ನಾನು ಹತ್ತು ದಿನಗಳ ಕಾಲ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿದ್ದೆ. ನಾನು ಮೊನ್ನೆ ಆ ದೇಶಕ್ಕೆ ಹೋಗಿದ್ದು ನಾಲ್ಕನೇ ಬಾರಿಗೆ. ಸುಮಾರು ಹತ್ತು ವರ್ಷಗಳ ಹಿಂದೆಯೇ (2013) ಆ ದೇಶಕ್ಕೆ ಹೋಗಿ ಬಂದ ನಂತರ 'ಪ್ರದಕ್ಷಿಣ ಆಫ್ರಿಕಾ' ಎಂಬ ಒಂದು ಪುಸ್ತಕವನ್ನು ಕೂಡ ಬರೆದಿದ್ದೆ. ಆ ದೇಶಕ್ಕೆ ಮತ್ತೆ ಮತ್ತೆ ಹೋಗಬೇಕಾಗಿ ಬಂದಾಗಲೆಲ್ಲ, ಈಗಾಗಲೇ ನೋಡಿದ್ದೇನೆ, ಮತ್ಯಾಕೆ ಎಂದು ನನಗೆ ಎಂದೂ ಅನಿಸಿಲ್ಲ. ಆಫ್ರಿಕಾ ಬಗ್ಗೆ ತಪ್ಪು ಕಲ್ಪನೆ ಇಟ್ಟುಕೊಂಡವರಿಗೆ, ದಕ್ಷಿಣ ಆಫ್ರಿಕಾಕ್ಕೆ ಹೋದರೆ, ಅಭಿಪ್ರಾಯ ಸಂಪೂರ್ಣ ಬದಲಾಗುವುದರಲ್ಲಿ ಸಂದೇಹವಿಲ್ಲ. ಒಬ್ಬ ಪ್ರವಾಸಿ ಏನೇನೆಲ್ಲ ಬಯಸುತ್ತಾನೋ, ದಕ್ಷಿಣ ಆಫ್ರಿಕಾ ಅವನ್ನೆಲ್ಲ ಯಥೇಚ್ಛ ಒದಗಿಸುವ ಒಂದು ದೇಶ ಎಂಬುದರಲ್ಲಿ ಅನುಮಾನವೇ ಇಲ್ಲ. ಈ ಕಾರಣಕ್ಕೆ ಇದನ್ನು 'ಇಡೀ ವಿಶ್ವವನ್ನೇ ಒಂದು ದೇಶದೊಳಗೆ ಅಡಗಿಸಿಟ್ಟಿರುವ ರಾಷ್ಟ್ರ' (A World in One Country) ಎಂದು ಕರೆಯಲಾಗುತ್ತದೆ. ನೈಸರ್ಗಿಕ ಸೌಂದರ್ಯ, ವನ್ಯಜೀವಿ ಸಂಪತ್ತು, ಸಾಂಸ್ಕೃತಿಕ ವೈವಿಧ್ಯ ಮತ್ತು ಆಧುನಿಕ ಮೂಲಸೌಕರ್ಯಗಳ ಅದ್ಭುತ ಸಮ್ಮಿಲನ ಈ ದೇಶ. ದಕ್ಷಿಣ ಆಫ್ರಿಕಾದ ಪ್ರವಾಸೋದ್ಯಮವು ಕೇವಲ ಒಂದು ಉದ್ಯಮವಲ್ಲ, ಅದು ಆ ದೇಶದ ಆರ್ಥಿಕತೆಯ ಬೆನ್ನೆಲುಬು ಸಹ ಹೌದು.

ಇದನ್ನೂ ಓದಿ: ಚಾಪ್‌ಮ್ಯಾನ್ಸ್‌ ಪೀಕ್ ಡ್ರೈವ್: ರಸ್ತೆಯೇ ಒಂದು ಅನನ್ಯ ಪ್ರೇಕ್ಷಣೀಯ ಸ್ಥಳ!

ದಕ್ಷಿಣ ಆಫ್ರಿಕಾವು ಪ್ರವಾಸಿಗರಿಗೆ ನೀಡುವ ಅನುಭವಗಳು ಅನನ್ಯ. ಆ ದೇಶದ ವನ್ಯಜೀವಿ ಪ್ರವಾಸೋದ್ಯಮದ ಕಿರೀಟಪ್ರಾಯವೇ 'ದಿ ಬಿಗ್ ಫೈವ್' (The Big Five). ಸಿಂಹ, ಚಿರತೆ, ಆನೆ, ಆಫ್ರಿಕನ್ ಕಾಡೆಮ್ಮೆ ಮತ್ತು ಖಡ್ಗಮೃಗ - ಈ ಐದು ದೈತ್ಯ ಪ್ರಾಣಿಗಳನ್ನು ಒಂದೇ ಕಾಡಿನಲ್ಲಿ ನೋಡುವ ರೋಮಾಂಚನವೇ ಅನನ್ಯ. ಈ ಪ್ರಾಣಿಗಳನ್ನು 'ಬಿಗ್ ಫೈವ್' ಎಂದು ಕರೆಯಲು ಕಾರಣ ಅವುಗಳ ಗಾತ್ರವಲ್ಲ, ಬದಲಿಗೆ ಹಿಂದೆ ಬೇಟೆಗಾರರಿಗೆ ಇವುಗಳನ್ನು ಬೇಟೆಯಾಡುವುದು ಅತ್ಯಂತ ಕಠಿಣ ಮತ್ತು ಅಪಾಯಕಾರಿ ಸವಾಲಾಗಿತ್ತು ಎಂಬುದು ಐತಿಹಾಸಿಕ ಸಂಗತಿ. ಇಂದು ಅದೇ ಅಪಾಯಕಾರಿ ಹಣೆಪಟ್ಟಿ ಪ್ರವಾಸಿಗರ ಪಾಲಿಗೆ ಅತ್ಯಂತ ಆಕರ್ಷಕ 'ದರ್ಶನ'ವಾಗಿ ಮಾರ್ಪಟ್ಟಿದೆ. ವಿಶ್ವವಿಖ್ಯಾತ ಕ್ರುಗರ್ ನ್ಯಾಷನಲ್ ಪಾರ್ಕ್ ಸೇರಿದಂತೆ ಇಲ್ಲಿನ ಬಹುತೇಕ ರಾಷ್ಟ್ರೀಯ ಉದ್ಯಾನವನಗಳಲ್ಲಿ ಈ ಐದೂ ಪ್ರಾಣಿಗಳನ್ನು ಅತ್ಯಂತ ಹತ್ತಿರದಿಂದ ನೋಡುವ ಅವಕಾಶವಿದೆ. ಇಲ್ಲಿನ ಸಫಾರಿ ವ್ಯವಸ್ಥೆಯು ಅಂತಾರಾಷ್ಟ್ರೀಯ ಮಟ್ಟದ ಶಿಸ್ತನ್ನು ಹೊಂದಿದೆ. ಪ್ರವಾಸಿಗರಿಗೆ ಕೇವಲ ಪ್ರಾಣಿಗಳನ್ನು ತೋರಿಸುವುದಷ್ಟೇ ಇವರ ಉದ್ದೇಶವಲ್ಲ, ಬದಲಿಗೆ ಪ್ರಾಣಿಗಳ ನೈಸರ್ಗಿಕ ವಾಸಸ್ಥಾನಕ್ಕೆ ಯಾವುದೇ ಧಕ್ಕೆಯಾಗದಂತೆ 'ಎಕೋ-ಫ್ರೆಂಡ್ಲಿ' ಸಫಾರಿಗಳನ್ನು ಆಯೋಜಿಸಲಾಗುತ್ತಿದೆ.

