ನಮಸ್ಕಾರ ದೇವ್ರು ಟು ಗೋ ಪ್ರವಾಸ

ಒಬ್ಬ ಸಾಮಾನ್ಯ ಕನ್ನಡ ಹುಡುಗ, ಕ್ಯಾಮೆರಾ ಹಿಡಿದು ಜಗತ್ತು ಸುತ್ತಿ, ಇಂದು ಸಾವಿರಾರು ಜನರನ್ನು ಜಗತ್ತು ಸುತ್ತಿಸುವ ಉದ್ಯಮಿಯಾಗಿ ಬೆಳೆದ ಕಥೆ - ಗಗನ್ ಶ್ರೀನಿವಾಸ್ ಅಲಿಯಾಸ್ ಡಾಕ್ಟರ್‌ ಬ್ರೋ ಮತ್ತು ಅವರ ಗೋ ಪ್ರವಾಸ ಕಂಪೆನಿಯ ಪಯಣ.

ಕನ್ನಡ ಡಿಜಿಟಲ್ ಜಗತ್ತಿನಲ್ಲಿ ‘ನಮಸ್ಕಾರ ದೇವ್ರು’ ಎಂಬ ಎರಡು ಪದಗಳನ್ನು ಕೇಳಿದ ತಕ್ಷಣ ಎಲ್ಲರ ತಲೆಯಲ್ಲಿ ಮೂಡುವ ಹೆಸರು ಒಂದೇ - ಡಾಕ್ಟರ್ ಬ್ರೋ. ಸ್ಮಾರ್ಟ್‌ಫೋನ್ ಬಳಸುವ ಯಾವ ಕನ್ನಡಿಗನಿಗೂ ಈ ಹೆಸರು ಗೊತ್ತಿಲ್ಲದೇ ಇರುವುದು ಅಪರೂಪ. ಇಂದು ಇನ್‌ಸ್ಟಾಗ್ರಾಮ್‌, ಯೂಟ್ಯೂಬ್ ಮತ್ತು ಫೇಸ್‌ಬುಕ್ ಸೇರಿ ಸುಮಾರು 30 ಲಕ್ಷಕ್ಕೂ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಈ ಟ್ರಾವೆಲ್ ವ್ಲಾಗರ್, ಕೇವಲ ಪ್ರವಾಸ ವಿಡಿಯೋಗಳಿಗೆ ಮಾತ್ರ ಸೀಮಿತವಾಗದೆ, 'ಗೋ ಪ್ರವಾಸ' ಎಂಬ ಪ್ರಯಾಣ ಸಂಸ್ಥೆಯನ್ನು ಕಟ್ಟಿ, ಒಬ್ಬ ಪೂರ್ಣ ಪ್ರಮಾಣದ ಉದ್ಯಮಿಯಾಗಿ ಬೆಳೆದಿದ್ದಾರೆ. ಗಗನ್ ಶ್ರೀನಿವಾಸ್ ಅವರ ಬಾಲ್ಯ, ಯೂಟ್ಯೂಬ್ ಪಯಣ, ಮತ್ತು ಗೋ ಪ್ರವಾಸ ಕಂಪನಿ ಕಟ್ಟುವ ಹಿಂದಿನ ಕನಸು-ಸವಾಲುಗಳ ಸಂಕ್ಷಿಪ್ತ ಚಿತ್ರಣ ಪ್ರವಾಸಿ ಪ್ರಪಂಚದ ಓದುಗರ ಮುಂದೆ ಇಡುತ್ತಿದ್ದೇವೆ.

ಇದನ್ನೂ ಓದಿ: ಎರಡು ಎಲೆ ಒಂದು ಮೊಗ್ಗು .. ಟೀ, ಕಾಫಿಯ ಘಮ ಗಮ್ಯದೆಡೆಗೆ!

