ಪಾಟ್ನಾದಲ್ಲಿರುವ ʻಬಿಹಾರ ಮ್ಯೂಸಿಯಂʼ ತನ್ನ ಅಪೂರ್ವ ಕಲಾ ಸಂಗ್ರಹ, ಇತಿಹಾಸ ಮತ್ತು ಸಾಂಸ್ಕೃತಿಕ ಪರಂಪರೆಯ ಮೂಲಕ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದೆ. ಐತಿಹಾಸಿಕ ಕಲಾಕೃತಿಗಳು, ಶಿಲ್ಪಗಳು, ಚಿತ್ರಕಲೆಗಳು ಹಾಗೂ ಇತರ ಅಮೂಲ್ಯ ವಸ್ತುಗಳ ಮೂಲಕ ಬಿಹಾರದ ಶ್ರೀಮಂತ ಪರಂಪರೆಯನ್ನು ಈ ಮ್ಯೂಸಿಯಂ ಪರಿಚಯಿಸುತ್ತದೆ. ಈ ನಿಟ್ಟಿನಲ್ಲಿ ಏಷ್ಯಾದಲ್ಲಿ ಮೊದಲ ಸ್ಥಾನ ಹಾಗೂ ವಿಶ್ವಮಟ್ಟದಲ್ಲಿ ಒಂಬತ್ತನೇ ಸ್ಥಾನವನ್ನು ಬಿಹಾರ ಮ್ಯೂಸಿಯಂ ಪಡೆದುಕೊಂಡಿದೆ. ಜಾಗತಿಕ ಟಾಪ್‌ 10 ಮ್ಯೂಸಿಯಂಗಳ ಪಟ್ಟಿಯಲ್ಲಿ ಸ್ಥಾನ ಪಡೆದ ಭಾರತದ ಏಕೈಕ ಮ್ಯೂಸಿಯಂ ಎಂಬ ಹೆಗ್ಗಳಿಕೆಯನ್ನೂ ಇದು ಹೊಂದಿದೆ. ಈ ಮಾನ್ಯತೆ ಸಾಂಸ್ಕೃತಿಕ ಪರಂಪರೆಯನ್ನು ಸಂರಕ್ಷಿಸುವುದರ ಮಹತ್ವವನ್ನು ಸಾರುವುದರ ಜತೆಗೆ, ಭಾರತದ ಐತಿಹಾಸಿಕ ವೈಭವವನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪರಿಚಯಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತದೆ.