ಕರ್ನಾಟಕ ಪ್ರವಾಸೋದ್ಯಮಕ್ಕೆ ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್ ಕಲಿಸುವ ಪಾಠಗಳು

ಈ ವರ್ಷದ ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್ (ATM - Arabian Travel Market) ಅತ್ಯಂತ ಯಶಸ್ವಿಯಾಗಿ ಸಂಪನ್ನಗೊಂಡಿದೆ. ದುಬೈ ನಗರದಲ್ಲಿ ಪ್ರತಿವರ್ಷ ನಡೆಯುವ ಜಾಗತಿಕ ಪ್ರವಾಸೋದ್ಯಮ ಮತ್ತು ಆತಿಥ್ಯ ರಂಗದ ಅತ್ಯಂತ ಪ್ರಭಾವಿ ವ್ಯಾಪಾರ ಮೇಳಗಳಲ್ಲಿ ಇದು ಪ್ರಮುಖ ಸ್ಥಾನ ಪಡೆದಿದೆ. ಮಧ್ಯಪ್ರಾಚ್ಯ, ಯುರೋಪ್, ಏಷ್ಯಾ ಮತ್ತು ಅಮೆರಿಕ ಖಂಡಗಳ ನಡುವೆ ವ್ಯಾಪಾರ ಸೇತುವೆಯಾಗಿರುವ ದುಬೈ ವರ್ಲ್ಡ್ ಟ್ರೇಡ್ ಸೆಂಟರ್‌ನಲ್ಲಿ ಈ ಬೃಹತ್ ಆಯೋಜನೆ ನಡೆಯುತ್ತದೆ. 1994 ರಲ್ಲಿ ಪ್ರಾರಂಭವಾದ ಈ ಉತ್ಸವವು, ಇಂದು ಜಾಗತಿಕ ಪ್ರವಾಸೋದ್ಯಮ ಕ್ಷೇತ್ರದ ಪ್ರಗತಿ, ಬಂಡವಾಳ ಹೂಡಿಕೆ ಹಾಗೂ ನೀತಿ ನಿರೂಪಣೆಯ ಪ್ರಮುಖ ದಿಕ್ಕು-ದೆಸೆಯನ್ನು ನಿರ್ಧರಿಸುವ ಅಂತಾರಾಷ್ಟ್ರೀಯ ವೇದಿಕೆಯಾಗಿ ಬೆಳೆದು ನಿಂತಿದೆ. ಈ ಮಹಾಮೇಳದ ಪ್ರಮುಖ ಉದ್ದೇಶವೆಂದರೆ ಒಳಬರುವ ಮತ್ತು ಹೊರಹೋಗುವ (Inbound and Outbound) ಪ್ರವಾಸೋದ್ಯಮ ವಲಯಗಳ ನಡುವೆ ದೃಢವಾದ ವಾಣಿಜ್ಯ ಸಂಪರ್ಕವನ್ನು ಕಲ್ಪಿಸುವುದು. ಪ್ರಪಂಚದಾದ್ಯಂತದ ಪ್ರವಾಸ ನಿರ್ವಾಹಕರು, ವಿಮಾನಯಾನ ಸಂಸ್ಥೆಗಳು, ಐಷಾರಾಮಿ ಹೊಟೇಲ್ ಜಾಲಗಳು ಹಾಗೂ ತಂತ್ರಜ್ಞಾನ ಒದಗಿಸುವ ಸಂಸ್ಥೆಗಳನ್ನು ಒಂದೇ ಸೂರಿನಡಿ ತಂದು ನೇರ ವ್ಯವಹಾರ ಒಪ್ಪಂದಗಳಿಗೆ (B2B) ಅವಕಾಶ ಕಲ್ಪಿಸುವುದು ಇದರ ಮೂಲ ಧ್ಯೇಯ. ಕೇವಲ ಪ್ರದರ್ಶನಕ್ಕೆ ಸೀಮಿತವಾಗದೇ, ಜಾಗತಿಕ ಮಟ್ಟದಲ್ಲಿ ಪ್ರವಾಸೋದ್ಯಮದ ಆರ್ಥಿಕತೆಗೆ ಪುನಶ್ಚೇತನ ನೀಡುವುದು ಇದರ ನಿರಂತರ ಗುರಿ.

ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್‌ನ ಮಹತ್ವವು ಜಾಗತಿಕ ಆರ್ಥಿಕತೆಯ ದೃಷ್ಟಿಯಿಂದ ಅತ್ಯಂತ ಮೌಲ್ಯಯುತವಾದುದು. ಗಲ್ಫ್ ಸಹಕಾರ ಮಂಡಳಿ (GCC) ದೇಶಗಳು ಪ್ರವಾಸೋದ್ಯಮ ಆಧಾರಿತ ಆರ್ಥಿಕತೆಗೆ ನೀಡುತ್ತಿರುವ ಪ್ರಾಮುಖ್ಯವನ್ನು ಈ ಸಮ್ಮೇಳನ ಸಾಕಾರಗೊಳಿಸುತ್ತದೆ. ಕೋಟ್ಯಂತರ ಡಾಲರ್ ಮೌಲ್ಯದ ವ್ಯಾಪಾರ ಒಪ್ಪಂದಗಳು, ಜಂಟಿ ಉದ್ಯಮಗಳು ಮತ್ತು ಹೂಡಿಕೆ ಪ್ರಸ್ತಾವನೆಗಳು ಈ ನಾಲ್ಕು ದಿನಗಳ ವೇದಿಕೆಯಲ್ಲಿ ಅಂತಿಮಗೊಳ್ಳುತ್ತವೆ. ಪ್ರವಾಸೋದ್ಯಮವು ಉದ್ಯೋಗ ಸೃಷ್ಟಿ ಮತ್ತು ಅಂತಾರಾಷ್ಟ್ರೀಯ ಸಾಂಸ್ಕೃತಿಕ ವಿನಿಮಯಕ್ಕೆ ಹೇಗೆ ಶಕ್ತಿ ನೀಡುತ್ತದೆ ಎಂಬುದನ್ನು ಇದು ಸಾಬೀತುಪಡಿಸುತ್ತದೆ. ಈ ಬೃಹತ್ ಮೇಳದ ಪ್ರಮುಖ ವೈಶಿಷ್ಟ್ಯವೆಂದರೆ ಇಲ್ಲಿನ ಸಮಗ್ರ ಪ್ರದರ್ಶನ ಮಾದರಿ. ಜಗತ್ತಿನ ಪ್ರತಿ ಖಂಡದ ವೈವಿಧ್ಯಮಯ ಸಂಸ್ಕೃತಿ, ಆಕರ್ಷಕ ತಾಣಗಳು ಮತ್ತು ಪರಂಪರೆಯನ್ನು ಪರಿಚಯಿಸುವ ಸುಸಜ್ಜಿತ ದೇಶೀಯ ಮಳಿಗೆಗಳು ಇಲ್ಲಿ ಕಣ್ಮನ ಸೆಳೆಯುತ್ತವೆ. ಸಾಮಾನ್ಯ ಪ್ರವಾಸೋದ್ಯಮದ ಜತೆಗೆ ವೈದ್ಯಕೀಯ ಪ್ರವಾಸೋದ್ಯಮ, ಐಷಾರಾಮಿ ವಿಶ್ರಾಂತಿ ತಾಣಗಳು, ಸಾಹಸ ಪ್ರವಾಸ ಹಾಗೂ ಪರಿಸರಸ್ನೇಹಿ ತಾಣಗಳಿಗೆ ಪ್ರತ್ಯೇಕ ವಿಭಾಗಗಳನ್ನು ಮೀಸಲಿಡಲಾಗುತ್ತದೆ. ಸಂದರ್ಶಕರಿಗೆ ಜಗತ್ತಿನ ಎಲ್ಲ ಗಮ್ಯಸ್ಥಾನಗಳ ಸಾರವನ್ನು ಒಂದೇ ಬೃಹತ್ ಸಂಕೀರ್ಣದಲ್ಲಿ ಅನುಭವಿಸುವ ಅಸಾಧಾರಣ ಸೌಲಭ್ಯ ಇಲ್ಲಿ ಲಭ್ಯವಾಗುತ್ತದೆ.

ಪ್ರಸ್ತುತ ಆವೃತ್ತಿಯ ಪ್ರಾಮುಖ್ಯವು ಪ್ರವಾಸೋದ್ಯಮದ ಭವಿಷ್ಯದ ದಿಕ್ಕನ್ನು ನಿರ್ಧರಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದೆ. ಈ ವರ್ಷದ ಮೇಳವು ‘ವರ್ಧಿತ ಸಂಪರ್ಕದ ಮೂಲಕ ಭವಿಷ್ಯದ ಪ್ರವಾಸೋದ್ಯಮವನ್ನು ರೂಪಿಸುವುದು’ (Global Travel: Developing Tomorrow’s Tourism Through Enhanced Connectivity) ಎಂಬ ಪ್ರಧಾನ ವಿಷಯದಡಿ ಕೇಂದ್ರೀಕೃತವಾಗಿತ್ತು. ಕೋವಿಡ್ ನಂತರದ ಜಾಗತಿಕ ಸಂಚಾರ ಬದಲಾವಣೆಗಳು, ಗಡಿ ನಿಯಂತ್ರಣಗಳ ಸರಳೀಕರಣ ಹಾಗೂ ಸುಸ್ಥಿರ ಸಾರಿಗೆ ಸಂಪರ್ಕದ ಕುರಿತು ಈ ವರ್ಷದ ಅಧಿವೇಶನಗಳಲ್ಲಿ ಜಾಗತಿಕ ನಾಯಕರು ಆಳವಾದ ಸಮಾಲೋಚನೆ ನಡೆಸಿದರು. ಭಾಗವಹಿಸುವಿಕೆಯ ದೃಷ್ಟಿಯಿಂದ ಈ ವರ್ಷದ ಸಮಾವೇಶವು ಹೊಸ ದಾಖಲೆಯನ್ನು ನಿರ್ಮಿಸಿತು. ಜಗತ್ತಿನ ಬರೋಬ್ಬರಿ 165 ಕ್ಕೂ ಹೆಚ್ಚು ದೇಶಗಳು ಈ ಮಹಾಮೇಳದಲ್ಲಿ ಸಕ್ರಿಯವಾಗಿ ಭಾಗವಹಿಸಿದ್ದವು. ಸುಮಾರು 2,800 ಕ್ಕೂ ಹೆಚ್ಚು ಪ್ರದರ್ಶನ ಕಂಪನಿಗಳು ಮತ್ತು ಸಂಸ್ಥೆಗಳು ತಮ್ಮ ಸೇವೆಗಳನ್ನು ಪ್ರದರ್ಶಿಸಿದರೆ, ಜಾಗತಿಕ ಮಟ್ಟದ 55,000 ಕ್ಕೂ ಅಧಿಕ ಪ್ರವಾಸೋದ್ಯಮ ವೃತ್ತಿಪರರು, ಉದ್ಯಮಿಗಳು ಹಾಗೂ ಪ್ರತಿನಿಧಿಗಳು ಇದರಲ್ಲಿ ಪಾಲ್ಗೊಂಡು ದಾಖಲೆ ಬರೆದರು. ಭಾರತ, ಚೀನಾ, ಬ್ರಿಟನ್, ಅಮೆರಿಕ ಹಾಗೂ ಮಧ್ಯಪ್ರಾಚ್ಯದ ಪ್ರಮುಖ ದೇಶಗಳು ಅತ್ಯಂತ ದೊಡ್ಡ ಪ್ರಾತಿನಿಧ್ಯವನ್ನು ಹೊಂದಿದ್ದವು.

ಇದನ್ನೂ ಓದಿ: ದುಬೈ ವಿಮಾನ ನಿಲ್ದಾಣದಲ್ಲಿ ಹೊಸ ಭದ್ರತಾ ವ್ಯವಸ್ಥೆ

ಈ ವರ್ಷದ ಮೇಳದಲ್ಲಿ ಪ್ರವಾಸೋದ್ಯಮ ತಂತ್ರಜ್ಞಾನ (ATM Travel Tech) ವಲಯಕ್ಕೆ ಅಭೂತಪೂರ್ವ ಪ್ರಾಶಸ್ತ್ಯ ನೀಡಲಾಗಿತ್ತು. ಕೃತಕ ಬುದ್ಧಿಮತ್ತೆ (AI), ವರ್ಚುವಲ್ ರಿಯಾಲಿಟಿ (VR) ಮೂಲಕ ಪ್ರವಾಸಿ ತಾಣಗಳ ಪೂರ್ವವೀಕ್ಷಣೆ, ಸ್ವಯಂಚಾಲಿತ ಬುಕಿಂಗ್ ವ್ಯವಸ್ಥೆಗಳು ಮತ್ತು ಬ್ಲಾಕ್‌ಚೈನ್ ತಂತ್ರಜ್ಞಾನಗಳು ಹೇಗೆ ಪ್ರಯಾಣದ ಅನುಭವವನ್ನು ಕ್ರಾಂತಿಕಾರಕವಾಗಿ ಬದಲಾಯಿಸುತ್ತಿವೆ ಎಂಬುದನ್ನು ಲೈವ್ ಡೆಮೋಗಳ ಮೂಲಕ ತೋರಿಸಲಾಯಿತು. ನವೋದ್ಯಮಿಗಳಿಗಾಗಿ (Start-ups) ರೂಪಿಸಲಾಗಿದ್ದ ನಾವೀನ್ಯತಾ ವಲಯವು ಹೊಸ ಹೂಡಿಕೆದಾರರನ್ನು ಆಕರ್ಷಿಸುವಲ್ಲಿ ಯಶಸ್ವಿಯಾಯಿತು.