ಸರಳ ಕುಟುಂಬದ ಹುಡುಗ

ಅಕ್ಟೋಬರ್ 21, 2000ಕ್ಕೆ ಜನಿಸಿದ ಗಗನ್ ಶ್ರೀನಿವಾಸ್‌ಗೆ ಈಗಿನ್ನೂ ವಯಸ್ಸು 25. ಬೆಂಗಳೂರಿನಲ್ಲಿ ಜನಿಸಿದ ಗಗನ್‌ ಅವರ ತಂದೆ ಶ್ರೀನಿವಾಸ್ ಒಂದು ದೇವಾಲಯದಲ್ಲಿ ಅರ್ಚಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದರೆ, ತಾಯಿ ಪದ್ಮಾವತಿ ಗೃಹಿಣಿ. ಒಂದು ಅರ್ಚಕರ ಮನೆಯ ಸರಳ ಜೀವನ, ಮಿತ ಆದಾಯ - ಇವೆಲ್ಲದರ ನಡುವೆ ಬೆಳೆದ ಗಗನ್‌ಗೆ ಬಾಲ್ಯದಿಂದಲೇ ಪುಸ್ತಕದ ಓದಿಗಿಂತ ಬೇರೆ ಚಟುವಟಿಕೆಗಳ ಮೇಲೆ ಹೆಚ್ಚು ಒಲವಿತ್ತು. ಶಾಲಾ ದಿನಗಳಲ್ಲಿ ನಾಟಕ, ಭಾಷಣ, ಹಾಡುಗಾರಿಕೆಯಂಥ ವೇದಿಕೆ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಿದ್ದ ಗಗನ್, ಪಠ್ಯ ಪುಸ್ತಕದ ಶಿಕ್ಷಣದಲ್ಲಿ ಅಷ್ಟೇನೂ ಆಸಕ್ತಿ ತೋರಲಿಲ್ಲ. ಒಂದರಿಂದ ಹತ್ತನೆಯ ತರಗತಿಯವರೆಗೆ ಇಂಗ್ಲಿಷ್ ಮಾಧ್ಯಮದಲ್ಲಿ ಓದಿದ ಇವರು, ಪ್ರಥಮ ಪಿಯುಸಿ ವಿಜ್ಞಾನ ವಿಭಾಗದಲ್ಲಿ ಅನುತ್ತೀರ್ಣರಾದರು. ಈ ಹಿನ್ನಡೆಯ ನಂತರ ಅವರು ವಾಣಿಜ್ಯ ವಿಭಾಗಕ್ಕೆ ಸೇರಿ ಪದವಿ ಪೂರ್ವ ಶಿಕ್ಷಣ ಪೂರ್ಣಗೊಳಿಸಿ, ನಂತರ ಬಿಕಾಂ ಪದವಿಯನ್ನು 2021ರಲ್ಲಿ ಪೂರ್ಣಗೊಳಿಸಿದರು.

ಆರ್ಥಿಕ ಪರಿಸ್ಥಿತಿ ಅಷ್ಟೇನೂ ಸುಸ್ಥಿತಿಯಲ್ಲಿ ಇಲ್ಲದ ಕಾರಣ, ಗಗನ್ ಕೇವಲ 17ನೆಯ ವಯಸ್ಸಿನಲ್ಲೇ ದುಡಿಮೆಗೆ ಇಳಿದರು. ಬೆಂಗಳೂರಿನಲ್ಲಿ ಡ್ರೈವಿಂಗ್ ಕೆಲಸ ಮಾಡುತ್ತಿದ್ದ ಇವರಿಗೆ, ಸಣ್ಣ ವಯಸ್ಸಿನಲ್ಲೇ ಜೀವನದ ವಾಸ್ತವಗಳ ಪರಿಚಯವಾಗಿತ್ತು. ಈ ಎಲ್ಲಾ ಸಂಘರ್ಷಗಳ ನಡುವೆಯೂ, ಕಾಲೇಜಿನಲ್ಲಿ ಓದುತ್ತಿರುವಾಗಲೇ ಒಂದು ಕ್ಯಾಮೆರಾ ಹಿಡಿದು ಯೂಟ್ಯೂಬ್‌ಗೆ ವಿಡಿಯೋ ಹಾಕುವ ಹುಚ್ಚು ಅವರಿಗೆ ಹತ್ತಿತ್ತು.

