ನಗರವನ್ನು ಪ್ರೀತಿಸುತ್ತಾರೆ ಮತ್ತು ಪುರುಷ ಪ್ರಧಾನ ಪ್ರಪಂಚದ ನಡುವೆಯೂ ಒಂದು ನಗರ ಹೇಗೆ ಸ್ತ್ರೀ-ಕೇಂದ್ರಿತವಾಗಿ ಯಶಸ್ವಿಯಾಗಿ ಬೆಳೆಯಬಲ್ಲದು ಎಂಬುದಕ್ಕೆ ಮಾದರಿಯಾಗಿದ್ದಾರೆ.

ಪ್ರವಾಸಿಗರಿಗೆ ಬಂಜಾ ಲೂಕಾ ಕೇವಲ ಒಂದು ಪ್ರೇಕ್ಷಣೀಯ ಸ್ಥಳವಲ್ಲ, ಅದೊಂದು ಜೀವನ ಪಾಠ. ಕಷ್ಟಕಾಲದಲ್ಲಿ ಮಹಿಳೆಯರು ಹೇಗೆ ಒಂದು ಸಮಾಜವನ್ನು ಕಟ್ಟಿ ಬೆಳೆಸುತ್ತಾರೆ ಎಂಬುದಕ್ಕೆ ಈ ನಗರ ಸಾಕ್ಷಿ. ಇಲ್ಲಿನ ಹಸಿರು ರಸ್ತೆಗಳು, ವ್ರ್ಬಾಸ್ ನದಿಯ ತಂಪು ಗಾಳಿ ಮತ್ತು ಹಸನ್ಮುಖಿ ಮಹಿಳೆಯರ ಆತಿಥ್ಯ ಯಾವುದೇ ಪ್ರವಾಸಿಯನ್ನು ಮಂತ್ರಮುಗ್ಧಗೊಳಿಸುತ್ತದೆ.

ಸಾಮಾನ್ಯವಾಗಿ ಯುರೋಪಿನ ಹಲವು ನಗರಗಳಲ್ಲಿ ಕೆಫೆಗಳು ಪುರುಷರಿಂದ ತುಂಬಿರುತ್ತವೆ. ಆದರೆ ಬಂಜಾ ಲೂಕಾದಲ್ಲಿ ಚಿತ್ರಣವೇ ಬೇರೆ. ಇಲ್ಲಿನ ನೂರಾರು ಕೆಫೆಗಳಲ್ಲಿ ಹರಟೆ ಹೊಡೆಯುತ್ತಾ, ಕಾಫಿ ಸವಿಯುತ್ತಾ ಕುಳಿತುಕೊಳ್ಳುವವರಲ್ಲಿ ಮಹಿಳೆಯರೇ ಹೆಚ್ಚು. ರಾಜಕೀಯದಿಂದ ಹಿಡಿದು ಸಾಹಿತ್ಯದವರೆಗೆ ಗಂಭೀರ ಚರ್ಚೆ ನಡೆಸುವ ಮಹಿಳಾ ಗುಂಪುಗಳು ಇಲ್ಲಿ ಸಾಮಾನ್ಯ. ವಿಶ್ವದ ಅನೇಕ ನಗರಗಳಲ್ಲಿ ಮಹಿಳೆಯರು ರಾತ್ರಿ ಹೊತ್ತು ಓಡಾಡಲು ಭಯಪಡುತ್ತಾರೆ. ಆದರೆ ಬಂಜಾ ಲೂಕಾ ಮಹಿಳೆಯರಿಗೆ ಅತ್ಯಂತ ಸುರಕ್ಷಿತ ನಗರ. ಮಹಿಳೆಯರೇ ಬಹುಸಂಖ್ಯಾತರಾಗಿರುವುದರಿಂದ ಮತ್ತು ಸಮಾಜದಲ್ಲಿ ಅವರಿಗೆ ಹೆಚ್ಚಿನ ಗೌರವ ಇರುವುದರಿಂದ, ಮಧ್ಯರಾತ್ರಿಯಲ್ಲೂ ಮಹಿಳೆಯರು ಯಾವುದೇ ಆತಂಕವಿಲ್ಲದೆ ಇಲ್ಲಿನ ಬೀದಿಗಳಲ್ಲಿ ಸಂಚರಿಸುತ್ತಾರೆ.

ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡಿದಾಗ ಗಮನಿಸುವ ಒಂದು ಅಂಶವೆಂದರೆ ಇಲ್ಲಿನ ಆತಿಥ್ಯ. ಹೊಟೇಲ್‌ಗಳು, ಹೋಮ್‌ಸ್ಟೇಗಳು ಮತ್ತು ರೆಸ್ಟೋರೆಂಟ್‌ಗಳನ್ನು ಮುನ್ನಡೆಸುವ ಮಹಿಳೆಯರು ಪ್ರವಾಸಿಗರನ್ನು ತಮ್ಮ ಮನೆಯ ಅತಿಥಿಗಳಂತೆ ನಡೆಸಿಕೊಳ್ಳುತ್ತಾರೆ. ಸ್ಥಳೀಯವಾಗಿ ಪುರುಷರ ಕೊರತೆ ಎದುರಾದಾಗ, ಬಂಜಾ ಲೂಕಾದ ಮಹಿಳೆಯರು ಇತರ ನಗರಗಳ ಅಥವಾ ಇತರ ದೇಶಗಳ ಪುರುಷರನ್ನು ಮದುವೆಯಾಗಲು ಆಸಕ್ತಿ ತೋರತೊಡಗಿದರು. ಪ್ರವಾಸೋದ್ಯಮ ಬೆಳೆದಂತೆ, ವಿದೇಶಿ ಪ್ರವಾಸಿಗರನ್ನು ಮದುವೆಯಾಗಿ ಹೊರದೇಶಗಳಿಗೆ ನೆಲೆಸಲು ಹೋದವರ ಸಂಖ್ಯೆಯೂ ಗಮನಾರ್ಹವಾಗಿದೆ. ಈ ನಗರದಲ್ಲಿ ಪುರುಷರಿಗೆ ಭಾರೀ ಬೇಡಿಕೆ. ಅನೇಕ ಮಹಿಳೆಯರಿಗೆ ವಿವಾಹಕ್ಕೆ ಪುರುಷರು ಸಿಗದಿರುವುದು ಅಲ್ಲಿನ ಸಮಾಜದಲ್ಲಿ ಹಲವು ಸಾಮಾಜಿಕ ಸಮಸ್ಯೆಗೂ ಕಾರಣವಾಗಿವೆ.

ಇಲ್ಲಿನ ಮಹಿಳೆಯರು ಅತ್ಯಂತ ಸ್ವಾವಲಂಬಿಗಳು. ಕೇವಲ ಮದುವೆಯಾಗಬೇಕೆಂಬ ಕಾರಣಕ್ಕೆ ತಮಗಿಂತ ಕಡಿಮೆ ಅರ್ಹತೆಯ ಅಥವಾ ತಮಗೆ ಸರಿಹೊಂದದ ಪುರುಷನನ್ನು ಮದುವೆಯಾಗಲು ಇವರು ಇಷ್ಟಪಡುವುದಿಲ್ಲ. ಪುರುಷರಿಲ್ಲದಿದ್ದರೂ ಘನತೆಯಿಂದ ಬದುಕಬಲ್ಲೆವು ಎಂಬುದನ್ನು ಅವರು ಸಾಬೀತುಪಡಿಸಿದ್ದಾರೆ. ಹೀಗಾಗಿ, ಮದುವೆಯಾಗದೆ ಒಂಟಿಯಾಗಿ (Single) ಉಳಿಯುವ ನಿರ್ಧಾರವನ್ನು ಇಲ್ಲಿನ ಸಮಾಜದಲ್ಲಿ ಗೌರವದಿಂದಲೇ ನೋಡಲಾಗುತ್ತದೆ. ಪುರುಷರ ಸಂಖ್ಯಾ ಕೊರತೆಯು ಅವರಿಗೆ ಸವಾಲೊಡ್ಡಿದ್ದರೂ, ಅದು ಅವರನ್ನು ದುರ್ಬಲರನ್ನಾಗಿ ಮಾಡುವ ಬದಲು ಮತ್ತಷ್ಟು ಶಕ್ತಿಯುತರನ್ನಾಗಿ ಮತ್ತು ಸ್ವತಂತ್ರರನ್ನಾಗಿ ಮಾಡಿದೆ.