00-the-top15-best-tourist-attractions-in-southafrica-BW-1200px

ದಕ್ಷಿಣ ಆಫ್ರಿಕಾದ 'ಬಿಗ್ ಫೈವ್' ಪ್ರಾಣಿಗಳು ಕೇವಲ ಪ್ರವಾಸಿ ಆಕರ್ಷಣೆಯಲ್ಲ, ಅವು ಆ ದೇಶದ ರಾಷ್ಟ್ರೀಯ ಸಂಪತ್ತು. ಇವುಗಳ ಸಂರಕ್ಷಣೆಗಾಗಿ ದಕ್ಷಿಣ ಆಫ್ರಿಕಾ ಸರಕಾರವು ವಿಶ್ವದಲ್ಲೇ ಅತ್ಯಂತ ಕಟ್ಟುನಿಟ್ಟಾದ ಮತ್ತು ವೈಜ್ಞಾನಿಕವಾದ ನಿಯಮಗಳನ್ನು ಜಾರಿಗೆ ತಂದಿದೆ. ಖಡ್ಗಮೃಗ (Rhino) ಮತ್ತು ಆನೆಗಳ ಅಕ್ರಮ ಬೇಟೆಯನ್ನು ತಡೆಯಲು ಸರಕಾರವು 'ನ್ಯಾಷನಲ್ ಎನ್ವಿರಾನ್ಮೆಂಟಲ್ ಮ್ಯಾನೇಜ್ಮೆಂಟ್ ಆಕ್ಟ್' ಅಡಿಯಲ್ಲಿ ಕಠಿಣ ಕ್ರಮಗಳನ್ನು ಕೈಗೊಂಡಿದೆ. ಉದ್ಯಾನವನಗಳಲ್ಲಿ ಕೇವಲ ಗಾರ್ಡ್‌ಗಳಷ್ಟೇ ಅಲ್ಲದೆ, ಡ್ರೋನ್ ಕ್ಯಾಮೆರಾಗಳು, ಥರ್ಮಲ್ ಇಮೇಜಿಂಗ್ ಮತ್ತು ಅತ್ಯಾಧುನಿಕ ರೆಡಾರ್ ವ್ಯವಸ್ಥೆಯನ್ನು ಬಳಸಲಾಗುತ್ತಿದೆ. ಅಕ್ರಮ ಬೇಟೆಗಾರರನ್ನು ಪತ್ತೆಹಚ್ಚಲು ವಿಶೇಷವಾಗಿ ತರಬೇತಿ ಪಡೆದ ಶ್ವಾನ ದಳಗಳನ್ನು (K9 Units) ನಿಯೋಜಿಸಲಾಗಿದೆ. ವಿಶ್ವದ ಒಟ್ಟು ಖಡ್ಗಮೃಗಗಳಲ್ಲಿ ಶೇ.80ರಷ್ಟು ದಕ್ಷಿಣ ಆಫ್ರಿಕಾದಲ್ಲಿವೆ. ಇವುಗಳ ರಕ್ಷಣೆಗಾಗಿ ಸರಕಾರವು 'ಡಿ-ಹಾರ್ನಿಂಗ್' ಎಂಬ ವಿವಾದಾತ್ಮಕ ಆದರೆ ಪರಿಣಾಮಕಾರಿ ಕ್ರಮವನ್ನು ಅನುಸರಿಸುತ್ತಿದೆ. ಅಂದರೆ, ತಜ್ಞ ವೈದ್ಯರ ಮೂಲಕ ನೋವಾಗದಂತೆ ಖಡ್ಗಮೃಗಗಳ ಕೊಂಬನ್ನು ಮೊದಲೇ ತೆಗೆಯಲಾಗುತ್ತದೆ, ಇದರಿಂದ ಬೇಟೆಗಾರರಿಗೆ ಅವುಗಳ ಮೇಲೆ ಆಸಕ್ತಿ ಕಡಿಮೆಯಾಗುತ್ತದೆ.