ಡಾಕ್ಟರ್‌ ಬ್ರೋ ಎಂಬ ಹೆಸರಿನ ಹಿಂದಿನ ಕಥೆ

ಡಾಕ್ಟರ್‌ ಬ್ರೋ ಎಂಬ ಹೆಸರು ಕೇಳಿದ ಬಹುತೇಕರಿಗೆ ಇವರೊಬ್ಬ ವೈದ್ಯಕೀಯ ಪದವೀಧರ ಇರಬಹುದೇ ಎಂಬ ಗೊಂದಲ ಸಹಜ. ಆದರೆ ಇದರ ಹಿಂದಿನ ಕಥೆ ತೀರಾ ಸರಳ ಮತ್ತು ಆಪ್ತವಾದದ್ದು. ಕಾಲೇಜು ದಿನಗಳಲ್ಲಿ ಗೆಳೆಯರೆಲ್ಲ ಗಗನ್‌ರನ್ನು ಬ್ರೋ, ಬ್ರೋ ಎಂದೇ ಕರೆಯುತ್ತಿದ್ದರು. ಯೂಟ್ಯೂಬ್ ಚಾನೆಲ್‌ಗೆ ಹೆಸರಿಡುವ ಸಂದರ್ಭ ಬಂದಾಗ, ಈ ಬ್ರೋ ಪದವನ್ನೇ ಆಯ್ಕೆ ಮಾಡಿಕೊಂಡ ಗಗನ್, ಅದರ ಮುಂದೆ ಏನಾದರೂ ಸೇರಿಸಬೇಕು ಎಂದುಕೊಂಡಾಗ ಹೊಳೆದಿದ್ದೇ ಡಿಯರ್ ಪದ. ಹೀಗೆ ಡಿಯರ್ ಬ್ರೋ ಎಂಬುದು ಕ್ರಮೇಣ ಡಾಕ್ಟರ್‌ ಬ್ರೋ ಎಂದು ರೂಪುಗೊಂಡಿತು.

Dr. Bro - ಯೂಟ್ಯೂಬ್‌ ಸೆನ್ಸೇಷನ್‌

2018ರಲ್ಲಿ ಗಗನ್ ಶ್ರೀನಿವಾಸ್ ಡಾಕ್ಟರ್‌ ಬ್ರೋ ಹೆಸರಿನಲ್ಲಿ ಹೊಸ ಯೂಟ್ಯೂಬ್ ಚಾನೆಲ್ ಪ್ರಾರಂಭಿಸಿದರು. ಆರಂಭದಲ್ಲಿ ಹಾಸ್ಯ ವಿಡಿಯೋಗಳು ಮತ್ತು ಸಂದರ್ಶನ ವಿಡಿಯೋಗಳನ್ನೇ ಮುಖ್ಯವಾಗಿ ಮಾಡುತ್ತಿದ್ದ ಇವರು, ಕ್ರಮೇಣ ಕರ್ನಾಟಕದ ವಿವಿಧ ಸ್ಥಳಗಳಿಗೆ ಭೇಟಿ ನೀಡಿ ವ್ಲಾಗ್ ಮಾಡಲು ಆರಂಭಿಸಿದರು. ಜನರಿಗೆ ಗೊತ್ತೇ ಇರದ, ಕರ್ನಾಟಕದ ಮೂಲೆ ಮೂಲೆಯ ಸ್ಥಳಗಳನ್ನು ತಮ್ಮ ಶೈಲಿಯಲ್ಲಿ ತೋರಿಸಲು ಶುರು ಮಾಡಿದ ಗಗನ್, ನಿಧಾನವಾಗಿ ಕೇರಳ, ಅಸ್ಸಾಂ, ರಾಜಸ್ಥಾನ, ಹಿಮಾಚಲ ಪ್ರದೇಶ ಮುಂತಾದ ಭಾರತದ ಇತರ ರಾಜ್ಯಗಳಿಗೂ ತಮ್ಮ ವ್ಲಾಗಿಂಗ್ ಪಯಣವನ್ನು ವಿಸ್ತರಿಸಿದರು.