ಕುಚಿಂಗ್ ಎಂಬ ಮಾರ್ಜಾಲ ನಗರಿ

ಕೆಲ ವರ್ಷಗಳ ಹಿಂದೆ, ನಾನು ಮಲೇಷಿಯಾದ ಸಾರವಾಕ್ ಪ್ರಾಂತ್ಯದ ರಾಜಧಾನಿಯಾದ ಕುಚಿಂಗ್ ಎಂಬ ಊರಿಗೆ ಹೋಗಿದ್ದೆ. ಆ ಊರಿನಲ್ಲಿ ಹೋಗುತ್ತಿರುವಂತೆ ನಿಮ್ಮನ್ನು ಸ್ವಾಗತಿಸುವುದು ಬೆಕ್ಕಿನ ದೊಡ್ಡ ಗೊಂಬೆ. ಮೊದಲ ಬಾರಿಗೆ ಅದನ್ನು ನೋಡಿದಾಗ, ನಿಮಗೆ ಏನೂ ಅನಿಸುವುದಿಲ್ಲ. ಆದರೆ ಊರೊಳಗೆ ಹೋಗುವಾಗ ಎಲ್ಲೆಡೆ ವಿವಿಧ ಬಗೆಯ ಬೆಕ್ಕಿನ ಪ್ರತಿಮೆ, ಕಟೌಟ್, ಬೆರ್ಚಪ್ಪಗಳನ್ನೂ ನೋಡಿದಾಗ ಆಶ್ಚರ್ಯವೆನಿಸದೇ ಇರದು. ಬೇರೆ ಪ್ರಾಣಿ, ವ್ಯಕ್ತಿಗಳ ಬದಲು, ಬೆಕ್ಕಿಗೆ ಮಾತ್ರ ಪ್ರಾಧಾನ್ಯವೇಕೆ ಎಂಬ ಪ್ರಶ್ನೆ ಸುಳಿಯಲಾರಂಭಿಸುತ್ತದೆ.

ಅಸಲಿ ಸಂಗತಿ ಅಂದ್ರೆ ಮಲಯ್ ಭಾಷೆಯಲ್ಲಿ 'ಕುಚಿಂಗ್' ಎಂದರೆ ಬೆಕ್ಕು ಎಂದರ್ಥ. ನಗರದ ಹೆಸರಿಗೆ ತಕ್ಕಂತೆ ಇಲ್ಲಿ ಬೆಕ್ಕುಗಳದ್ದೇ ಸಾಮ್ರಾಜ್ಯ!

ಕುಚಿಂಗ್ ನಗರಕ್ಕೆ ಈ ಹೆಸರು ಹೇಗೆ ಬಂತು ಎನ್ನುವುದರ ಹಿಂದೆ ಹಲವು ಸ್ವಾರಸ್ಯಕರ ಕಥೆಗಳಿವೆ. ಸುಮಾರು 1839ರಲ್ಲಿ ಬ್ರಿಟಿಷ್ ಪರಿಶೋಧಕ ಜೇಮ್ಸ್ ಬ್ರೂಕ್ ಈ ನಗರಕ್ಕೆ ಬಂದಾಗ, ಸ್ಥಳೀಯರನ್ನು ಈ ಜಾಗದ ಹೆಸರೇನು ಎಂದು ಕೇಳಿದನಂತೆ. ಆತ ಕೈ ತೋರಿಸಿದ ದಿಕ್ಕಿನಲ್ಲಿ ಒಂದು ಬೆಕ್ಕು ಕುಳಿತಿತ್ತು, ಸ್ಥಳೀಯರು ಆತ ಬೆಕ್ಕನ್ನು ಕೇಳುತ್ತಿದ್ದಾನೆಂದು ಭಾವಿಸಿ 'ಕುಚಿಂಗ್' (ಬೆಕ್ಕು) ಎಂದು ಉತ್ತರಿಸಿದರು. ಅಲ್ಲಿಂದ ಈ ನಗರಕ್ಕೆ ಕುಚಿಂಗ್ ಎಂಬ ಹೆಸರು ಸ್ಥಿರವಾಯಿತು ಎಂಬುದು ಜನಪ್ರಿಯ ಕಥೆ. ಮತ್ತೊಂದು ವಾದದ ಪ್ರಕಾರ, ಈ ಭಾಗದಲ್ಲಿ ಹಿಂದೆ 'ಮಾಟಾ ಕುಚಿಂಗ್' ಎಂಬ ಹಣ್ಣಿನ ಮರಗಳು ಹೇರಳವಾಗಿದ್ದವು, ಆದ್ದರಿಂದ ಈ ಹೆಸರು ಬಂದಿದೆ ಎನ್ನಲಾಗುತ್ತದೆ. ಕಾರಣ ಯಾವುದಾದರೂ ಇರಲಿ, ಇಂದು ಕುಚಿಂಗ್ ನಗರವು ತನ್ನ ಹೆಸರನ್ನು ಅನ್ವಯಿಸಿಕೊಳ್ಳುವಲ್ಲಿ ಸಂಪೂರ್ಣ ಯಶಸ್ವಿಯಾಗಿದೆ.

ನಗರದ ಒಳಗೆ ಕಾಲಿಡುತ್ತಿದ್ದಂತೆ ನಮಗೆ ಎದುರಾಗುವುದು ಬೃಹತ್ ಗಾತ್ರದ ಬೆಕ್ಕುಗಳ ಪ್ರತಿಮೆಗಳು. ನಗರದ ಪ್ರಮುಖ ವೃತ್ತಗಳಲ್ಲಿ (Circle), ಚೌಕಗಳಲ್ಲಿ ಬೆಕ್ಕುಗಳು ವಿವಿಧ ಭಂಗಿಯಲ್ಲಿ ನಿಂತು ಪ್ರವಾಸಿಗರನ್ನು ಸ್ವಾಗತಿಸುತ್ತವೆ. ಈ ಪ್ರತಿಮೆಗಳು ಕೇವಲ ಅಲಂಕಾರಿಕ ವಸ್ತುಗಳಲ್ಲ, ಇವು ಕುಚಿಂಗ್ ನಗರದ ಹೆಮ್ಮೆಯ ಗುರುತುಗಳು. ಹಬ್ಬಗಳ ಸಮಯದಲ್ಲಿ ಈ ಪ್ರತಿಮೆಗಳಿಗೆ ಸಾಂಪ್ರದಾಯಿಕ ಉಡುಗೆಗಳನ್ನು ತೊಡಿಸಿ ಅಲಂಕರಿಸುವುದು ಇಲ್ಲಿನ ವಿಶೇಷ. ಇಲ್ಲಿನ ಜನರು ಬೆಕ್ಕುಗಳನ್ನು ಅದೃಷ್ಟದ ಸಂಕೇತವೆಂದು ನಂಬುತ್ತಾರೆ. ನೀವು ನಗರದ ಯಾವುದೇ ರಸ್ತೆಯಲ್ಲಿ ನಡೆದರೂ ಒಂದಲ್ಲ ಒಂದು ಸುಂದರ ಬೆಕ್ಕಿನ ಶಿಲ್ಪ ಅಥವಾ ಚಿತ್ರಕಲೆ ನಿಮ್ಮ ಕಣ್ಣಿಗೆ ಬೀಳುತ್ತದೆ.