ಪ್ರವಾಸಿಗರಿಗೆ ಸಫಾರಿ ಮಾಡುವಾಗ ಕಟ್ಟುನಿಟ್ಟಾದ ನಿಯಮಗಳಿವೆ. ಪ್ರಾಣಿಗಳಿಗೆ ಆಹಾರ ನೀಡುವುದು, ಅವುಗಳನ್ನು ಮುಟ್ಟುವುದು ಅಥವಾ ಶಬ್ದ ಮಾಡುವುದು ಗಂಭೀರ ಅಪರಾಧ. ನಿಯಮ ಮೀರಿದರೆ ಭಾರಿ ದಂಡ ಅಥವಾ ಜೈಲು ಶಿಕ್ಷೆ ವಿಧಿಸಲಾಗುತ್ತದೆ. ಕಾಡಿನ ಒಳಗೆ ವಾಹನಗಳು ನಿಗದಿತ ವೇಗಕ್ಕಿಂತ (ಸಾಮಾನ್ಯವಾಗಿ ಗಂಟೆಗೆ 40 ಕಿಮೀ) ವೇಗವಾಗಿ ಚಲಿಸುವಂತಿಲ್ಲ. ಪ್ರತಿಯೊಬ್ಬ ಪ್ರವಾಸಿಯಿಂದಲೂ 'ಕನ್ಸರ್ವೇಷನ್ ಫೀ' ಅಥವಾ ಸಂರಕ್ಷಣಾ ಶುಲ್ಕವನ್ನು ವಸೂಲಿ ಮಾಡಲಾಗುತ್ತದೆ. ಈ ಹಣವನ್ನು ನೇರವಾಗಿ ಪ್ರಾಣಿಗಳ ಆರೈಕೆ, ವೈದ್ಯಕೀಯ ಚಿಕಿತ್ಸೆ ಮತ್ತು ಅರಣ್ಯ ರಕ್ಷಕರ ವೇತನಕ್ಕೆ ಬಳಸಲಾಗುತ್ತದೆ. ಅಂದರೆ, ಪ್ರತಿಯೊಬ್ಬ ಪ್ರವಾಸಿಯೂ ಪರೋಕ್ಷವಾಗಿ ಪ್ರಾಣಿಗಳ ಸಂರಕ್ಷಣೆಗೆ ಕೈಜೋಡಿಸಿದಂತಾಗುತ್ತದೆ. ಕಾಡಿನ ಸುತ್ತಮುತ್ತಲ ಹಳ್ಳಿಗಳ ಜನರಿಗೆ ಪ್ರವಾಸೋದ್ಯಮದಲ್ಲಿ ಉದ್ಯೋಗ ನೀಡುವ ಮೂಲಕ, ಅವರು ಬೇಟೆಯಾಡುವುದನ್ನು ತಡೆದು ಸಂರಕ್ಷಕರನ್ನಾಗಿ ಮಾಡಲಾಗಿದೆ. ಪ್ರಾಣಿಗಳು ಹಳ್ಳಿಗೆ ನುಗ್ಗದಂತೆ ತಡೆಯಲು ಅತ್ಯಾಧುನಿಕ ಬೇಲಿ (Electric Fencing) ವ್ಯವಸ್ಥೆ ಮಾಡಲಾಗಿದ್ದು, ಪ್ರಾಣಿಗಳಿಂದ ಜನರಿಗೆ ಅಥವಾ ಜನರಿಂದ ಪ್ರಾಣಿಗಳಿಗೆ ತೊಂದರೆಯಾಗದಂತೆ ನೋಡಿಕೊಳ್ಳಲಾಗುತ್ತದೆ. ದಕ್ಷಿಣ ಆಫ್ರಿಕಾದ ಈ ಮಾದರಿಯು ವನ್ಯಜೀವಿ ಪ್ರೇಮಿಗಳಿಗೆ ಮತ್ತು ಇತರ ದೇಶಗಳಿಗೂ ಒಂದು ದೊಡ್ಡ ಪಾಠವಾಗಿದೆ. ವನ್ಯಜೀವಿಗಳ ಸಂರಕ್ಷಣೆ ಮತ್ತು ಪ್ರವಾಸೋದ್ಯಮವನ್ನು ಎಷ್ಟು ಸಮರ್ಥವಾಗಿ ಸಮತೋಲನಗೊಳಿಸಬಹುದು ಎಂಬುದಕ್ಕೆ ದಕ್ಷಿಣ ಆಫ್ರಿಕಾದ ಈ ಸಫಾರಿ ಸಂಸ್ಕೃತಿಯೇ ಸಾಕ್ಷಿ. ಪ್ರಕೃತಿ ಪ್ರೇಮಿಗಳಿಗೆ ಇದು ಕೇವಲ ಪ್ರವಾಸವಲ್ಲ, ಜೀವಮಾನದ ಶ್ರೇಷ್ಠ ಅನುಭವ.

ದಕ್ಷಿಣ ಆಫ್ರಿಕಾದ ನೈಸರ್ಗಿಕ ಸೌಂದರ್ಯಕ್ಕೆ ಮುಕುಟಪ್ರಾಯವಾಗಿ ನಿಂತಿರುವುದು ಕೇಪ್ ಟೌನ್‌ನ ಟೇಬಲ್ ಮೌಂಟೇನ್ ಮತ್ತು ಸುಂದರವಾದ ಗಾರ್ಡನ್ ರೂಟ್. ಇವೆರಡೂ ಪ್ರಕೃತಿಯ ಅದ್ಭುತ ಕಲಾಕೃತಿಗಳೆಂದರೆ ಅತಿಶಯೋಕ್ತಿಯಲ್ಲ. ವಿಶ್ವದ ಹೊಸ ಏಳು ನೈಸರ್ಗಿಕ ಅದ್ಭುತಗಳಲ್ಲಿ ಒಂದೆಂದು ಪರಿಗಣಿತವಾಗಿರುವ ಈ ಪರ್ವತವು ಸುಮಾರು ಅರವತ್ತು ಕೋಟಿ ವರ್ಷಗಳಷ್ಟು ಹಳೆಯದು. ಈ ಪರ್ವತದ ಮೇಲ್ಭಾಗವು ಯಾವುದೇ ಶಿಖರವಿಲ್ಲದೇ, ಸುಮಾರು ಮೂರು ಕಿಮೀ‌ಗಳಷ್ಟು ಉದ್ದದ ವಿಶಾಲವಾದ 'ಮೇಜಿನ' ಆಕಾರದಲ್ಲಿದೆ. ಮೋಡಗಳು ಪರ್ವತದ ಮೇಲೆ ಹರಿದು ಬರುವಾಗ ಅವು ಪರ್ವತದ ಮೇಲೆ ಹಾಸಿದ ಬಿಳಿ ಬಣ್ಣದ ಮೇಜುಬಟ್ಟೆಯಂತೆ ಕಾಣುತ್ತವೆ. ಪ್ರವಾಸಿಗರು 'ಕೇಬಲ್ ಕಾರ್' ಮೂಲಕ ಪರ್ವತದ ತುತ್ತತುದಿ ತಲುಪಬಹುದು. ಅಲ್ಲಿಂದ ಕಾಣುವ ಕೇಪ್ ಟೌನ್ ನಗರ ಮತ್ತು ಅಟ್ಲಾಂಟಿಕ್ ಸಾಗರದ ನೋಟವು ವರ್ಣನಾತೀತ.

Untitled design (69)