ಇದಾದ ನಂತರ ಬಂದದ್ದೇ ಇವರ ಜೀವನದ ದೊಡ್ಡ ತಿರುವು. ಅದು ವಿದೇಶ ಪ್ರವಾಸ. ಗಗನ್ ಅವರ ಮೊದಲ ವಿದೇಶಿ ಪ್ರವಾಸ ಪಾಕಿಸ್ತಾನ. ಇಂಗ್ಲಿಷ್ ಸರಿಯಾಗಿ ಬಾರದಿದ್ದರೂ ವಿದೇಶ ಪ್ರವಾಸ ಸಾಧ್ಯ ಎಂಬುದನ್ನು ತಮ್ಮ ಪ್ರಯಾಣಗಳ ಮೂಲಕ ತೋರಿಸಿಕೊಟ್ಟ ಇವರು, ನಂತರ ದುಬೈ, ಥೈಲ್ಯಾಂಡ್, ರಷ್ಯಾ, ಆಫ್ರಿಕ ಖಂಡದ ಹಲವು ದೇಶಗಳಿಗೆ ಭೇಟಿ ನೀಡಿದರು. ಅಫ್ಘಾನಿಸ್ತಾನಕ್ಕೆ ಭೇಟಿ ನೀಡಿ, ಅಲ್ಲಿ ತಾಲಿಬಾನ್ ಜೊತೆಗೂ ವ್ಲಾಗ್ ಮಾಡಿದ ಇವರ ಧೈರ್ಯ ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾಯಿತು. ಬಾಂಬ್ ದಾಳಿಗೆ ತುತ್ತಾದ ಸಿರಿಯಾದ ನಗರಗಳಲ್ಲಿ ನಡೆದಾಡಿದ್ದು, ದಕ್ಷಿಣ ಸುಡಾನ್‌ನಲ್ಲಿ ಬಂದೂಕು ಎದುರಿಸಿದ್ದು, ಹೈನಾಗಳ ಪಕ್ಕದಲ್ಲಿ ನಿಂತಿದ್ದು - ಹೀಗೆ ಜಗತ್ತಿನ ಅತ್ಯಂತ ಅಪಾಯಕಾರಿ ಎನ್ನಬಹುದಾದ ಪ್ರದೇಶಗಳಲ್ಲೂ ಕ್ಯಾಮೆರಾ ಹಿಡಿದು ಸುತ್ತಾಡಿದ ಇವರ ಸಾಹಸಗಾಥೆಗಳು ಇಂದಿಗೂ ಅಭಿಮಾನಿಗಳ ಬಾಯಲ್ಲಿ ಚರ್ಚೆಯಾಗುತ್ತವೆ. ಇಲ್ಲಿಯವರೆಗೆ ಸುಮಾರು 30ರಿಂದ 50ಕ್ಕೂ ಹೆಚ್ಚು ದೇಶಗಳನ್ನು ಸುತ್ತಿರುವ ಗಗನ್, ಇಡೀ ಜಗತ್ತಿನ 195 ದೇಶಗಳನ್ನೂ ಸುತ್ತಬೇಕೆಂಬ ಮಹತ್ವಾಕಾಂಕ್ಷೆಯ ಗುರಿ ಇಟ್ಟುಕೊಂಡಿದ್ದಾರೆ.

ಇವರ ವಿಶೇಷತೆ ಎಂದರೆ ಪ್ರಪಂಚದ ಮೂಲೆ ಮೂಲೆಯ ವಿಷಯಗಳನ್ನೂ ಶುದ್ಧ, ಆಡುಮಾತಿನ ಕನ್ನಡದಲ್ಲಿ ವಿವರಿಸುವ ಶೈಲಿ. ಯಾವುದೇ ಕಷ್ಟಕರ ಪದಗಳಿಲ್ಲದೆ, ಜನಸಾಮಾನ್ಯರಿಗೆ ಅರ್ಥವಾಗುವ ಭಾಷೆಯಲ್ಲಿ ವಿದೇಶಗಳ ಸಂಸ್ಕೃತಿ, ಆಚರಣೆ, ಜನಜೀವನವನ್ನು ಪರಿಚಯಿಸುವ ಇವರ ವಿಧಾನ ಕನ್ನಡಿಗರಿಗೆ ಅತ್ಯಂತ ಆಪ್ತವಾಗಿ ಕಂಡಿತು. 'ನಮಸ್ಕಾರ ದೇವ್ರು' ಎಂಬ ವಿಶಿಷ್ಟ ಸ್ವಾಗತ ವಾಕ್ಯದೊಂದಿಗೆ ಪ್ರತಿ ವಿಡಿಯೋ ಪ್ರಾರಂಭಿಸುವ ಇವರ ಶೈಲಿ ಇಂದು ಕರ್ನಾಟಕದಾದ್ಯಂತ ಟ್ರೆಂಡ್ ಆಗಿ ಬೆಳೆದಿದೆ. ಇವರ ಜನಪ್ರಿಯತೆ ಎಷ್ಟಿತ್ತೆಂದರೆ, 'ಡೇರ್‌ ಡೆವಿಲ್ ಮುಸ್ತಫಾ' ಎಂಬ ಕನ್ನಡ ಚಲನಚಿತ್ರದ ಟ್ರೇಲರ್‌ಗೆ ಕಂಠದಾನ ಮಾಡುವ ಅವಕಾಶವೂ ಇವರಿಗೆ ಒಲಿದು ಬಂತು.