ಕುಚಿಂಗ್ ನಗರದ ಮತ್ತೊಂದು ಪ್ರಮುಖ ಆಕರ್ಷಣೆ ಎಂದರೆ ಅಲ್ಲಿನ 'ಕ್ಯಾಟ್ ಮ್ಯೂಸಿಯಂ'. ಈ ರೀತಿಯ ಮ್ಯೂಸಿಯಂ ಜಗತ್ತಿನಲ್ಲೇ ಮೊದಲನೆಯದು. ಇಲ್ಲಿ ಸುಮಾರು 4,000ಕ್ಕೂ ಹೆಚ್ಚು ಪ್ರದರ್ಶನ ವಸ್ತುಗಳಿವೆ. ಬೆಕ್ಕುಗಳಿಗೆ ಸಂಬಂಧಿಸಿದ ಪುರಾತನ ಈಜಿಪ್ಟ್‌ನ ಮಮ್ಮಿಗಳು, ಚೀನಾದ ಬೆಕ್ಕಿನ ಕಲಾಕೃತಿಗಳು, ಜಪಾನಿನ 'ಮನೆಕಿ-ನೆಕೊ' ಗೊಂಬೆಗಳು ಹೀಗೆ ಹತ್ತು ಹಲವು ವಸ್ತುಗಳನ್ನು ಇಲ್ಲಿ ಸಂಗ್ರಹಿಸಿಡಲಾಗಿದೆ. ಬೆಕ್ಕುಗಳಿಗೂ ಮಾನವ ಇತಿಹಾಸಕ್ಕೂ ಇರುವ ಸಂಬಂಧ, ವಿಜ್ಞಾನದಲ್ಲಿ ಬೆಕ್ಕುಗಳ ಪಾತ್ರ, ಮತ್ತು ಜನಪ್ರಿಯ ಚಲನಚಿತ್ರಗಳಲ್ಲಿನ (ಉದಾಹರಣೆಗೆ ಗಾರ್ಫೀಲ್ಡ್, ಹಲೋ ಕಿಟ್ಟಿ) ಬೆಕ್ಕುಗಳ ಪಾತ್ರಗಳ ಬಗ್ಗೆ ಇಲ್ಲಿ ಸಮಗ್ರ ಮಾಹಿತಿ ಇದೆ. ಈ ಮ್ಯೂಸಿಯಂ ಬೆಕ್ಕುಗಳ ಬಗ್ಗೆ ಸಂಶೋಧನೆ ಮಾಡುವವರಿಗೂ ಒಂದು ಜ್ಞಾನಕೋಶದಂತಿದೆ.

ಕುಚಿಂಗ್ ನಗರದ ಸೌಂದರ್ಯವನ್ನು ಸಾರವಾಕ್ ನದಿ ಇಮ್ಮಡಿಗೊಳಿಸಿದೆ. ನದಿಯ ದಂಡೆಯ ಮೇಲೆ ನಿರ್ಮಿಸಲಾದ 'ವಾಟರ್ ಫ್ರಂಟ್' ಸಂಜೆಯ ವಿಹಾರಕ್ಕೆ ಅತ್ಯುತ್ತಮ ಜಾಗ. ಇಲ್ಲಿನ ಸಣ್ಣ ದೋಣಿಗಳಲ್ಲಿ ಕುಳಿತು ನದಿಯ ಒಂದು ದಂಡೆಯಿಂದ ಇನ್ನೊಂದು ದಂಡೆಗೆ ಸಾಗುವ ಅನುಭವ ರೋಮಾಂಚನಕಾರಿ. ನದಿಯ ಮೇಲಿರುವ ಆಧುನಿಕ ವಿನ್ಯಾಸದ 'ದಾರುಲ್ ಹನಾ' ಸೇತುವೆ ಮತ್ತು ರಾತ್ರಿಯ ಬೆಳಕಿನಲ್ಲಿ ಹೊಳೆಯುವ ಸಂಸತ್ ಭವನದ ಚಾವಣಿ ನಗರದ ಆಧುನಿಕತೆಗೆ ಸಾಕ್ಷಿ.

ಕುಚಿಂಗ್ ನಗರವು ವಿಶ್ವದ ಅತ್ಯಂತ ಹಳೆಯ ಮಳೆಕಾಡುಗಳಿಗೆ ಹತ್ತಿರದಲ್ಲಿದೆ. ಇಲ್ಲಿನ 'ಸೆಮೆಂಗೋಹ್ ವನ್ಯಜೀವಿ ಕೇಂದ್ರ' ಅಳಿವಿನಂಚಿನಲ್ಲಿರುವ ಒರಾಂಗುಟನ್‌ಗಳಿಗೆ ಪ್ರಸಿದ್ಧ. ನಗರದಿಂದ ಕೇವಲ ಅರ್ಧ ಗಂಟೆಯ ಪ್ರಯಾಣದಲ್ಲಿ ನೀವು ಈ ಕಾಡಿನ ಮನುಷ್ಯರನ್ನು ಅತ್ಯಂತ ಹತ್ತಿರದಿಂದ ನೋಡಬಹುದು.

ಕಾರ್ಟೂನ್ ಪಾತ್ರಧಾರಿಗೊಂದು ರಸ್ತೆ!