ದಕ್ಷಿಣ ಆಫ್ರಿಕಾದ ಆಗ್ನೇಯ ಕರಾವಳಿಯುದ್ದಕ್ಕೂ ಸುಮಾರು ಮುನ್ನೂರು ಕಿಮೀ‌ಗಳಷ್ಟು ಹರಡಿರುವ ಈ ರಸ್ತೆಯು ವಿಶ್ವದ ಅತ್ಯಂತ ಸುಂದರವಾದ ಡ್ರೈವಿಂಗ್ ರಸ್ತೆಗಳಲ್ಲಿ ಒಂದು. 'ಗಾರ್ಡನ್ ರೂಟ್' ಎಂಬ ಹೆಸರು ಬರಲು ಕಾರಣ ಇಲ್ಲಿನ ಹಚ್ಚಹಸಿರಿನ ಕಾಡುಗಳು, ಸರೋವರಗಳು ಮತ್ತು ವೈವಿಧ್ಯಮಯ ಸಸ್ಯಸಂಪತ್ತು. ಈ ದಾರಿಯುದ್ದಕ್ಕೂ ನೀವು ಪರ್ವತಗಳು, ಕಡಿದಾದ ಸಮುದ್ರ ತೀರಗಳು ಮತ್ತು ದಟ್ಟವಾದ ಕಾಡುಗಳನ್ನು ನೋಡಬಹುದು. 'ಗಾರ್ಡನ್ ರೂಟ್'ನಲ್ಲಿ ಏನಿಲ್ಲವೆಂದರೂ ನೂರಕ್ಕೂ ಹೆಚ್ಚು ಪ್ರೇಕ್ಷಣೀಯ ಸ್ಥಳಗಳನ್ನು ವೀಕ್ಷಿಸಬಹುದು. ಈ ಮಾರ್ಗದಲ್ಲಿ ಬರುವ ನೈಸ್ನಾ ಎಂಬಲ್ಲಿನ ಸುಂದರ ಸರೋವರ ಮತ್ತು ಪ್ಲೆಟೆನ್‌ಬರ್ಗ್ ಬೇ ಕಡಲತೀರಗಳು ಪ್ರವಾಸಿಗರ ನೆಚ್ಚಿನ ತಾಣಗಳು. ಇಲ್ಲಿ ಒಂದೆಡೆ ವಿಶ್ವದ ಅತಿ ಎತ್ತರದ ಬಂಗೀ ಜಂಪಿಂಗ್ ಮಾಡುವ ಸಾಹಸವಿದ್ದರೆ, ಇನ್ನೊಂದೆಡೆ ಪ್ರಶಾಂತವಾದ ಕಾಡಿನ ಹಾದಿಯಲ್ಲಿ ಮೌನವಾಗಿ ಚಲಿಸುವ ಸೊಬಗಿದೆ. ಟೇಬಲ್ ಮೌಂಟೇನ್ ದಕ್ಷಿಣ ಆಫ್ರಿಕಾದ ಶಕ್ತಿಯ ಸಂಕೇತವಾದರೆ, ಗಾರ್ಡನ್ ರೂಟ್ ಆ ದೇಶದ ಸೌಂದರ್ಯದ ಸಂಕೇತ. ಪ್ರಕೃತಿ ಪ್ರೇಮಿಗಳಿಗೆ ಇದು ಕೇವಲ ಪ್ರವಾಸವಲ್ಲ, ಕಣ್ಣಿಗೆ ಹಬ್ಬ. ಈ ಮಾರ್ಗದಲ್ಲಿ ಪ್ರಯಾಣಿಸುವುದು ಎಂದರೆ ಪ್ರಕೃತಿಯ ಮಡಲಿನಲ್ಲಿ ಒಂದು ಸುದೀರ್ಘ ಚಾಲನೆಯ ಅನುಭವ ಪಡೆದಂತೆ. ಆಧುನಿಕ ರಸ್ತೆಗಳು ಮತ್ತು ಪಕ್ಕದಲ್ಲೇ ಇರುವ ಕಾಡು-ಸಮುದ್ರಗಳ ಸಮ್ಮಿಲನ ಈ ರಸ್ತೆಯನ್ನು ಪ್ರತಿಯೊಬ್ಬ ಪ್ರವಾಸಿಯ 'ಬಕೆಟ್ ಲಿಸ್ಟ್'ನಲ್ಲಿರುವಂತೆ ಮಾಡಿದೆ.

ದಕ್ಷಿಣ ಆಫ್ರಿಕಾವನ್ನು 'ರೇನ್ ಬೋ ನೇಷನ್' ಅಥವಾ ಮಳೆಬಿಲ್ಲು ರಾಷ್ಟ್ರ ಎಂದು ಕರೆಯುವುದು ಅಲ್ಲಿನ ಜನಾಂಗೀಯ ಮತ್ತು ಸಾಂಸ್ಕೃತಿಕ ವೈವಿಧ್ಯದ ಕಾರಣಕ್ಕಾಗಿ. ವರ್ಣಭೇದ ನೀತಿಯ ಕರಾಳ ಅಧ್ಯಾಯದ ನಂತರ, ವಿವಿಧ ವರ್ಣದ ಮತ್ತು ಸಂಸ್ಕೃತಿಯ ಜನರನ್ನು ಒಟ್ಟುಗೂಡಿಸಿ ಒಂದು ಶಾಂತಿಯುತ ರಾಷ್ಟ್ರ ನಿರ್ಮಾಣ ಮಾಡುವ ಕನಸನ್ನು ಈ ಹೆಸರು ಪ್ರತಿನಿಧಿಸುತ್ತದೆ. ಈ ಸಾಂಸ್ಕೃತಿಕ ಸಮ್ಮಿಲನವೇ ಪ್ರವಾಸಿಗರನ್ನು ಸೆಳೆಯುವ ದೊಡ್ಡ ಶಕ್ತಿ. ದಕ್ಷಿಣ ಆಫ್ರಿಕಾದ ಅಸಲಿ ಜೀವನಾಡಿ ಇರುವುದು ಅಲ್ಲಿನ ಬುಡಕಟ್ಟುಗಳಲ್ಲಿ. ಝೂಲು, ಕ್ಸೋಸಾ, ಸೋಥೋನಂಥ ಹನ್ನೊಂದಕ್ಕೂ ಹೆಚ್ಚು ಅಧಿಕೃತ ಬುಡಕಟ್ಟು ಜನಾಂಗಗಳು ಇಲ್ಲಿವೆ. ಪ್ರವಾಸಿಗರು ಇವರ ಹಳ್ಳಿಗಳಿಗೆ ಭೇಟಿ ನೀಡಿದಾಗ, ಅವರ ಸಾಂಪ್ರದಾಯಿಕ ನೃತ್ಯ, ವಿಶಿಷ್ಟ ಉಡುಗೆ ತೊಡುಗೆ ಮತ್ತು ಮಣ್ಣಿನ ಮನೆಗಳ ಜೀವನಶೈಲಿಯನ್ನು ನೋಡಬಹುದು. ಅವರ ಆತ್ಮೀಯ ಆತಿಥ್ಯ ಮತ್ತು ಪ್ರಕೃತಿಯೊಂದಿಗಿನ ಅವರ ಅವಿನಾಭಾವ ಸಂಬಂಧ ಬೆರಗುಗೊಳಿಸುತ್ತದೆ.

ದಕ್ಷಿಣ ಆಫ್ರಿಕಾದ ಪ್ರವಾಸೋದ್ಯಮವು ನೆಲ್ಸನ್ ಮಂಡೇಲಾ ಅವರ ಹೋರಾಟದ ಹಾದಿ ಹಾಗೂ ಅದರ ಇತಿಹಾಸದೊಂದಿಗೆ ಬೆಸೆದುಕೊಂಡಿದೆ. ಶಾಂತಿದೂತ ನೆಲ್ಸನ್ ಮಂಡೇಲಾ ಅವರು ಇಪ್ಪತ್ತೇಳು ವರ್ಷಗಳ ಪೈಕಿ ಹದಿನೆಂಟು ವರ್ಷಗಳ ಸೆರೆಮನೆ ವಾಸ ಅನುಭವಿಸಿದ ರೊಬ್ಬನ್ ಐಲೆಂಡ್ ಜೈಲು ಇಂದು ವಿಶ್ವ ಪರಂಪರೆಯ ತಾಣವಾಗಿದೆ. ಜೋಹಾನ್ಸ್‌ಬರ್ಗ್‌ನಲ್ಲಿರುವ 'ಅಪಾರ್ಥೈಡ್ ಮ್ಯೂಸಿಯಂ' ವರ್ಣಭೇದ ನೀತಿಯ ವಿರುದ್ಧ ನಡೆದ ಸುದೀರ್ಘ ಹೋರಾಟದ ಕಥೆಯನ್ನು ಕಣ್ಣಿಗೆ ಕಟ್ಟುವಂತೆ ವಿವರಿಸುತ್ತದೆ. ಒಬ್ಬ ವ್ಯಕ್ತಿಯ ಅಚಲ ವಿಶ್ವಾಸ ಹೇಗೆ ಒಂದು ದೇಶದ ಭವಿಷ್ಯವನ್ನೇ ಬದಲಿಸಿತು ಎಂಬ ಸ್ಫೂರ್ತಿದಾಯಕ ಕಥೆ ಇಲ್ಲಿನ ಗಾಳಿಯಲ್ಲಿದೆ.

