ನಷ್ಟದ ಪ್ರಮಾಣ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಏರ್‌ ಇಂಡಿಯಾ ತನ್ನ ಮಾಲೀಕರಾದ ಟಾಟಾ ಸನ್ಸ್‌ ಮತ್ತು ಸಿಂಗಾಪುರ್ ಏರ್‌ಲೈನ್ಸ್‌ನಿಂದ ಸುಮಾರು $1.5 ಬಿಲಿಯನ್‌ (ಸುಮಾರು ₹13,000 ಕೋಟಿ) ಹೆಚ್ಚುವರಿ ಬಂಡವಾಳವನ್ನು ಕೋರಿದೆ ಎಂದು ರಾಯಿಟರ್ಸ್‌ ವರದಿ ಮಾಡಿದೆ.

ಏರ್‌ ಇಂಡಿಯಾ ಮತ್ತು ಅದರ ಬಜೆಟ್‌ ವಿಮಾನಯಾನ ಸಂಸ್ಥೆ ಏರ್‌ ಇಂಡಿಯಾ ಎಕ್ಸ್‌ಪ್ರೆಸ್‌ 2026ರ ಮಾರ್ಚ್‌ಗೆ ಅಂತ್ಯಗೊಂಡ ಹಣಕಾಸು ವರ್ಷದಲ್ಲಿ ಒಟ್ಟಾಗಿ $2.33 ಬಿಲಿಯನ್‌ ನಷ್ಟ ದಾಖಲಿಸಿವೆ. ಇದು ಹಿಂದಿನ ವರ್ಷದ ನಷ್ಟಕ್ಕಿಂತ ಎರಡು ಪಟ್ಟು ಹೆಚ್ಚಾಗಿದೆ.

ಬಹುಕೋಟಿ ಡಾಲರ್‌ಗಳ ಪುನರ್‌ವ್ಯವಸ್ಥೆ ಯೋಜನೆಯ ಭಾಗವಾಗಿ ಹಳೆಯ ವಿಮಾನಗಳ ನವೀಕರಣ, ಫ್ಲೀಟ್‌ ಸುಧಾರಣೆ ಮತ್ತು ಸಂಸ್ಥೆಯ ಸಮಗ್ರ ಪರಿವರ್ತನೆಗೆ ಏರ್‌ ಇಂಡಿಯಾ ಹೆಚ್ಚಿನ ಹಣ ಹೂಡುತ್ತಿದೆ. ಹೊಸ ಬಂಡವಾಳವನ್ನು ತಕ್ಷಣವೇ ಪಡೆಯುವ ಉದ್ದೇಶವಿದ್ದು, ಹಣವನ್ನು ಹಂತ ಹಂತವಾಗಿ ಹೂಡಿಕೆ ಮಾಡುವ ಸಾಧ್ಯತೆಯಿದೆ. ಪ್ರಸ್ತಾವನೆ ಜಾರಿಯಾಗಬೇಕಾದರೆ ಏರ್‌ ಇಂಡಿಯಾದಲ್ಲಿ ಸುಮಾರು 25% ಪಾಲು ಹೊಂದಿರುವ ಸಿಂಗಾಪುರ್ ಏರ್‌ಲೈನ್ಸ್‌ ತನ್ನ ಪಾಲಿನ ಬಂಡವಾಳವನ್ನು ನೀಡಬೇಕಾಗುತ್ತದೆ.

ಪಾಕಿಸ್ತಾನದ ವಾಯುಪ್ರದೇಶ ಭಾರತೀಯ ವಿಮಾನಗಳಿಗೆ ಮುಚ್ಚಿರುವುದು, ಅಮೆರಿಕ–ಇಸ್ರೇಲ್‌ ಮತ್ತು ಇರಾನ್‌ ನಡುವಿನ ಸಂಘರ್ಷದಿಂದ ಅಂತಾರಾಷ್ಟ್ರೀಯ ವಿಮಾನ ಜಾಲಕ್ಕೆ ಉಂಟಾದ ವ್ಯತ್ಯಯ ಹಾಗೂ ಕಳೆದ ವರ್ಷದ ಭೀಕರ ವಿಮಾನ ಅಪಘಾತವೂ ಏರ್‌ ಇಂಡಿಯಾದ ಹಣಕಾಸಿನ ಮೇಲೆ ಪರಿಣಾಮ ಬೀರಿವೆ.

ಸದ್ಯ ಬಂಡವಾಳ ಹೂಡಿಕೆ ಕುರಿತು ಮಾತುಕತೆ ನಡೆಯುತ್ತಿದ್ದು, ಅಂತಿಮ ನಿರ್ಧಾರ ಕೈಗೊಳ್ಳಲಾಗಿಲ್ಲ. ಏರ್‌ ಇಂಡಿಯಾದ ಪುನರುಜ್ಜೀವನಕ್ಕೆ ಇನ್ನೂ ಹಲವು ವರ್ಷಗಳು ಬೇಕಾಗಬಹುದು ಎಂದು ಟಾಟಾ ಸಮೂಹದ ಅಧ್ಯಕ್ಷ ಎನ್‌. ಚಂದ್ರಶೇಖರನ್‌ ಈ ಹಿಂದೆ ಹೇಳಿದ್ದರು.