ಪರಿಸರ ಸಂರಕ್ಷಣೆ ಮತ್ತು ಹವಾಮಾನ ಬದಲಾವಣೆಯ ಹಿನ್ನೆಲೆಯಲ್ಲಿ ‘ಸುಸ್ಥಿರ ಪ್ರವಾಸೋದ್ಯಮ" (Sustainable Tourism) ಈ ವರ್ಷದ ಪ್ರಮುಖ ಚರ್ಚಾ ವಿಷಯವಾಗಿತ್ತು. ಕಾರ್ಬನ್ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವ ವಿಮಾನಯಾನ ಪದ್ಧತಿಗಳು, ಶೂನ್ಯ-ತ್ಯಾಜ್ಯ ಹೋಟೆಲ್ ನಿರ್ವಹಣೆ ಮತ್ತು ಸ್ಥಳೀಯ ಸಮುದಾಯಗಳ ಸಂಸ್ಕೃತಿಗೆ ಧಕ್ಕೆ ಬಾರದಂತೆ ಪ್ರವಾಸೋದ್ಯಮವನ್ನು ನಿರ್ವಹಿಸುವ ವಿಧಾನಗಳ ಮೇಲೆ ವಿಚಾರಗೋಷ್ಠಿಗಳು ನಡೆದವು. ಜಾಗತಿಕ ತಾಪಮಾನ ಏರಿಕೆಯ ಹೊತ್ತಿನಲ್ಲಿ ಪ್ರವಾಸೋದ್ಯಮವು ಪ್ರಕೃತಿಗೆ ಪೂರಕವಾಗಿರಬೇಕೆಂಬ ಬಲವಾದ ಸಂದೇಶವನ್ನು ಜಾಗತಿಕ ಪ್ರತಿನಿಧಿಗಳು ಸಾರಿದರು. ವ್ಯಾಪಾರಸ್ಥರು ಮತ್ತು ಉದ್ಯಮಿಗಳಿಗೆ ಈ ಮಹಾಮೇಳದಲ್ಲಿ ಪಾಲ್ಗೊಳ್ಳುವುದರಿಂದ ಅಗಾಧವಾದ ವಾಣಿಜ್ಯ ಲಾಭಗಳಿವೆ. ಹೊಸ ಮಾರುಕಟ್ಟೆ ಪ್ರವೇಶಿಸಲು ಬಯಸುವ ಸಣ್ಣ ಮತ್ತು ಮಧ್ಯಮ ಪ್ರವಾಸೋದ್ಯಮ ಸಂಸ್ಥೆಗಳಿಗೆ ಅಂತಾರಾಷ್ಟ್ರೀಯ ಖರೀದಿದಾರರನ್ನು ನೇರವಾಗಿ ಭೇಟಿಯಾಗುವ ಸದವಕಾಶ ಇಲ್ಲಿ ಸಿಗುತ್ತದೆ. ಮಧ್ಯವರ್ತಿಗಳಿಲ್ಲದೆ ನೇರ ಒಪ್ಪಂದಗಳನ್ನು ಮಾಡಿಕೊಳ್ಳಲು ಸಾಧ್ಯವಾಗುವುದರಿಂದ ಉದ್ಯಮದ ವೆಚ್ಚ ತಗ್ಗುವುದರ ಜತೆಗೆ ಜಾಗತಿಕ ಸಹಭಾಗಿತ್ವಗಳು ಶೀಘ್ರವಾಗಿ ಕಾರ್ಯರೂಪಕ್ಕೆ ಬರುತ್ತವೆ.

ಅಂತಾರಾಷ್ಟ್ರೀಯ ಜಾಲ ನಿರ್ಮಾಣ ಈ ಸಮಾವೇಶದ ಅತ್ಯಂತ ಶಕ್ತಿಶಾಲಿ ಅಂಶವಾಗಿದೆ. ಪ್ರಪಂಚದ ವಿವಿಧ ಭಾಗಗಳ ಪ್ರವಾಸ ನಿರ್ವಾಹಕರು, ಹೋಟೆಲ್ ಮಾಲೀಕರು, ಪ್ರವಾಸೋದ್ಯಮ ಮಂಡಳಿಗಳ ಅಧಿಕಾರಿಗಳು ಮತ್ತು ಸಾರಿಗೆ ಮುಖ್ಯಸ್ಥರು ಇಲ್ಲಿ ಮುಖಾಮುಖಿಯಾಗುತ್ತಾರೆ. ಈ ಮುಖಾಮುಖಿ ಸಂವಹನಗಳು ದೀರ್ಘಾವಧಿಯ ವಿಶ್ವಾಸಾರ್ಹ ವ್ಯಾಪಾರ ಸಂಬಂಧಗಳಿಗೆ ಬುನಾದಿ ಹಾಕುತ್ತವೆ. ಸಂಕೀರ್ಣ ಮಾರುಕಟ್ಟೆಗಳಲ್ಲಿ ವ್ಯವಹಾರ ವಿಸ್ತರಿಸಲು ಈ ಜಾಲಬಂಧ ಅತ್ಯಂತ ಸಹಕಾರಿಯಾಗುತ್ತದೆ.