ದಕ್ಷಿಣ ಆಫ್ರಿಕಾವು ಕೇವಲ ವನ್ಯಜೀವಿಗಳ ತಾಣವಲ್ಲ, ಇದು ಸಾಹಸಪ್ರಿಯರ ಪಾಲಿನ ಸ್ವರ್ಗ. ಇಲ್ಲಿನ ಭೌಗೋಳಿಕ ವೈವಿಧ್ಯ ರೋಮಾಂಚಕಾರಿ ಸಾಹಸ ಕ್ರೀಡೆಗಳಿಗೆ ಹೇಳಿಮಾಡಿಸಿದಂತಿದೆ. ಗಾರ್ಡನ್ ರೂಟ್‌ನಲ್ಲಿರುವ ಬ್ಲೌಕ್ರ್ಯಾನ್ಸ್ ಬ್ರಿಡ್ಜ್ ಬಂಜೀ ಜಂಪಿಂಗ್ ಸೇತುವೆ ವಿಶ್ವದ ಅತಿ ಎತ್ತರದ ಬಂಜೀ ಜಂಪಿಂಗ್ ತಾಣಗಳಲ್ಲಿ ಒಂದು. ಸುಮಾರು 220 ಮೀಟರ್ ಎತ್ತರದಿಂದ ಕೆಳಕ್ಕೆ ಧುಮುಕುವಾಗ ಸಿಗುವ ಆ 'ಅಡ್ರಿನಲಿನ್ ರಶ್' ವರ್ಣನಾತೀತ. ಕಮಾನು ಸೇತುವೆಯ ಮೇಲಿಂದ ಆಳವಾದ ಕಮರಿಗೆ ಜಿಗಿಯುವುದು ಎದೆಗುಂದದ ಸಾಹಸಿಗಳಿಗೆ ಮಾತ್ರ ಸಾಧ್ಯ! ದಕ್ಷಿಣ ಆಫ್ರಿಕಾದ ಕರಾವಳಿ, ವಿಶೇಷವಾಗಿ ಗ್ಯಾನ್ಸ್‌ಬಾಹಿ, ಗ್ರೇಟ್ ವೈಟ್ ಶಾರ್ಕ್‌ಗಳ ವೀಕ್ಷಣೆಗೆ ಜಗತ್ಪ್ರಸಿದ್ಧ. ಕಬ್ಬಿಣದ ಪಂಜರದೊಳಗೆ ಕುಳಿತು ಸಮುದ್ರದ ಆಳಕ್ಕೆ ಇಳಿದಾಗ, ಬೃಹತ್ ಶಾರ್ಕ್‌ಗಳು ನಿಮ್ಮ ಕಣ್ಣೆದುರಿಗೇ ಸುಳಿದಾಡುತ್ತವೆ. ಸಮುದ್ರದ ಅತ್ಯಂತ ಭಯಾನಕ ಪ್ರಾಣಿಯನ್ನು ಇಷ್ಟು ಹತ್ತಿರದಿಂದ ನೋಡುವುದು ಜೀವಮಾನದ ವಿಶಿಷ್ಟ ಅನುಭವ. ಕೇಪ್ ಟೌನ್‌ನ ಲಯನ್ಸ್ ಹೆಡ್ ಅಥವಾ ಸಿಗ್ನಲ್ ಹಿಲ್‌ನಿಂದ ಪ್ಯಾರಾಗ್ಲೈಡಿಂಗ್ ಮಾಡುವುದು ಪ್ರವಾಸಿಗರ ನೆಚ್ಚಿನ ಚಟುವಟಿಕೆ. ಆಕಾಶದಲ್ಲಿ ಹಕ್ಕಿಯಂತೆ ತೇಲುತ್ತಾ ಒಂದು ಕಡೆ ಅಟ್ಲಾಂಟಿಕ್ ಸಾಗರ, ಇನ್ನೊಂದೆಡೆ ಟೇಬಲ್ ಮೌಂಟೇನ್ ಮತ್ತು ಕೆಳಗೆ ಸುಂದರವಾದ ನಗರವನ್ನು ನೋಡುವುದು ಅದ್ಭುತ. ಒಟ್ಟಿನಲ್ಲಿ, ದಕ್ಷಿಣ ಆಫ್ರಿಕಾವು ಪ್ರತಿಯೊಬ್ಬ ಸಾಹಸಿಯನ್ನು ತನ್ನತ್ತ ಸೆಳೆಯುವ ಶಕ್ತಿಯನ್ನು ಹೊಂದಿದೆ.

South-Africa-Tourist-Places-1-1

ದಕ್ಷಿಣ ಆಫ್ರಿಕಾ ಇಂದು ಜಾಗತಿಕ ಪ್ರವಾಸೋದ್ಯಮ ಭೂಪಟದಲ್ಲಿ ಮಿಂಚುತ್ತಿರುವುದಕ್ಕೆ ಕೇವಲ ಅಲ್ಲಿನ ನಿಸರ್ಗವೊಂದೇ ಕಾರಣವಲ್ಲ, ಬದಲಿಗೆ ಆ ದೇಶವು ಅನುಸರಿಸುತ್ತಿರುವ ಅತ್ಯಂತ ಚಾಣಾಕ್ಷ ಮತ್ತು ವೈಜ್ಞಾನಿಕ ಮಾರ್ಕೆಟಿಂಗ್ ತಂತ್ರಗಳು ಕಾರಣ. ಪ್ರವಾಸೋದ್ಯಮವನ್ನು ಒಂದು ಯೋಜನಾಬದ್ಧ 'ಬ್ರಾಂಡ್' ಆಗಿ ರೂಪಿಸಿರುವ ದಕ್ಷಿಣ ಆಫ್ರಿಕಾದ ಪ್ರಮುಖ ತಂತ್ರಗಳು ಗಮನಾರ್ಹ. ಕೋವಿಡ್ ನಂತರದ ಕಾಲಘಟ್ಟದಲ್ಲಿ ಜನರು ಕೇವಲ ನೋಡುವ ತಾಣಗಳಿಗಿಂತ, ಮಾನಸಿಕ ನೆಮ್ಮದಿ ಮತ್ತು ಹೊಸ ಚೈತನ್ಯ ನೀಡುವ ಅನುಭವಗಳನ್ನು ಹುಡುಕುತ್ತಿದ್ದರು. ಇದನ್ನು ಮನಗಂಡ ದಕ್ಷಿಣ ಆಫ್ರಿಕಾ ಪ್ರವಾಸೋದ್ಯಮ 'Live Again' ಎಂಬ ಜಾಗತಿಕ ಅಭಿಯಾನವನ್ನು ಹಮ್ಮಿಕೊಂಡಿತು. ಇಲ್ಲಿ ಅವರು ಕೇವಲ ಪರ್ವತ ಅಥವಾ ಕಾಡಿನ ಚಿತ್ರಗಳನ್ನು ತೋರಿಸಲಿಲ್ಲ. ಬದಲಿಗೆ ಅಲ್ಲಿನ ಮಣ್ಣಿನ ವಾಸನೆ, ಸಫಾರಿಯಲ್ಲಿ ಸಿಗುವ ರೋಮಾಂಚನ ಮತ್ತು ಸಾಂಸ್ಕೃತಿಕ ಹಬ್ಬಗಳ ಮೂಲಕ ಒಬ್ಬ ಮನುಷ್ಯ ಹೇಗೆ ಮಾನಸಿಕವಾಗಿ ಪುನರ್ಜನ್ಮ ಪಡೆಯಬಹುದು ಎಂದು ಬಿಂಬಿಸಿದರು. 'ಸ್ಥಳಗಳನ್ನಲ್ಲ, ಅನುಭವಗಳನ್ನು ಮಾರಾಟ ಮಾಡಿ' ಎಂಬ ತತ್ತ್ವ ಇವರ ಯಶಸ್ಸಿನ ಮೊದಲ ಸೂತ್ರ. ದಕ್ಷಿಣ ಆಫ್ರಿಕಾವು ಪ್ರವಾಸಿಗರ ಹಾದಿಯನ್ನು ಸುಗಮಗೊಳಿಸಲು ತಂತ್ರಜ್ಞಾನವನ್ನು ಸಮರ್ಥವಾಗಿ ಬಳಸಿಕೊಂಡಿದೆ. ಅಲ್ಲಿನ ಅಧಿಕೃತ ವೆಬ್‌ಸೈಟ್‌ಗಳು ಮತ್ತು ಮೊಬೈಲ್ ಆಪ್‌ಗಳು ಕೇವಲ ಮಾಹಿತಿಯನ್ನಷ್ಟೇ ನೀಡುವುದಿಲ್ಲ, ಬದಲಿಗೆ ಪ್ರವಾಸಿಗರಿಗೆ ತಮ್ಮ ಪ್ರವಾಸವನ್ನು ತಾವೇ ವಿನ್ಯಾಸಗೊಳಿಸಲು (Customized Itinerary) ಅವಕಾಶ ನೀಡುತ್ತವೆ. ವೀಸಾ ಮಾಹಿತಿ, ಸುರಕ್ಷತಾ ಕ್ರಮಗಳು, ಹವಾಮಾನ ಮತ್ತು ಸ್ಥಳೀಯ ಸಾರಿಗೆಯ ಬಗ್ಗೆ ಕ್ಷಣ ಕ್ಷಣದ ಮಾಹಿತಿ ಡಿಜಿಟಲ್ ರೂಪದಲ್ಲಿ ಸಿಗುವುದರಿಂದ ಪ್ರವಾಸಿಗರಲ್ಲಿ ಆತ್ಮವಿಶ್ವಾಸ ಮೂಡುತ್ತದೆ.

ದಕ್ಷಿಣ ಆಫ್ರಿಕಾದ ಮಾರ್ಕೆಟಿಂಗ್ ತಂತ್ರವು ಎಲ್ಲರಿಗೂ ಒಂದೇ ಮಾದರಿಯ ಪ್ಯಾಕೇಜ್ ನೀಡುವುದಿಲ್ಲ. ಅವರು ಪ್ರವಾಸಿಗರನ್ನು ವಿವಿಧ ಗುಂಪುಗಳಾಗಿ ವಿಂಗಡಿಸಿದ್ದಾರೆ. ಉದಾಹರಣೆಗೆ, ಬಜೆಟ್ ಪ್ರವಾಸಿಗರು. ಹ್ಯಾಂಡ್-ಬ್ಯಾಗ್ ಹೊತ್ತು ಬರುವವರಿಗೆ ಅಗ್ಗದ ಹೊಟೇಲ್‌ಗಳು ಮತ್ತು ಬಸ್ ಸೌಲಭ್ಯ. ಇನ್ನೊಂದು, ಖಾಸಗಿ ಹೆಲಿಕಾಪ್ಟರ್ ಮತ್ತು ಕಾಡಿನ ಮಧ್ಯೆ ಪಂಚತಾರಾ ಸೌಲಭ್ಯದ ಲಾಡ್ಜ್‌ಗಳಲ್ಲಿ ಇರಬಯಸುವ ಐಷಾರಾಮಿ ಪ್ರವಾಸಿಗರು. ಹಾಗೆಯೇ, ಕೇಪ್ ಟೌನ್‌ನ ಕಡಲತೀರ ಮತ್ತು ವೈನ್ ಟೂರಿಸಂನಂಥ ರಮಣೀಯ ತಾಣಗಳನ್ನು ನೋಡಬಯಸುವ ಹನಿಮೂನ್ ಪ್ರವಾಸಿಗರು ಹಾಗೂ ಬಂಜೀ ಜಂಪಿಂಗ್ ಮತ್ತು ಶಾರ್ಕ್ ಡೈವಿಂಗ್‌ನಂಥ ರೋಚಕ ಅನುಭವ ಪಡೆಯುವ ಸಾಹಸಪ್ರಿಯರು. ಈ ವಿಭಿನ್ನ ಗುಂಪಿನ ಪ್ರವಾಸಿಗರಿಗೆ ಪ್ರತ್ಯೇಕ ಪ್ಯಾಕೇಜುಗಳನ್ನು ರೂಪಿಸಿರುವುದು ವಿಶೇಷ.

ಪ್ರಕೃತಿಯೇ ದಕ್ಷಿಣ ಆಫ್ರಿಕಾದ ಆಸ್ತಿ. ಅದನ್ನು ನಾಶಮಾಡಿದರೆ ಪ್ರವಾಸೋದ್ಯಮವೇ ಇರುವುದಿಲ್ಲ ಎಂಬುದು ಅವರಿಗೆ ಗೊತ್ತು. ಹೀಗಾಗಿ, ಅವರು 'ಜವಾಬ್ದಾರಿಯುತ ಪ್ರವಾಸೋದ್ಯಮ'ಕ್ಕೆ ಒತ್ತು ನೀಡಿದ್ದಾರೆ. ಪ್ರವಾಸೋದ್ಯಮದಿಂದ ಬರುವ ಆದಾಯದ ಒಂದು ಭಾಗವನ್ನು ನೇರವಾಗಿ ಸ್ಥಳೀಯ ಬುಡಕಟ್ಟು ಹಳ್ಳಿಗಳ ಅಭಿವೃದ್ಧಿಗೆ ಬಳಸಲಾಗುತ್ತದೆ. ಇದರಿಂದ ಪ್ರವಾಸಿಗರು ಬಂದಾಗ ಸ್ಥಳೀಯರು ಅವರನ್ನು ಪ್ರೀತಿಯಿಂದ ಬರಮಾಡಿಕೊಳ್ಳುತ್ತಾರೆ. ಪ್ಲಾಸ್ಟಿಕ್ ಮುಕ್ತ ವಲಯಗಳು ಮತ್ತು ಪ್ರಾಣಿಗಳ ಆವಾಸಸ್ಥಾನಕ್ಕೆ ಧಕ್ಕೆಯಾಗದಂತೆ ನಿರ್ಮಿಸಲಾದ 'ಎಕೋ-ಲಾಡ್ಜ್‌ಗಳು' ಪರಿಸರ ಪ್ರೇಮಿ ಪ್ರವಾಸಿಗರನ್ನು ಸೆಳೆಯುತ್ತಿವೆ. ದಕ್ಷಿಣ ಆಫ್ರಿಕಾವು ಪ್ರವಾಸೋದ್ಯಮವನ್ನು ಕೇವಲ ವ್ಯಾಪಾರವನ್ನಾಗಿ ನೋಡದೇ, ಒಂದು 'ರಾಷ್ಟ್ರೀಯ ಹೆಮ್ಮೆ'ಯನ್ನಾಗಿ ಪ್ರಸ್ತುತಪಡಿಸುತ್ತಿದೆ. ಒಂದು ದೇಶವು ತನ್ನ ನೈಸರ್ಗಿಕ ಸವಾಲುಗಳ ನಡುವೆಯೂ ಹೇಗೆ ವಿಶ್ವದ ನೆಚ್ಚಿನ ಪ್ರವಾಸಿ ತಾಣವಾಗಬಹುದು ಎಂಬುದಕ್ಕೆ ಈ ತಂತ್ರಗಳೇ ಸಾಕ್ಷಿ.

ಹಾಗಾದರೆ ದಕ್ಷಿಣ ಆಫ್ರಿಕಾದಿಂದ ನಾವು ಏನು ಕಲಿಯಬಹುದು? ಭಾರತದಂಥ ನೈಸರ್ಗಿಕ ಮತ್ತು ಸಾಂಸ್ಕೃತಿಕ ವೈವಿಧ್ಯವುಳ್ಳ ದೇಶಕ್ಕೆ ದಕ್ಷಿಣ ಆಫ್ರಿಕಾದ ಪ್ರವಾಸೋದ್ಯಮ ಮಾದರಿಯು ಒಂದು ಅತ್ಯುತ್ತಮ ಪಠ್ಯಪುಸ್ತಕದಂತಿದೆ. ದಕ್ಷಿಣ ಆಫ್ರಿಕಾದಲ್ಲಿ ಸಫಾರಿ ಎಂದರೆ ಪ್ರಾಣಿಗಳ ಬೆನ್ನಟ್ಟುವುದು ಅಥವಾ ಶಬ್ದ ಮಾಡಿ ಅವುಗಳನ್ನು ಕೆಣಕುವುದಲ್ಲ. ಅಲ್ಲಿನ ಶಿಸ್ತು ಎಷ್ಟು ಕಟ್ಟುನಿಟ್ಟಾಗಿದೆ ಎಂದರೆ, ಪ್ರಾಣಿಗಳ ಸ್ವಾಭಾವಿಕ ವರ್ತನೆಗೆ ಧಕ್ಕೆಯಾದಲ್ಲಿ ಪ್ರವಾಸಿಗರಿಗೆ ಮತ್ತು ಗೈಡ್‌ಗಳಿಗೆ ಭಾರಿ ದಂಡ ವಿಧಿಸಲಾಗುತ್ತದೆ. ಭಾರತದ ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿಯೂ ಇಂಥದ್ದೇ ಶಿಸ್ತುಬದ್ಧ ವ್ಯವಸ್ಥೆ ತರಬಹುದು. ಪ್ರಾಣಿಗಳ ದರ್ಶನಕ್ಕಿಂತಲೂ 'ಕಾಡಿನ ಅನುಭವ'ಕ್ಕೆ ಆದ್ಯತೆ ನೀಡುವ ಮೂಲಕ ವನ್ಯಜೀವಿಗಳ ರಕ್ಷಣೆ ಮತ್ತು ಪ್ರವಾಸೋದ್ಯಮವನ್ನು ಸಮಾನಾಂತರವಾಗಿ ಬೆಳೆಸಬಹುದು. ದಕ್ಷಿಣ ಆಫ್ರಿಕಾಕ್ಕೆ ಹೋದ ಪ್ರವಾಸಿಗನಿಗೆ ಅಲ್ಲಿನ ನುಣುಪಾದ ರಸ್ತೆಗಳು, ಪ್ರತಿ ತಿರುವಿನಲ್ಲೂ ಇರುವ ನಿಖರವಾದ ಸೈನ್ ಬೋರ್ಡ್‌ಗಳು ಮತ್ತು ಸುಸಜ್ಜಿತ ಪ್ರವಾಸಿ ಮಾಹಿತಿ ಕೇಂದ್ರಗಳು ಆತ್ಮವಿಶ್ವಾಸ ನೀಡುತ್ತವೆ. ಭಾರತದಲ್ಲಿ ಅನೇಕ ಸುಂದರ ತಾಣಗಳಿದ್ದರೂ, ಸರಿಯಾದ ದಾರಿ ತೋರಿಸುವ ಫಲಕಗಳಿಲ್ಲದೇ ಅಥವಾ ಶುಚಿಯಾದ ಸೌಲಭ್ಯಗಳಿಲ್ಲದೇ ಪ್ರವಾಸಿಗರು ಪರದಾಡುತ್ತಾರೆ. ಅಂತಾರಾಷ್ಟ್ರೀಯ ಮಟ್ಟದ ಮೂಲಸೌಕರ್ಯ ಮತ್ತು 'ಡಿಜಿಟಲ್ ಕನೆಕ್ಟಿವಿಟಿ'ಯನ್ನು ಒದಗಿಸುವುದು ನಮ್ಮ ಮೊದಲ ಆದ್ಯತೆಯಾಗಬೇಕು.

