ದಾರಿ ತಪ್ಪಿದರೂ ಊರು ಸುತ್ತಬೇಕು

• ರಶ್ಮಿ ಉಳಿಯಾರು

ಲೇಖಕರು ಮತ್ತು ಅವರ ಕಾಳಿಂಗ (ರಾಯಲ್ ಎನ್‌ಫೀಲ್ಡ್‌ ಬೈಕು) ಜತೆ ಸೇರಿ ಎಲ್ಲೆಲ್ಲೊ ಅಲೆದಾಡುತ್ತಾ ಪಡೆದ ಜೀವಾನುಭವ, ವಿಶಿಷ್ಟ ಸಂಗತಿಗಳ ಗ್ರಹಿಕೆ, ಜನರ ಅರಿವಿಗೆ ಇನ್ನೂ ಬರದ ವಿಶೇಷ ವಿಷಯಗಳ ಸಂಗ್ರಹ ಈ ಕೃತಿ. ಈ ಮೊದಲು 'ದಾರಿ ತಪ್ಪಿಸು ದೇವರೇ' ಎಂಬ ಫೇಸ್‌ಬುಕ್‌ ಪುಟದಲ್ಲಿ ಇವೆಲ್ಲ ವಿಷಯಗಳನ್ನು ಬರೆಯುತ್ತಿದ್ದ ಅವರು ಉಪನ್ಯಾಸಕ ವೃತ್ತಿಯನ್ನು ತೊರೆದು ಮುಂದೆ 'ಉಡುಪಿಯ ಕಂಡೀರಾ' ಎಂದು ಬದಲಾಯಿಸಿ ಕಂಟೆಂಟ್ ಕ್ರಿಯೇಶನ್ ಶುರು ಮಾಡಿದರು. ನಮಗೆ ಕಾಣದ ಉಡುಪಿಯನ್ನು ಪರಿಚಯಿಸುವ ಅವರ ಹೊಸ ಪ್ರಯತ್ನಕ್ಕೆ ಈಗ ಸಾವಿರಾರು ಜನ ಅಭಿಮಾನಿಗಳಿದ್ದಾರೆ. ಉಡುಪಿ ಎನ್ನುವುದು ಮೊಗೆದಷ್ಟೂ ಮುಗಿಯದ ಪ್ರವಾಸಿ ತಾಣಗಳ ಆಗರ ಎನ್ನುವುದು ಸ್ಪಷ್ಟವಾಗುತ್ತದೆ.

ಚಂದದ ಮುಖಪುಟ ಹೊಂದಿರುವ ಇದು ಒಟ್ಟು 45 ಚಿಕ್ಕ ಚಿಕ್ಕ ಬರಹಗಳನ್ನು ಒಳಗೊಂಡ ಸಂಕಲನ. ನಾವು ಸಾಮಾನ್ಯವಾಗಿ ʼದಾರಿ ತಪ್ಪಿಸು ದೇವರೇʼ ಅಂತ ಬೇಡುವುದಿಲ್ಲ. ಸರಿದಾರಿಯಲ್ಲಿ ನಡೆಸು ಎನ್ನುವುದೇ ನಮ್ಮೆಲ್ಲರ ಪ್ರಾರ್ಥನೆ. ಆದರೆ ಇದೊಂದು ಪ್ರವಾಸಿ ಮತ್ತು ಜೀವನ ಕಥನವಾದ ಕಾರಣ ಹೀಗೆ ಎಲ್ಲೆಲ್ಲೋ ಯೋಜನೆ ಮಾಡದೇ ಭೇಟಿ‌ಕೊಟ್ಟ ಜಾಗಗಳು ಮತ್ತು ಜನರ ಬಗ್ಗೆ ಲೇಖಕರು ತುಂಬಾ ಸೊಗಸಾದ ಶೈಲಿಯಲ್ಲಿ ಬರೆದಿದ್ದಾರೆ. ಇದರಲ್ಲಿ ಇರುವ ಹೆಚ್ಚಿನ ಲೇಖನಗಳು ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಸುತ್ತಮುತ್ತಲಿನ ಸ್ಥಳಗಳ ಕುರಿತಾಗಿದೆ. ಇದರ ಜತೆಗೆ ಕುದುರೆಮುಖ ಸಹ ಇದೆ.