ಮಾರುಕಟ್ಟೆಯ ಇತ್ತೀಚಿನ ಪ್ರವೃತ್ತಿಗಳನ್ನು (Market Trends) ಮೊದಲೇ ಅರಿತುಕೊಳ್ಳುವುದು ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಅತ್ಯಗತ್ಯ. ಗ್ರಾಹಕರು ಈಗ ಯಾವ ರೀತಿಯ ಪ್ರವಾಸಗಳನ್ನು ಬಯಸುತ್ತಿದ್ದಾರೆ, ಯುವ ಪೀಳಿಗೆಯ ಪ್ರವಾಸದ ಆದ್ಯತೆಗಳೇನು, ಪರಿಸರಸ್ನೇಹಿ ಪ್ರವಾಸಗಳ ಬೇಡಿಕೆ ಹೇಗಿದೆ ಎಂಬಂಥ ಮಹತ್ವದ ದತ್ತಾಂಶಗಳು ಮತ್ತು ಅಧ್ಯಯನ ವರದಿಗಳು ಇಲ್ಲಿ ಬಿಡುಗಡೆಯಾಗುತ್ತವೆ. ಈ ಮಾಹಿತಿಯು ಭಾಗವಹಿಸುವ ಉದ್ಯಮಿಗಳಿಗೆ ತಮ್ಮ ಮುಂದಿನ ವರ್ಷದ ವಾಣಿಜ್ಯ ಯೋಜನೆಗಳನ್ನು ಸಮರ್ಥವಾಗಿ ರೂಪಿಸಿಕೊಳ್ಳಲು ನೆರವಾಗುತ್ತದೆ.

ಸ್ಪರ್ಧಾತ್ಮಕ ವಿಶ್ಲೇಷಣೆಗೂ (Competitive Analysis) ಈ ಮೇಳ ಅತ್ಯುತ್ತಮ ಅವಕಾಶ ನೀಡುತ್ತದೆ. ಜಾಗತಿಕ ಪ್ರತಿಸ್ಪರ್ಧಿಗಳು ಗ್ರಾಹಕರಿಗೆ ಯಾವ ಹೊಸ ಕೊಡುಗೆಗಳನ್ನು ನೀಡುತ್ತಿದ್ದಾರೆ, ಯಾವ ದರ ತಂತ್ರಗಳನ್ನು ಬಳಸುತ್ತಿದ್ದಾರೆ ಮತ್ತು ಯಾವ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿದ್ದಾರೆ ಎಂಬುದನ್ನು ನೇರವಾಗಿ ವೀಕ್ಷಿಸಬಹುದು. ಇದರಿಂದಾಗಿ ಉದ್ಯಮಿಗಳು ತಮ್ಮ ಸೇವೆಗಳಲ್ಲಿರುವ ನ್ಯೂನತೆಗಳನ್ನು ತಿದ್ದಿಕೊಂಡು, ಮಾರುಕಟ್ಟೆಯಲ್ಲಿ ಮುಂಚೂಣಿಯಲ್ಲಿರಲು ಅಗತ್ಯವಿರುವ ಬದಲಾವಣೆಗಳನ್ನು ತಕ್ಷಣವೇ ತರಲು ಸಾಧ್ಯವಾಗುತ್ತದೆ. ಪ್ರವಾಸೋದ್ಯಮ ಕ್ಷೇತ್ರದ ಪ್ರಮುಖ ತೀರ್ಮಾನ ಕೈಗೊಳ್ಳುವ ಉನ್ನತಾಧಿಕಾರಿಗಳು, ಪ್ರವಾಸೋದ್ಯಮ ಸಚಿವರು, ಮತ್ತು ನೀತಿ ನಿರೂಪಕರೊಂದಿಗೆ ವಿಚಾರ ವಿನಿಮಯ ನಡೆಸಲು ಇದು ಅದ್ಭುತ ವೇದಿಕೆ. ವಿವಿಧ ದೇಶಗಳ ಸರಕಾರಿ ಪ್ರವಾಸೋದ್ಯಮ ನಿಗಮಗಳು ನೀಡುವ ವೀಸಾ ಸಡಿಲಿಕೆಗಳು, ಹೊಸ ವಿಮಾನ ಮಾರ್ಗಗಳ ಘೋಷಣೆಗಳು ಮತ್ತು ತೆರಿಗೆ ವಿನಾಯಿತಿಗಳಂಥ ನೀತಿ ನಿರ್ಧಾರಗಳು ಇಲ್ಲಿ ನೇರವಾಗಿ ಚರ್ಚೆಗೆ ಬರುತ್ತವೆ. ಇಂಥ ಉನ್ನತ ಮಟ್ಟದ ಸಂವಾದಗಳು ಭವಿಷ್ಯದ ಪ್ರವಾಸ ನೀತಿಗಳನ್ನು ವ್ಯಾಪಾರ ಸ್ನೇಹಿಯಾಗಿಸಲು ಪೂರಕವಾಗಿವೆ.