ಇದನ್ನೂ ಓದಿ: ಅವಕಾಶಗಳು ಪ್ರವಾಸೋದ್ಯಮದಲ್ಲಿ ತೆರೆದುಕೊಳ್ಳುವಷ್ಟು ಬೇರೆಲ್ಲೂ ತೆರೆದುಕೊಳ್ಳಲಾರವು!

ದಕ್ಷಿಣ ಆಫ್ರಿಕಾವು ತನ್ನ ವರ್ಣಭೇದ ನೀತಿಯ ಕರಾಳ ದಿನಗಳನ್ನೂ 'ಪವಿತ್ರ ಇತಿಹಾಸ'ವನ್ನಾಗಿ ಪ್ರಸ್ತುತಪಡಿಸಿದೆ. ನೆಲ್ಸನ್ ಮಂಡೇಲಾ ಅವರ ಜೈಲು ಕೋಣೆಯನ್ನು ನೋಡುವುದು ಪ್ರತಿಯೊಬ್ಬ ಪ್ರವಾಸಿಯ ಪಾಲಿಗೆ ಒಂದು ಭಾವನಾತ್ಮಕ ಕ್ಷಣ. ಭಾರತಕ್ಕೆ ಸುದೀರ್ಘವಾದ ಸ್ವಾತಂತ್ರ್ಯ ಹೋರಾಟದ ಇತಿಹಾಸವಿದೆ. ಅಂಡಮಾನ್‌ನ ಸೆಲ್ಯುಲಾರ್ ಜೈಲು ಅಥವಾ ಸಾಬರಮತಿ ಆಶ್ರಮದಂಥ ಸ್ಥಳಗಳನ್ನು ಜಾಗತಿಕ ಮಟ್ಟದಲ್ಲಿ ಇನ್ನೂ ಹೆಚ್ಚು ಪರಿಣಾಮಕಾರಿಯಾಗಿ ಬ್ರಾಂಡ್ ಮಾಡಬಹುದು. ಇತಿಹಾಸವನ್ನು ಕೇವಲ ಕಲ್ಲು-ಕಟ್ಟಡಗಳನ್ನಾಗಿ ನೋಡದೇ, ಅವುಗಳ ಹಿಂದಿನ 'ಕಥೆ'ಗಳನ್ನು ಮಾರಾಟ ಮಾಡುವ ಕಲೆ ನಮಗೆ ಸಿದ್ಧಿಸಬೇಕು. ಯಾವುದೇ ಪ್ರವಾಸಿ ತಾಣ ಯಶಸ್ವಿಯಾಗಬೇಕಾದರೆ ಅಲ್ಲಿನ ಸ್ಥಳೀಯರು ಅದನ್ನು ಪ್ರೀತಿಸಬೇಕು. ದಕ್ಷಿಣ ಆಫ್ರಿಕಾದಲ್ಲಿ ಸ್ಥಳೀಯ ಬುಡಕಟ್ಟು ಜನರಿಗೆ ಗೈಡ್‌ಗಳಾಗಿ, ಕರಕುಶಲ ವಸ್ತುಗಳ ಮಾರಾಟಗಾರರಾಗಿ ಮತ್ತು ಹೊಟೇಲ್ ಉದ್ಯಮದಲ್ಲಿ ಹೆಚ್ಚಿನ ಪಾಲು ನೀಡಲಾಗಿದೆ. ಇದರಿಂದ ಪ್ರವಾಸಿಗರಿಗೆ ಹೆಚ್ಚಿನ ಭದ್ರತೆ ಮತ್ತು ಆತ್ಮೀಯತೆ ಸಿಗುತ್ತದೆ. ಭಾರತದ ಗ್ರಾಮೀಣ ಭಾಗಗಳಲ್ಲಿ ಪ್ರವಾಸೋದ್ಯಮ ಬೆಳೆದಾಗ, ಅಲ್ಲಿನ ಯುವಕರಿಗೆ ಉದ್ಯೋಗ ದೊರೆತರೆ ಮಾತ್ರ ಆ ತಾಣಗಳು ದೀರ್ಘಕಾಲದವರೆಗೆ ಸುಸ್ಥಿರವಾಗಿರಲು ಸಾಧ್ಯ.

ಪ್ರತಿ ವರ್ಷ ಭಾರತಕ್ಕೆ ಸುಮಾರು 90 ಲಕ್ಷ ವಿದೇಶಿ ಪ್ರವಾಸಿಗರು ಭೇಟಿ ನೀಡುತ್ತಾರೆ. ದಕ್ಷಿಣ ಆಫ್ರಿಕಾಕ್ಕೆ ಭೇಟಿ ನೀಡುವವರ ಸಂಖ್ಯೆಯೂ ಹೆಚ್ಚು-ಕಮ್ಮಿ ಇಷ್ಟೇ. ಪ್ರವಾಸೋದ್ಯಮವು ದಕ್ಷಿಣ ಆಫ್ರಿಕಾದ ಒಟ್ಟು ಜಿಡಿಪಿಗೆ ಸುಮಾರು ಶೇ.9 ರಷ್ಟು ಕೊಡುಗೆ ನೀಡುತ್ತದೆ. ಭಾರತದ ಒಟ್ಟು ಜಿಡಿಪಿಗೆ ಪ್ರವಾಸೋದ್ಯಮವು ಸುಮಾರು ಶೇ.5.8 ರಷ್ಟು ಕೊಡುಗೆ ನೀಡುತ್ತದೆ. ದಕ್ಷಿಣ ಆಫ್ರಿಕಾದ ಯಶಸ್ಸಿನ ಗುಟ್ಟು ಇರುವುದು ಅದರ 'ಸೃಜನಶೀಲತೆ' ಮತ್ತು 'ವೈಜ್ಞಾನಿಕ ನಿರ್ವಹಣೆ'ಯಲ್ಲಿ. ಒಂದು ದೇಶದ ನೈಸರ್ಗಿಕ ಸಂಪತ್ತನ್ನು ಆರ್ಥಿಕ ಶಕ್ತಿಯಾಗಿ ಬದಲಾಯಿಸುವುದು ಹೇಗೆ ಎಂಬುದಕ್ಕೆ ದಕ್ಷಿಣ ಆಫ್ರಿಕಾ ಒಂದು ಅತ್ಯುತ್ತಮ ಉದಾಹರಣೆ. ಮರುಭೂಮಿ ಮತ್ತು ಹಿಮಾಲಯ ಹೊರತುಪಡಿಸಿ ಮತ್ತೆಲ್ಲ ನೈಸರ್ಗಿಕ ವರವನ್ನು ಹೊಂದಿರುವ ಕರ್ನಾಟಕ ಇಂಥ ಜಾಗತಿಕ ಮಾದರಿಗಳಿಂದ ಕಲಿಯುವುದು ಬಹಳಷ್ಟಿದೆ.