ಇದನ್ನೂ ಓದಿ: ಚಿನ್ನ ಚಿನ್ನ ಆಸೈ …

ಎಲ್ಲರೂ ನಡೆದ ದಾರಿಯಲ್ಲಿ ನಡೆದು, ನೋಡಿದ ಜಾಗಗಳನ್ನು ನೋಡುವುದೇ ಒಂದು ಅನುಭವವಾದರೆ, ಯಾರೂ ಹೋಗದ ಜಾಗಗಳನ್ನು ಹುಡುಕಿಕೊಂಡು ಹೋಗುವುದು ಅಥವಾ ಒಂದು ರೀತಿಯಲ್ಲಿ ದಾರಿ ತಪ್ಪುವುದು ಬೇರೆಯೇ ಆಯಾಮದ ಅನುಭವ. ಅಂಥ ಓದು ಇಲ್ಲಿ ಸಿಗುತ್ತದೆ‌. ಇಲ್ಲಿ ಸಾಮಾನ್ಯ ಜನರ ಜತೆಗಿನ ಒಡನಾಟವೂ ಇದೆ.‌ ಸಾಮಾನ್ಯವಾಗಿ ನಮ್ಮ ತುಳುನಾಡಿನಲ್ಲಿ ಸಹಜವಾಗಿ ನಡೆಯುವ ಮಾತುಕತೆಗಳನ್ನು, ಪರಿಸರ ಕಾಳಜಿಯನ್ನು, ತಮ್ಮ ಸ್ಥಳೀಯ ಸಂಸ್ಕೃತಿಯ ಬಗ್ಗೆ ಇರುವ ಅಭಿಮಾನವನ್ನು ಇಲ್ಲಿ ಕಾಣಬಹುದು.

ಒಂದೆಡೆ ದೈವಿಕವಾದ ನಾಗನ ಬಗೆಗಿನ‌ ಅಭಿಪ್ರಾಯ ಇದ್ದರೆ, ಪಂಡಿತ ರಮಾಬಾಯಿ ಎಂಬ ಕಿಂಡರ್ ಗಾರ್ಟನ್ ಅನ್ನು ಭಾರತಕ್ಕೆ ಪರಿಚಯಿಸಿದ, ಪ್ರತಿಭಾವಂತೆ ಬಗ್ಗೆ ಇನ್ನೊಂದು ಕಡೆ ಇದೆ. ಬೆಳ್ತಂಗಡಿಯ ಕೊಲ್ಲಿ ಎಂಬ ಹಸಿರು ಭೂಮಿಯ ಜನರ ಬದುಕು, ಬವಣೆಗಳು ಒಂದೆಡೆ ಕಂಡರೆ, ಮತ್ತೊಂದು ಕಡೆ ತುಳುನಾಡಿನ ಕೇಪುಳ ಹೂವು, ಹಣ್ಣು, ಕುಂಟಲ ಹಣ್ಣು, ಎಕ್ಕಮಲೆ ಹೂವು, ಮಲ್ಲಿಗೆಗಳ ಬಗ್ಗೆ ಇದೆ. ಕುರಿಂಗಲ್ಲು ಬೆಟ್ಟ, ಕುದುರೆಮುಖ, ಅಪರೂಪದ ನೇತ್ರಾಣಿ ದ್ವೀಪ ಮತ್ತು ಮೀನುಗಾರರ ಹರಕೆ ಪದ್ಧತಿ, 'ಸಂಸ್ಕಾರ'ದಲ್ಲಿ ಚಿತ್ರಣವಾದ ಶೃಂಗೇರಿಯ ವೈಕುಂಠಪುರ ಅಗ್ರಹಾರ, ಮಂಗಳಮುಖಿಯರ ಜೀವನ ಪರಿವರ್ತನೆಯ ಯಾನ, ಆಧುನಿಕ ಕಾಲದಲ್ಲೂ ಕಡಾರಿ ಎಂಬಲ್ಲಿ ಇರುವ ಕೂಡು ಕುಟುಂಬದ ಕಥೆ, ಕೆಮ್ಮಣ್ಣು ಪಡು ತೋನ್ಸೆಯ ಸುಂದರ ತಾಣ, ಮತ್ಸ್ಯಾಹಾರ ದೊರಕುವ ಸ್ಥಳಗಳು... ಇವೆಲ್ಲವನ್ನೂ ಪರಿಚಯಿಸುವ ಜತೆಗೆ ತಮ್ಮ ಕೆಲವು ವೈಯಕ್ತಿಕ ಅನುಭವಗಳನ್ನು ಕೂಡ ಚಿತ್ರಿಸಿದ್ದಾರೆ.