ಜ್ಞಾನ ವಿಸ್ತರಣೆಯ ದೃಷ್ಟಿಯಿಂದಲೂ ಈ ಸಮಾವೇಶ ಅತ್ಯುನ್ನತ ಮಟ್ಟದ್ದಾಗಿತ್ತು. 70 ಕ್ಕೂ ಹೆಚ್ಚು ತಜ್ಞರ ವಿಚಾರ ಸಂಕಿರಣಗಳು, ಕಾರ್ಯಾಗಾರಗಳು ಮತ್ತು ಚರ್ಚಾಗೋಷ್ಠಿಗಳು ಮೇಳದ ಅಂಗವಾಗಿ ನಡೆಯಿತು. ಜಾಗತಿಕ ಆತಿಥ್ಯ ರಂಗದ ಪರಿಣತರು ತಮ್ಮ ಅನುಭವಗಳನ್ನು ಹಂಚಿಕೊಳ್ಳುವುದರಿಂದ, ಉದ್ಯಮಕ್ಕೆ ಹೊಸದಾಗಿ ಪ್ರವೇಶಿಸುವ ನವೋದ್ಯಮಿಗಳಿಗೆ ಇದು ಉನ್ನತ ದರ್ಜೆಯ ಕಲಿಕಾ ತರಗತಿಯಂತೆಯೂ ಕೆಲಸ ಮಾಡುತ್ತದೆ. ಪ್ರವಾಸೋದ್ಯಮದ ಆಡಳಿತ, ಡಿಜಿಟಲ್ ಮಾರ್ಕೆಟಿಂಗ್ ಮತ್ತು ಬಿಕ್ಕಟ್ಟು ನಿರ್ವಹಣೆ ಕುರಿತು ಇಲ್ಲಿ ಸಿಗುವ ಜ್ಞಾನ ಅಪ್ರತಿಮ. ದುಬೈನಲ್ಲಿ ನಡೆಯುವ ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್ ಕೇವಲ ಪ್ರವಾಸಿ ಮೇಳವಲ್ಲ. ಅದು ಜಾಗತಿಕ ಪ್ರವಾಸೋದ್ಯಮ ನಕ್ಷೆಯನ್ನು ರೂಪಿಸುವ ಶಕ್ತಿ ಕೇಂದ್ರ. 165 ಕ್ಕೂ ಹೆಚ್ಚು ರಾಷ್ಟ್ರಗಳ ಸಂಗಮ, ತಂತ್ರಜ್ಞಾನದ ಸದ್ಬಳಕೆ, ಸುಸ್ಥಿರತೆಯ ದೃಷ್ಟಿಕೋನ ಮತ್ತು ಅಪಾರ ಆರ್ಥಿಕ ಅವಕಾಶಗಳ ಸಂಗಮವಾಗಿರುವ ಈ ಮೇಳವು ಪ್ರವಾಸೋದ್ಯಮ ವಲಯಕ್ಕೆ ಹೊಸ ಚೈತನ್ಯವನ್ನು ತುಂಬಿದೆ. ವಿಶ್ವದ ಆರ್ಥಿಕತೆಯನ್ನು ಜೋಡಿಸುವ ಮತ್ತು ಜಾಗತಿಕ ಬಾಂಧವ್ಯವನ್ನು ಗಟ್ಟಿಗೊಳಿಸುವಲ್ಲಿ ಈ ಮಹಾಮೇಳದ ಕೊಡುಗೆ ಅನನ್ಯವಾಗಿದೆ.

ಅರೇಬಿಯನ್ ಟ್ರಾವೆಲ್ ಮಾರ್ಕೆಟ್ (ATM) ಜಾಗತಿಕ ಪ್ರವಾಸೋದ್ಯಮದ ಆಕರ್ಷಕ ವ್ಯಾಪಾರ ಮಾದರಿಯನ್ನು ಪ್ರದರ್ಶಿಸುವ ಶಕ್ತಿಶಾಲಿ ವೇದಿಕೆಯಾಗಿದ್ದು, ಅಪಾರ ನೈಸರ್ಗಿಕ ಹಾಗೂ ಸಾಂಸ್ಕೃತಿಕ ವೈವಿಧ್ಯತೆ ಹೊಂದಿರುವ ಕರ್ನಾಟಕ ಪ್ರವಾಸೋದ್ಯಮಕ್ಕೆ ಇದರಿಂದ ಕಲಿಯಲು ಹಲವು ನಿರ್ಣಾಯಕ ಪಾಠಗಳಿವೆ. ಎಟಿಎಂ ಮೇಳದಲ್ಲಿ ಪಾಲ್ಗೊಳ್ಳುವ ಮುಂಚೂಣಿ ದೇಶಗಳು ತಮ್ಮ ಪ್ರವಾಸಿ ತಾಣಗಳನ್ನು ಜಾಗತಿಕ ಮಾರುಕಟ್ಟೆಗೆ ತಕ್ಕಂತೆ ಹೇಗೆ ಪ್ರಸ್ತುತಪಡಿಸುತ್ತವೆ ಎಂಬುದನ್ನು ಕರ್ನಾಟಕ ಕಲಿಯಬೇಕಿದೆ. ಕರ್ನಾಟಕದಲ್ಲಿ ಹಂಪಿ, ಪಟ್ಟದಕಲ್ಲು ಮುಂತಾದ ಐತಿಹಾಸಿಕ ತಾಣಗಳು, ಪಶ್ಚಿಮ ಘಟ್ಟಗಳ ವನ್ಯಜೀವಿ ಸಂಪತ್ತು ಮತ್ತು ಕರಾವಳಿಯ ಆಕರ್ಷಕ ಕಡಲತೀರಗಳಿದ್ದರೂ, ಇವು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಮರ್ಥವಾಗಿ ಪ್ರಚಾರ ಪಡೆಯುತ್ತಿಲ್ಲ. ಜಾಗತಿಕ ಪ್ರವಾಸಿಗರನ್ನು ಸೆಳೆಯುವಂತೆ ‘ಒಂದು ರಾಜ್ಯ, ಹಲವು ಜಗತ್ತು’ (One State, Many Worlds) ಪರಿಕಲ್ಪನೆಯನ್ನು ಆಧುನಿಕ ವಿಡಿಯೋ ಕಂಟೆಂಟ್, ಸೋಶಿಯಲ್ ಮೀಡಿಯಾ ಪ್ರಚಾರ ಮತ್ತು ಆಕರ್ಷಕ ಬ್ರ್ಯಾಂಡಿಂಗ್ ಮೂಲಕ ಜಾಗತಿಕ ವೇದಿಕೆಯಲ್ಲಿ ಬಿಂಬಿಸುವ ಕಲೆ ಎಟಿಎಂನಿಂದ ಕಲಿಯಬೇಕಾದ ಮೊದಲ ಪಾಠ.

