ಬಾಲಿವುಡ್ ನಟ ಅರ್ಷದ್ ವಾರ್ಸಿ ಮತ್ತು ಅವರ ಪತ್ನಿ ಮಾರಿಯಾ ಗೊರೆಟ್ಟಿ ತಮ್ಮ 150 ವರ್ಷಗಳಷ್ಟು ಹಳೆಯ ಪೋರ್ಚುಗೀಸ್ ಶೈಲಿಯ ಗೋವಾ ಮನೆಯನ್ನು ಪ್ರವಾಸಿಗರಿಗೆ ಬಾಡಿಗೆಗೆ ನೀಡಲು ಮುಂದಾಗಿದ್ದಾರೆ. ಉತ್ತರ ಗೋವಾದ ಸಾಲಿಗಾವ್ ಪ್ರದೇಶದಲ್ಲಿರುವ ಈ ಪರಂಪರೆಯ ವಿಲ್ಲಾಗೆ 'ಕಾಸಾ ಝೆನ್' (Casa Zen) ಎಂದು ಹೆಸರು ಇಡಲಾಗಿದೆ. ಈ ಐದು ಮಲಗುವ ಕೋಣೆಗಳ ವಿಲ್ಲಾದಲ್ಲಿ ತಂಗಲು ಒಂದು ರಾತ್ರಿ 75,000 ರು. (ತೆರಿಗೆ ಪ್ರತ್ಯೇಕ) ಶುಲ್ಕ ನಿಗದಿಪಡಿಸಲಾಗಿದೆ.

Untitled design - 2026-07-28T150803.152

ಸುಮಾರು ಒಂದೂವರೆ ಶತಮಾನದ ಇತಿಹಾಸ ಹೊಂದಿರುವ ಈ ಮನೆಯನ್ನು ಮರುನಿರ್ಮಾಣ ಮಾಡುವಾಗ ಅದರ ಮೂಲ ಪೋರ್ಚುಗೀಸ್ ವಾಸ್ತುಶೈಲಿಯನ್ನು ಉಳಿಸಿಕೊಳ್ಳಲಾಗಿದೆ. ಮನೆಯ ಒಳಾಂಗಣದಲ್ಲಿ ಪಾರಂಪರಿಕ ಪೀಠೋಪಕರಣಗಳು, ಕುಟುಂಬದ ಪರಂಪರೆಯ ವಸ್ತುಗಳು, ಪುರಾತನ ಅಲಮಾರಿಗಳು, ಬಣ್ಣ-ಬಣ್ಣದ ಅಲಂಕಾರ ಹಾಗೂ ಕಲಾಕೃತಿಗಳನ್ನು ಅಂದವಾಗಿ ಸಂಯೋಜಿಸಲಾಗಿದೆ. ಮನೆಯ ವಿನ್ಯಾಸದಲ್ಲಿ ಮರಿಯಾ ಗೊರೆಟ್ಟಿ ಅವರ ವೈಯಕ್ತಿಕ ಸ್ಪರ್ಶವೂ ಕಾಣಿಸುತ್ತದೆ.

ವಿಲ್ಲಾದ ಆವರಣದಲ್ಲಿ ಹಸಿರಿನಿಂದ ಕಂಗೊಳಿಸುವ ತೋಟ, ಹಳೆಯ ಮಾವಿನ ಮರ, ವಿಶಾಲ ವರಾಂಡಾಗಳು ಮತ್ತು ಹೊರಾಂಗಣ ವಿಶ್ರಾಂತಿ ಪ್ರದೇಶಗಳಿವೆ. ಆಧುನಿಕ ಸೌಲಭ್ಯಗಳ ಜೊತೆಗೆ ಪರಿಸರ ಸ್ನೇಹಿ ದೃಷ್ಟಿಯಿಂದ ಸೌರ ಫಲಕಗಳನ್ನೂ ಅಳವಡಿಸಲಾಗಿದೆ. ಪರಂಪರೆ ಮತ್ತು ಆಧುನಿಕ ಸೌಕರ್ಯಗಳ ಸಮತೋಲನವನ್ನು ಒದಗಿಸುವ ಈ ವಿಲ್ಲಾವನ್ನು ಈಗ ಪ್ರವಾಸಿಗರು ಹಾಲಿಡೇ ರೆಂಟಲ್ ರೂಪದಲ್ಲಿ ಬುಕ್ ಮಾಡಿಕೊಂಡು ಗೋವಾದ ವಿಶಿಷ್ಟ ಪರಂಪರೆಯ ಅನುಭವವನ್ನು ಪಡೆಯಬಹುದು.