ಗಿನ್ನಿಸ್ ವಿಶ್ವ ದಾಖಲೆ ಬರೆದ ಜೊನಾಥಾನ್

ರಾಣಿ ವಿಕ್ಟೋರಿಯಾ ಆಳ್ವಿಕೆ ಮುಗಿಯುವ ಮೊದಲು ಜನಿಸಿ, ಎಐ ಕಾಲದಲ್ಲಿಯೂ ಬದುಕುಳಿದ ಜೊನಾಥಾನ್​ ಎಂಬ ಆಮೆ ಸದ್ಯ ವಿಶ್ವ ದಾಖಲೆ ಮಾಡಿದೆ. 194 ವರ್ಷ ಬದುಕುಳಿದು 2026ರ ಗಿನ್ನಿಸ್ ವಿಶ್ವ ದಾಖಲೆಯ ಐಕಾನ್​ ಎಂದು ಹೆಸರು ಪಡೆದುಕೊಂಡಿದೆ. ವಿಶ್ವದ ಅತ್ಯಂತ ಹಳೆಯ ಜೀವಂತ ಪ್ರಾಣಿಯೆನಿಸಿರುವ ಈ ಜೊನಾಥಾನ್​​ ಇತಿಹಾಸದಲ್ಲಿ ಅತ್ಯಂತ ಅಸಾಧಾರ ದಾಖಲೆ ಹೊಂದಿರುವವರ ಸಾಲಿನಲ್ಲಿ ಸ್ಥಾನ ಪಡೆದಿದೆ.

ದಕ್ಷಿಣ ಅಟ್ಲಾಂಟಿಕ್​ ಮಹಾಸಾಗರದ ಸೇಂಟ್ ಹೆಲೆನಾ ದ್ವೀಪದಲ್ಲಿ ವಾಸಿಸುತ್ತಿರುವ ಈ ಆಮೆಯು ಸುಮಾರು 1832 ರಲ್ಲಿ ಜನಿಸಿತ್ತು ಎನ್ನಲಾಗಿದೆ. ಆದರೆ ಇದರ ಜನನದ ಬಗೆಗೆ ನಿಖರ ಮಾಹಿತಿ ತಿಳಿದಿಲ್ಲ. ಆದರೆ ಇದರ ರಕ್ಷಣೆಗೆಂದು ಇರುವ ಚಿಪ್ಪನ್ನು ನೋಡಿ ಪರಿಶೀಲನೆ ಮಾಡುವ ಮೂಲಕ ಇದರ ಆಯಸ್ಸನ್ನು ಪತ್ತೆ ಹಚ್ಚಬಹುದು ಎನ್ನುತ್ತಾರೆ ತಜ್ಞರು. ಜೊನಾಥಾನ್​ ಆಮೆಗೆ ಕಣ್ಣಿನ ಪೊರೆ ಬಂದಿರುವ ಕಾರಣ ಕಣ್ಣು ಅಷ್ಟಾಗಿ ಕಾಣೋದಿಲ್ಲ. ಆದರೆ, ಕಿವಿ ಮಾತ್ರ ಚುರುಕು. ಯಾರು ಏನೇ ಮಾತನಾಡಿದರು ಗ್ರಹಿಸುವ ಶಕ್ತಿ ಇದಕ್ಕಿದೆ. ಜೊನಾಥನ್​ಗಾಗಿ ವಿಶೇಷ ವೈದ್ಯರನ್ನು ನೇಮಕ ಮಾಡಲಾಗಿದ್ದು, ಇದು ಐವತ್ತು ವರ್ಷದಲ್ಲಿದ್ದಾಗ ಇದನ್ನು ಸೇಂಟ್​ ಹೆಲನಾಗೆ ತರಲಾಯಿತು ಎನ್ನಲಾಗಿದೆ.