ಎಟಿಎಂ ಮೇಳದಲ್ಲಿ ಕೃತಕ ಬುದ್ಧಿಮತ್ತೆ (AI), ವರ್ಚುವಲ್ ರಿಯಾಲಿಟಿ (VR) ಪ್ರವಾಸಗಳು ಮತ್ತು ತಡೆರಹಿತ ಡಿಜಿಟಲ್ ಬುಕಿಂಗ್ ವ್ಯವಸ್ಥೆಗಳಿಗೆ ಹೆಚ್ಚಿನ ಪ್ರಾಶಸ್ತ್ಯ ನೀಡಲಾಗುತ್ತದೆ. ಬೆಂಗಳೂರನ್ನು ಭಾರತದ ಸಿಲಿಕಾನ್ ವ್ಯಾಲಿ ಎಂದು ಕರೆಯುತ್ತಿದ್ದರೂ, ರಾಜ್ಯದ ಪ್ರವಾಸೋದ್ಯಮ ವ್ಯವಸ್ಥೆಯಲ್ಲಿ ತಂತ್ರಜ್ಞಾನದ ಬಳಕೆ ಇನ್ನೂ ಪ್ರಾಥಮಿಕ ಹಂತದಲ್ಲಿದೆ. ಸ್ಮಾರ್ಟ್ ಆಡಿಯೋ ಗೈಡ್‌ಗಳು, ಪ್ರವಾಸಿ ತಾಣಗಳ 3D ಪೂರ್ವವೀಕ್ಷಣೆ, ಎಲ್ಲ ಸ್ಮಾರಕಗಳು ಹಾಗೂ ಅರಣ್ಯ ಸಫಾರಿಗಳಿಗೆ ಏಕೀಕೃತ ಮೊಬೈಲ್ ಅಪ್ಲಿಕೇಶನ್ ಬುಕಿಂಗ್ ಸೌಲಭ್ಯ ಮತ್ತು ಡಿಜಿಟಲ್ ಮಾಹಿತಿ ಕೇಂದ್ರಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಪ್ರವಾಸಿಗರ ಅನುಭವವನ್ನು ವಿಶ್ವದರ್ಜೆಗೆ ಏರಿಸಬಹುದು.

ಅಂತಾರಾಷ್ಟ್ರೀಯ ಪ್ರವಾಸಿಗರಿಗೆ ಕೇವಲ ಪ್ರವಾಸಿ ತಾಣವಷ್ಟೇ ಅಲ್ಲದೆ, ಸುಗಮ ಪ್ರಯಾಣದ ಅನುಭವ ಮುಖ್ಯವಾಗಿರುತ್ತದೆ. ಯುಎಇಯಂಥ ದೇಶಗಳು ಸಂಪರ್ಕ ಜಾಲ, ಸ್ವಚ್ಛತೆ, ಸುರಕ್ಷತೆ ಮತ್ತು ಉನ್ನತ ದರ್ಜೆಯ ಸಾರಿಗೆ ಸೌಲಭ್ಯಗಳ ಮೇಲೆ ಹೇಗೆ ಹೂಡಿಕೆ ಮಾಡುತ್ತವೆ ಎಂಬುದನ್ನು ಕರ್ನಾಟಕ ಗಮನಿಸಬೇಕು. ಜತೆಗೆ, ಎಟಿಎಂ ಪ್ರತಿಪಾದಿಸುವ ಪರಿಸರಸ್ನೇಹಿ (Eco-friendly) ಮತ್ತು ಸುಸ್ಥಿರ ಪ್ರವಾಸೋದ್ಯಮವನ್ನು ಮಲೆನಾಡು ಹಾಗೂ ಕರಾವಳಿ ತೀರಗಳಲ್ಲಿ ಕಟ್ಟುನಿಟ್ಟಾಗಿ ಜಾರಿಗೆ ತರಬೇಕಿದೆ. ಪರಿಸರಕ್ಕೆ ಧಕ್ಕೆಯಾಗದಂತೆ ಪ್ರವಾಸಿ ನಿಯಂತ್ರಣ ಮತ್ತು ತ್ಯಾಜ್ಯ ಮುಕ್ತ ತಾಣಗಳ ನಿರ್ವಹಣೆ ಅತ್ಯಗತ್ಯ.