ವ್ಲಾಗಿಂಗ್‌ನಿಂದ ಉದ್ಯಮದತ್ತ

ಪ್ರವಾಸ ಎಂದರೆ ಕೇವಲ ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ಹೋಗಿ ಫೊಟೋ ತೆಗೆದುಕೊಂಡು ಪಟ್ಟಿಯಲ್ಲಿ ಟಿಕ್ ಮಾಡುವುದಲ್ಲ, ಬದಲಿಗೆ ಮನೆಗೆ ಮರಳಿದ ಮೇಲೂ ಮನಸಿನಲ್ಲಿ ಉಳಿಯುವ ಅನುಭವಗಳನ್ನು ಕಟ್ಟಿಕೊಡುವುದು ಎಂಬ ಅರಿವು ಗಗನ್‌ಗೆ ಪ್ರಯಾಣದ ಅನುಭವಗಳಿಂದಲೇ ಮೂಡಿತು. ಸಾವಿರಾರು ಅಭಿಮಾನಿಗಳು ಪ್ರತಿ ವಿಡಿಯೋದ ಕೆಳಗೆ 'ನಮ್ಮನ್ನೂ ಕರೆದುಕೊಂಡು ಹೋಗಿ' ಎಂದು ಕಾಮೆಂಟ್ ಮಾಡುತ್ತಿದ್ದುದು, ಕನ್ನಡಿಗರಿಗೆ ಕೂಡ ಈ ರೀತಿಯ ವಿಶ್ವಪರ್ಯಟನೆಯ ಅನುಭವ ಸಿಗಬೇಕು ಎಂಬ ಆಸೆಯನ್ನು ಗಗನ್ ಮನಸಿನಲ್ಲಿ ಬಿತ್ತಿತು. ಜತೆಗೆ, ಬೇರೆಯವರ ಕೈಕೆಳಗೆ ಕೆಲಸ ಮಾಡುವುದಕ್ಕಿಂತ ಸ್ವಂತ ಉದ್ಯಮ ಕಟ್ಟಿ, ಇತರರಿಗೆ ಉದ್ಯೋಗ ಸೃಷ್ಟಿಸಬೇಕು ಎಂಬ ಬಯಕೆ ಗಗನ್‌ಗೆ ಬಹಳ ಹಿಂದಿನಿಂದಲೂ ಇತ್ತು. 'ತನಗೆ ಎಲ್ಲವನ್ನೂ ಕೊಟ್ಟ ಜನರಿಗೆ ಏನಾದರೂ ಹಿಂದಿರುಗಿಸಬೇಕು' ಎಂಬ ಕೃತಜ್ಞತಾ ಭಾವನೆಯೇ ಗೋ ಪ್ರವಾಸ ಎಂಬ ಕಂಪನಿಯ ಹುಟ್ಟಿಗೆ ಮೂಲ ಪ್ರೇರಣೆಯಾಯಿತು.ಆದರೆ ಈ ಕನಸನ್ನು ನನಸಾಗಿಸುವುದು ಸುಲಭದ ಮಾತಾಗಿರಲಿಲ್ಲ. ಕಂಟೆಂಟ್ ಕ್ರಿಯೇಟರ್ ಆಗಿ ಜನಪ್ರಿಯತೆ ಗಳಿಸುವುದು ಬೇರೆ, ಪ್ರವಾಸೋದ್ಯಮದಂಥ ಸಂಕೀರ್ಣ, ಜವಾಬ್ದಾರಿಯುತ ಕ್ಷೇತ್ರದಲ್ಲಿ ಕಂಪನಿ ಕಟ್ಟುವುದು ಬೇರೆ. ವೀಸಾ ಪ್ರಕ್ರಿಯೆ, ಅಂತಾರಾಷ್ಟ್ರೀಯ ಪ್ರಯಾಣ ವ್ಯವಸ್ಥೆ, ಹೊಟೇಲ್ ಬುಕಿಂಗ್, ಗ್ರಾಹಕರ ಸುರಕ್ಷತೆ, ತಂಡ ನಿರ್ಮಾಣ - ಇವೆಲ್ಲವನ್ನೂ ನಿಭಾಯಿಸಬೇಕಾದ ಸವಾಲು ಇತ್ತು. ಕೇವಲ ಇಂಗ್ಲಿಷ್ ಭಾಷೆಯ ಪರಿಚಯ ಅಷ್ಟಕ್ಕಷ್ಟೇ ಇದ್ದ, ಕನ್ನಡ ಬಿಟ್ಟು ಬೇರೆ ಭಾಷೆ ಗೊತ್ತಿಲ್ಲದ ಸಣ್ಣ ಊರಿನ ಹುಡುಗನೊಬ್ಬ, ಅಂತಾರಾಷ್ಟ್ರೀಯ ಮಟ್ಟದ ಪ್ರವಾಸ ಸಂಸ್ಥೆಯೊಂದನ್ನು ಕಟ್ಟುವ ಗುರಿ ಇಟ್ಟುಕೊಂಡಿದ್ದು ನಿಜಕ್ಕೂ ದೊಡ್ಡ ಸಾಹಸವೇ ಸರಿ. ಆದರೆ 'ಬಯಸಿದ್ದನ್ನು ನಿಜಕ್ಕೂ ಪಡೆಯಬೇಕೆಂಬ ಹಂಬಲ ಇದ್ದರೆ ಇಡೀ ಜಗತ್ತೇ ಅದನ್ನು ಸಾಧಿಸಲು ಸಹಕರಿಸುತ್ತದೆ' ಎಂಬಂತೆ, ಗಗನ್ ಈ ಎಲ್ಲ ಸವಾಲುಗಳನ್ನು ಮೆಟ್ಟಿ ನಿಂತರು.