ಇದರಲ್ಲಿ ಎರಡು ಅಧ್ಯಾಯಗಳು ಮನ ಮುಟ್ಟಿದವು. ಉಡುಪಿಯಲ್ಲಿ ಇದ್ದ ಶ್ರೀಲಕ್ಷ್ಮಿ ಎಂಬ ಮಠದ ಪಟ್ಟದಾನೆ ಸಕ್ಕರೆ ಕಾಯಿಲೆಯಿಂದ ಸಕ್ರೆಬೈಲು ಕ್ಯಾಂಪ್ ಸೇರಿತು. ಆದಾಗ್ಯೂ, ಉಡುಪಿ ಎಂಬ ಶಬ್ದ ಹಾಗೂ ಆಕೆಯ ಹೆಸರನ್ನು ಕರೆದಾಗ, ಓಡಿ ಬಂದು, ಪಕ್ಕ ನಿಂತು ಕಾಮತರ ಗೆಳೆಯನಿಗೆ ಆಶೀರ್ವಾದ ಮಾಡಿದಾಗ ಅವರಿಗೆ ಹೃದಯವೇ ಬಾಯಿಗೆ ಬಂದಂತಾಯಿತು. ಈ ಘಟನೆ ಹಾಗೂ ಇನ್ನೊಂದು- ಹೀಗೆ ಸೂರ್ಯಾಸ್ತ ನೋಡುತ್ತಿದ್ದ ಲೇಖಕರಿಗೆ ಪೆಟ್ರೋಲ್ ಖಾಲಿಯಾಗಿ, ಬೈಕು ತಳ್ಳುತ್ತಾ ಬರುತ್ತಿದ್ದ ವ್ಯಕ್ತಿ ಹೇಳಿದ ತನ್ನ ಡಯಾಲಿಸಿಸ್‌ನ ಕರುಣಾಜನಕ ಕಥೆ. ಆಸ್ಪತ್ರೆಯಿಂದ ಬರುತ್ತಾ, ಕೈಯಲ್ಲಿ ಬ್ಯಾಂಡೇಜ್ ಹಾಕಿಕೊಂಡರೂ, ನೂಕುತ್ತಾ ಬರುವ ಸ್ವಾಭಿಮಾನಿಯಾದ ಆತ, ತನ್ನದೇ ನಿರ್ಲಕ್ಷ್ಯದಿಂದ ತಂದುಕೊಂಡ ಕಿಡ್ನಿ ಸಮಸ್ಯೆಯ ಶೋಚನೀಯ ಪರಿಸ್ಥಿತಿಯನ್ನು ಓದುವಾಗ ಮನಸು ಒದ್ದಾಡಿತು.

ನೀವು ಉಡುಪಿ ಮಂಗಳೂರು ಸುತ್ತಾಡಲು ಇಷ್ಟಪಡುವವರಾದರೆ ಹಾಗೂ ಸಾಮಾನ್ಯವಾಗಿ ಎಲ್ಲರಿಗೂ ಗೊತ್ತಿರುವುದಕ್ಕಿಂತ ಭಿನ್ನವಾದ ಪರಿಚಯವಿಲ್ಲದ ಸ್ಥಳಗಳನ್ನು ಭೇಟಿ ಮಾಡಲು ಬಯಸುವವರಾದರೆ ಇದೊಂದು ಒಳ್ಳೆಯ ಓದು. ನಮ್ಮೂರಿನ ಬೇರೊಂದು ನೋಟ ನಿಮಗೂ ದಕ್ಕಬಹುದು.

ಕೃತಿ ವಿವರ:

ದಾರಿ ತಪ್ಪಿಸು ದೇವರೇ!

ಲೇಖಕರು: ಮಂಜುನಾಥ ಕಾಮತ್

ಬಿಳಿಕಲ್ಲು ಪ್ರಕಾಶನ(2018/ಮೂರು ಮುದ್ರಣಗಳು)

120 ಪುಟಗಳು

200 ರು.