ಪೋಲೆಂಡ್‌ನ ರಾಜಧಾನಿ ವಾರ್ಸಾದಲ್ಲಿ ಅನೇಕ ಗಂಭೀರ ಐತಿಹಾಸಿಕ ಸ್ಮಾರಕಗಳ ನಡುವೆ ಮುಗುಳ್ನಗೆ ಬೀರುವಂಥ ಒಂದು ತಮಾಷೆಯ ಮತ್ತು ವಿಶಿಷ್ಟವಾದ ಫಲಕವಿದೆ. ಈ ನಗರದ ಮಧ್ಯಭಾಗದಲ್ಲಿ ಜಗತ್ಪ್ರಸಿದ್ಧ ಕಾರ್ಟೂನ್ ಪಾತ್ರವಾದ 'ವಿನ್ನಿ ದಿ ಪೂಹ್' (Winnie the Pooh) ಹೆಸರಿನ ಒಂದು ರಸ್ತೆಯಿದೆ!

1950ರ ದಶಕದಲ್ಲಿ ಈ ರಸ್ತೆಗೆ ಹೆಸರಿಡುವ ಸಂದರ್ಭ ಬಂದಾಗ, ವಾರ್ಸಾದ ಮಕ್ಕಳಿಗೆ ತಮಗೆ ಇಷ್ಟವಾದ ಹೆಸರನ್ನು ಸೂಚಿಸಲು ಕೇಳಲಾಯಿತು. ಮಕ್ಕಳೆಲ್ಲರೂ ಒಮ್ಮತದಿಂದ ತಮ್ಮ ನೆಚ್ಚಿನ ಕರಡಿ ಪಾತ್ರ 'ಕುಬುಸಿ ಪುಚಾಟೆಕ್' (ಪೋಲಿಷ್ ಭಾಷೆಯಲ್ಲಿ ವಿನ್ನಿ ದಿ ಪೂಹ್ ಹೆಸರು) ಹೆಸರನ್ನು ಸೂಚಿಸಿದರು.

ಈ ರಸ್ತೆಯ ಆರಂಭದಲ್ಲಿ ಒಂದು ವಿಶಿಷ್ಟವಾದ ಫಲಕವಿದೆ. ಸಾಮಾನ್ಯವಾಗಿ ರಸ್ತೆಗಳ ಫಲಕಗಳು ಗಂಭೀರವಾಗಿರುತ್ತವೆ, ಆದರೆ ಇಲ್ಲಿ 'ವಿನ್ನಿ ದಿ ಪೂಹ್' ತನ್ನ ಗೆಳೆಯ 'ಪಿಗ್ಲೆಟ್' ಜತೆಗೆ ಕೈ ಕೈ ಹಿಡಿದು ನಡೆಯುತ್ತಿರುವ ಚಿತ್ರವಿರುವ ಫಲಕವನ್ನು ಹಾಕಲಾಗಿದೆ. ಇದು ನೋಡಲು ಅತ್ಯಂತ ಆಕರ್ಷಕ ಮತ್ತು ತಮಾಷೆಯಾಗಿದೆ. ವಾರ್ಸಾದಂಥ ಐತಿಹಾಸಿಕ ನಗರದಲ್ಲಿ ಇಂಥದೊಂದು 'ಕಾರ್ಟೂನ್' ರಸ್ತೆ ಇರುವುದು ಪ್ರವಾಸಿಗರಿಗೆ ಅಚ್ಚರಿ ಮೂಡಿಸುತ್ತದೆ. ಜನರು ಈ ರಸ್ತೆಯ ಫಲಕದ ಮುಂದೆ ನಿಂತು ಫೊಟೋ ತೆಗೆಸಿಕೊಳ್ಳಲು ಮರೆಯುವುದಿಲ್ಲ.

ಈ ರಸ್ತೆ ಹೆಚ್ಚೆಂದರೆ ಸುಮಾರು ಇನ್ನೂರು ಮೀಟರ್ ಉದ್ದವಿರಬಹುದು. ಆದರೆ ಅಷ್ಟು ಚಿಕ್ಕ ರಸ್ತೆ ಬಹಳ ತಮಾಷೆಯಾಗಿರುವುದು ಸುಳ್ಳಲ್ಲ.