ಯೂಟ್ಯೂಬ್‌ನಿಂದ ದೂರ, ಆದರೆ ಉದ್ಯಮದಲ್ಲಿ ಬ್ಯುಸಿ

ಕಂಪೆನಿ ಬೆಳೆಯುತ್ತಿದ್ದಂತೆ, ಗಗನ್ ಅವರ ಯೂಟ್ಯೂಬ್ ಚಟುವಟಿಕೆ ಸ್ವಲ್ಪ ಕಡಿಮೆಯಾಗಿದ್ದನ್ನು ಅಭಿಮಾನಿಗಳು ಗಮನಿಸಿದರು. ಕೆಲವು ತಿಂಗಳುಗಳ ಕಾಲ ಯಾವುದೇ ಹೊಸ ವೀಡಿಯೋ ಅಪ್‌ಲೋಡ್ ಆಗದೇ ಇದ್ದಾಗ, ಡಾಕ್ಟರ್‌ ಬ್ರೋಗೆ ಏನಾಯಿತು? ಎಂಬ ಪ್ರಶ್ನೆ ಸಾಮಾಜಿಕ ಮಾಧ್ಯಮದಲ್ಲಿ ದೊಡ್ಡ ಚರ್ಚೆಯ ವಿಷಯವಾಗಿತ್ತು. ಆದರೆ ನಿಜವಾದ ಕಾರಣ ಸರಳವಾಗಿತ್ತು. ಗಗನ್ ತಮ್ಮ ಗೋ ಪ್ರವಾಸ ಉದ್ಯಮದ ಬೆಳವಣಿಗೆಯಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದರಿಂದ, ಹೊಸ ದೇಶಗಳಿಗೆ ವ್ಲಾಗಿಂಗ್ ಪ್ರಯಾಣಗಳಿಗೆ ಸಮಯ ಸಿಗುತ್ತಿರಲಿಲ್ಲ. ಬಿಗ್ ಬಾಸ್ ಕನ್ನಡದಂಥ ರಿಯಾಲಿಟಿ ಶೋಗಳಿಗೆ ಬರಬೇಕೆಂಬ ಒತ್ತಾಯ ಪದೇಪದೆ ಬಂದರೂ, ಅವುಗಳಿಗಿಂತ ತಮ್ಮ ಪ್ರೇಕ್ಷಕರಿಗಾಗಿ ಟ್ರಾವೆಲ್‌ ವಿಡಿಯೋ ಮಾಡುವುದೇ ಗಗನ್‌ ಅವರ ಆದ್ಯತೆಯಾಗಿದೆ.