ಇದನ್ನೂ ಓದಿ: ಐಕಾನಿಕ್‌ ನಟಿಯ ಟ್ರಾವೆಲ್‌ ಕಹಾನಿ

ಕೇವಲ ಪಾರಂಪರಿಕ ಅಥವಾ ವನ್ಯಜೀವಿ ತಾಣಗಳಿಗೆ ಸೀಮಿತವಾಗದೇ, ಮಾರುಕಟ್ಟೆಯ ಇತ್ತೀಚಿನ ಬೇಡಿಕೆಗೆ ತಕ್ಕಂತೆ ಪ್ರವಾಸೋದ್ಯಮವನ್ನು ವಿಭಜಿಸುವ (Niche Tourism) ವಿಧಾನವನ್ನು ಎಟಿಎಂ ಕಲಿಸಿಕೊಡುತ್ತದೆ. ಕರ್ನಾಟಕವು ಕ್ಷೇಮ ಮತ್ತು ಆಯುರ್ವೇದ ಆಧಾರಿತ ‘ವೆಲ್ನೆಸ್ ಟೂರಿಸಂ’, ಕಾಫಿ ತೋಟಗಳ ‘ಕೃಷಿ ಪ್ರವಾಸೋದ್ಯಮ’ (Agri-tourism) ಹಾಗೂ ಬೆಂಗಳೂರು-ಮೈಸೂರು ನಗರಗಳಲ್ಲಿ ದೊಡ್ಡ ಪ್ರಮಾಣದ ಅಂತಾರಾಷ್ಟ್ರೀಯ ಸಮ್ಮೇಳನಗಳನ್ನು ನಡೆಸುವ ‘MICE ಪ್ರವಾಸೋದ್ಯಮ’ವನ್ನು (ಸಭೆಗಳು, ಸಮಾವೇಶಗಳು ಮತ್ತು ಪ್ರದರ್ಶನಗಳು) ಗಂಭೀರವಾಗಿ ಉತ್ತೇಜಿಸಬೇಕು. ಇದು ವರ್ಷಪೂರ್ತಿ ರಾಜ್ಯಕ್ಕೆ ನಿರಂತರ ಆರ್ಥಿಕ ಆದಾಯವನ್ನು ತಂದುಕೊಡುತ್ತದೆ.

ಎಟಿಎಂ ಯಶಸ್ವಿಯಾಗಲು ಸರಕಾರ ಮತ್ತು ಖಾಸಗಿ ಹೂಡಿಕೆದಾರರ ನಡುವಿನ ದೃಢ ಬಾಂಧವ್ಯವೇ ಮೂಲ ಕಾರಣ. ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯು ಕೇವಲ ಆಡಳಿತಾತ್ಮಕವಾಗಿ ಉಳಿಯದೇ, ಜಾಗತಿಕ ಹೋಟೆಲ್ ಜಾಲಗಳು, ವಿಮಾನಯಾನ ಸಂಸ್ಥೆಗಳು ಮತ್ತು ಟೂರ್ ಆಪರೇಟರ್‌ಗಳ ಜತೆ ನೇರ ಪಾಲುದಾರಿಕೆ ಬೆಳೆಸಿಕೊಳ್ಳಬೇಕು. ಖಾಸಗಿ ಹೂಡಿಕೆಗೆ ಉತ್ತೇಜನ ನೀಡಿ, ಪ್ರವಾಸಿ ತಾಣಗಳ ಬಳಿ ಐಷಾರಾಮಿ ರೆಸಾರ್ಟ್‌ಗಳು ಮತ್ತು ಮೂಲಸೌಕರ್ಯ ಕಲ್ಪಿಸಿದರೆ ಮಾತ್ರ ವಿದೇಶಿ ಪ್ರವಾಸಿಗರ ವಾಸ್ತವ್ಯದ ದಿನಗಳು ಹೆಚ್ಚುತ್ತವೆ ಮತ್ತು ಸ್ಥಳೀಯ ಆರ್ಥಿಕತೆಗೆ ಬಲ ಬರುತ್ತದೆ. ಈ ನಿಟ್ಟಿನಲ್ಲಿ ಎಟಿಎಂ ಹೇಳುವ ಪಾಠಗಳನ್ನು ಕರ್ನಾಟಕ ಪ್ರವಾಸೋದ್ಯಮ ಕೇಳಿಸಿಕೊಳ್ಳಬೇಕಿದೆ.