ಗೋ ಪ್ರವಾಸ: ಸ್ವಾತಂತ್ರ್ಯ ದಿನದಂದು ಮೂಡಿದ ಹೊಸ ಕನಸು

ಗಗನ್ ಅವರು ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಬೆಂಗಳೂರಿನ ವಿಜಯನಗರದಲ್ಲಿ 'ಡಾಕ್ಟರ್‌ ಬ್ರೋ ಗೋ ಪ್ರವಾಸ' ಎಂಬ ಹೆಸರಿನ ಹೊಸ ಕಚೇರಿಯನ್ನು ಆರಂಭಿಸಿ, ಔಪಚಾರಿಕವಾಗಿ ತಮ್ಮ ಪ್ರಯಾಣ ಸಂಸ್ಥೆಯನ್ನು ಘೋಷಿಸಿದರು. ಈ ಘೋಷಣೆಯನ್ನು ಗಗನ್ ತಮ್ಮ ಇನ್‌ಸ್ಟಾಗ್ರಾಮ್‌ ಪೋಸ್ಟ್ ಮೂಲಕ ಹಂಚಿಕೊಂಡಾಗ, ಎರಡು ಲಕ್ಷಕ್ಕೂ ಹೆಚ್ಚು ಲೈಕ್‌ಗಳು ಬಂದವು ಎಂಬುದೇ ಅವರ ಮೇಲಿನ ಅಭಿಮಾನಿಗಳ ನಂಬಿಕೆಗೆ ಸಾಕ್ಷಿ. ಈ ಮೊದಲು ಗೋ ಪ್ರವಾಸ ತಂಡದೊಂದಿಗೆ ಪ್ರವಾಸ ಕೈಗೊಂಡಿದ್ದ ನೂರಕ್ಕೂ ಹೆಚ್ಚು ಜನರು ಸಾಮಾಜಿಕ ಮಾಧ್ಯಮದಲ್ಲಿ ಉತ್ತಮ ರೇಟಿಂಗ್ ನೀಡಿದ್ದು ಕಂಪೆನಿಗೆ ಆರಂಭದಲ್ಲೇ ವಿಶ್ವಾಸಾರ್ಹತೆ ತಂದುಕೊಟ್ಟಿತು. ಗಗನ್ 'ಗೋ ಪ್ರವಾಸ ಪ್ರಾರಂಭಿಸಿದ ನಂತರವೂ ಪ್ರಯಾಣ ವಿಡಿಯೋ ಮಾಡುವುದನ್ನು ನಿಲ್ಲಿಸಬೇಡಿ' ಎಂದು ಅಭಿಮಾನಿಗಳು ಕಾಳಜಿಯಿಂದ ಬರೆದಿದ್ದ ಕಾಮೆಂಟ್‌ಗಳು, ಜನ ಅವರ ಜೊತೆ ಎಷ್ಟು ಭಾವನಾತ್ಮಕವಾಗಿ ಬೆಸೆದುಕೊಂಡಿದ್ದಾರೆ ಎಂಬುದನ್ನು ತೋರಿಸುತ್ತವೆ.

ಗೋ ಪ್ರವಾಸ ಪ್ಯಾಕೇಜ್ ಆಧಾರಿತ ವಿದೇಶಿ ಪ್ರವಾಸ ಸೇವೆಗಳನ್ನು ಒದಗಿಸುತ್ತಿದೆ. ಕಂಪನಿ ಆರಂಭವಾದ ಸ್ವಲ್ಪ ಸಮಯದಲ್ಲೇ, ಸೆಪ್ಟೆಂಬರ್ 26ರಿಂದ 30ರವರೆಗೆ ಥೈಲ್ಯಾಂಡ್‌ಗೆ ಕಡಿಮೆ ವೆಚ್ಚದಲ್ಲಿ ಪ್ರವಾಸ ಪ್ಯಾಕೇಜ್ ಘೋಷಿಸಿದಾಗ, ಎಲ್ಲಾ ಟಿಕೆಟ್‌ಗಳು ಕ್ಷಣಾರ್ಧದಲ್ಲಿ ಮಾರಾಟವಾಗಿ ಹೋದವು. ಇದು ಕಂಪನಿಯ ಭವಿಷ್ಯದ ಬಗ್ಗೆ ಉತ್ತಮ ಸೂಚನೆ ನೀಡಿತು. ಕಂಪನಿ ಬೆಳೆಯುತ್ತಿದ್ದಂತೆ, ಅಂತಾರಾಷ್ಟ್ರೀಯ ಆಪರೇಷನ್ಸ್ ಎಕ್ಸಿಕ್ಯೂಟಿವ್, ಹಾಲಿಡೇ ಪ್ಯಾಕೇಜ್ ಅನುಭವಿಗಳು, ದೇಶೀಯ ಆಪರೇಷನ್ಸ್ ಎಕ್ಸಿಕ್ಯೂಟಿವ್ ಹಾಗೂ ಏಷ್ಯಾ ಖಂಡದ ದೇಶಗಳಿಗೆ ವೀಸಾ ಸ್ಪೆಷಲಿಸ್ಟ್‌ಗಳಂಥ ಹುದ್ದೆಗಳಿಗೆ ನೇಮಕಾತಿ ಪ್ರಕಟಿಸಿ, ಕ್ರಮೇಣ ತಂಡವನ್ನು ವಿಸ್ತರಿಸಿಕೊಂಡಿತು.

ಸಹೋದರನೊಂದಿಗೆ ಒಟ್ಟಾಗಿ ಬೆಳೆದ ಉದ್ಯಮ

ಗೋ ಪ್ರವಾಸದ ಈ ಬೆಳವಣಿಗೆಯ ಹಿಂದೆ ಕೇವಲ ಗಗನ್ ಒಬ್ಬರ ಶ್ರಮ ಮಾತ್ರವಲ್ಲ, ಅವರ ಸಹೋದರ ವಿಘ್ನೇಶ್ ಅವರ ಪಾತ್ರವೂ ಬಹುಮುಖ್ಯ. ದಯಾನಂದ ಸಾಗರ್ ಸಂಸ್ಥೆಯಲ್ಲಿ ವಿದ್ಯಾಭ್ಯಾಸ ಪಡೆದ ವಿಘ್ನೇಶ್, ಗೋ ಪ್ರವಾಸದ ಸಹ-ಸಂಸ್ಥಾಪಕ ಹಾಗೂ ಸಿಇಒ ಆಗಿ ಕಂಪೆನಿಯ ದೈನಂದಿನ ಕಾರ್ಯನಿರ್ವಹಣೆಯನ್ನು ಮುನ್ನಡೆಸುತ್ತಿದ್ದಾರೆ. ಕೇವಲ 23ನೆಯ ವಯಸ್ಸಿನಲ್ಲೇ ಇಷ್ಟು ದೊಡ್ಡ ಜವಾಬ್ದಾರಿಯನ್ನು ನಿಭಾಯಿಸುತ್ತಿರುವ ವಿಘ್ನೇಶ್, ಒಂದು ಯುವ ಮತ್ತು ಚೈತನ್ಯಶೀಲ ತಂಡವನ್ನು ಕಟ್ಟಿ, ಕರ್ನಾಟಕದಿಂದಲೇ ಒಂದು ಉತ್ತಮ ಗುಣಮಟ್ಟದ, ಎಚ್ಚರಿಕೆಯಿಂದ ರೂಪಿಸಲಾದ ಪ್ರವಾಸ ಉದ್ಯಮ ಕಟ್ಟುವತ್ತ ಗಮನ ಹರಿಸಿದ್ದಾರೆ.

ಕೇವಲ ಎರಡು ವರ್ಷಗಳ ಅವಧಿಯಲ್ಲಿ ಗೋ ಪ್ರವಾಸ 3,500ಕ್ಕೂ ಹೆಚ್ಚು ಪಾವತಿಸಿದ ಗ್ರಾಹಕರಿಗೆ ಸೇವೆ ಒದಗಿಸಿದೆ. ಇದೊಂದು ಕಂಟೆಂಟ್ ಕ್ರಿಯೇಟರ್ ನೇತೃತ್ವದ ಉದ್ಯಮಕ್ಕೆ ಗಮನಾರ್ಹ ಸಾಧನೆ. ಪ್ರಸ್ತುತ ಗೋ ಪ್ರವಾಸ 30 ಮಂದಿ ಉದ್ಯೋಗಿಗಳಿಗೆ ಉದ್ಯೋಗ ನೀಡುತ್ತಿದೆ. ಇತರರಿಗೆ ಉದ್ಯೋಗ ಸೃಷ್ಟಿಸಬೇಕು ಎಂಬ ಗಗನ್ ಅವರ ಕನಸು ಕೂಡ ಆ ಮೂಲಕ ನನಸಾಗಿದೆ.

ಸೇವೆಗಳ ವ್ಯಾಪ್ತಿ

ಗೋ ಪ್ರವಾಸ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಎರಡೂ ಬಗೆಯ ಪ್ರವಾಸಗಳನ್ನು ನಡೆಸುತ್ತದೆ - ಗುಂಪು ಪ್ರವಾಸಗಳು, ಟ್ರೆಕ್‌ಗಳು, ಹಾಗೂ ಕಸ್ಟಮೈಸ್ಡ್ ಹಾಲಿಡೇ ಪ್ಯಾಕೇಜ್‌ಗಳು ಸೇರಿ ಎಲ್ಲವನ್ನೂ ನೀಡುತ್ತದೆ. ಪ್ರತಿ ಪ್ಯಾಕೇಜ್‌ನಲ್ಲಿ ಸಾಮಾನ್ಯವಾಗಿ ವಸತಿ, ಊಟ, ಸಾರಿಗೆ, ಸೈಟ್‌ಸೀಯಿಂಗ್ ಸೇರಿರುತ್ತದೆ.