ಭಾರತದ ಪ್ರವಾಸೋದ್ಯಮ ಜಿಡಿಪಿ 7.3% ಏರಿಕೆ

ಭಾರತದ ಪ್ರವಾಸೋದ್ಯಮ ಕ್ಷೇತ್ರವು 2025ರಲ್ಲಿ 7.3% ಬೆಳವಣಿಗೆ ದಾಖಲಿಸಿ ದೇಶದ ಒಟ್ಟಾರೆ ಆರ್ಥಿಕ ಬೆಳವಣಿಗೆಗೆ ಸಮಾನವಾಗಿ ಕೊಡುಗೆ ನೀಡಿದರೂ, ವಿದೇಶಿ ಪ್ರವಾಸಿಗರ ವೆಚ್ಚ ಮತ್ತು ಆಗಮನದಲ್ಲಿ ಕಂಡುಬಂದ ಕುಸಿತವು ಆತಂಕಕ್ಕೆ ಕಾರಣವಾಗಿದೆ ಎಂದು ವಿಶ್ವ ಪ್ರವಾಸ ಮತ್ತು ಪ್ರವಾಸೋದ್ಯಮ ಮಂಡಳಿ (WTTC) ತಿಳಿಸಿದೆ.

WTTC ಅಧ್ಯಕ್ಷೆ ಮತ್ತು ಸಿಇಒ ಗ್ಲೋರಿಯಾ ಗುವೇರಾ ಅವರ ಪ್ರಕಾರ, ಭಾರತದ ಪ್ರವಾಸೋದ್ಯಮವು 2025ರಲ್ಲಿ ದೇಶದ ಜಿಡಿಪಿಗೆ ಸುಮಾರು 263.6 ಬಿಲಿಯನ್ ಅಮೆರಿಕನ್ ಡಾಲರ್ (ರಾಷ್ಟ್ರೀಯ ಜಿಡಿಪಿಯ 6.6%) ಕೊಡುಗೆ ನೀಡಿದ್ದು, 4.62 ಕೋಟಿ ಉದ್ಯೋಗಗಳಿಗೆ ಬೆಂಬಲ ನೀಡಿದೆ. ಈ ಕ್ಷೇತ್ರವು ದೇಶದ ಅತಿದೊಡ್ಡ ಉದ್ಯೋಗ ಸೃಷ್ಟಿಕರ್ತಗಳಲ್ಲಿ ಒಂದಾಗಿದೆ.

ಆದರೆ, ದೇಶೀಯ ಪ್ರವಾಸೋದ್ಯಮದ ಬಲವಾದ ಬೆಳವಣಿಗೆಯ ನಡುವೆಯೂ ಅಂತಾರಾಷ್ಟ್ರೀಯ ಪ್ರವಾಸೋದ್ಯಮ ದುರ್ಬಲವಾಗಿದೆ. 2025ರಲ್ಲಿ ಭಾರತವು ಸುಮಾರು 19 ಲಕ್ಷ ಅಂತಾರಾಷ್ಟ್ರೀಯ ಪ್ರವಾಸಿಗರನ್ನು ಕಳೆದುಕೊಂಡಿದೆ ಎಂದು WTTC ಅಂದಾಜಿಸಿದೆ. ಪ್ರಸ್ತುತ ಭಾರತದಲ್ಲಿ ಒಟ್ಟು ಪ್ರವಾಸಿಗರ ವೆಚ್ಚದ 86% ದೇಶೀಯ ಪ್ರವಾಸಿಗರಿಂದಲೇ ಬರುತ್ತಿರುವುದು ವಿದೇಶಿ ಮಾರುಕಟ್ಟೆಯ ಮೇಲಿನ ಅವಲಂಬನೆ ಕಡಿಮೆಯಿರುವುದನ್ನು ತೋರಿಸುತ್ತದೆ.

ಇದನ್ನೂ ಓದಿ: ಚೆಸ್‌ ಪ್ರವಾಸ: ಚದುರಂಗ ಬಲದಲಿ ಪ್ರವಾಸದ ರಂಗು

ಭಾರತವು ಜಾಗತಿಕ ಪ್ರವಾಸೋದ್ಯಮ ಶಕ್ತಿಯಾಗಿ ಬೆಳೆಯುವ ಎಲ್ಲ ಸಾಮರ್ಥ್ಯಗಳನ್ನು ಹೊಂದಿದ್ದರೂ, ವೀಸಾ ಪ್ರಕ್ರಿಯೆಯ ಸವಾಲುಗಳು, ಸೀಮಿತ ವಿಮಾನ ಸಂಪರ್ಕ, ನೀತಿ ಅಡೆತಡೆಗಳು ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತವನ್ನು ಪರಿಣಾಮಕಾರಿಯಾಗಿ ಪ್ರಚಾರ ಮಾಡದಿರುವುದು ಬೆಳವಣಿಗೆಗೆ ಅಡ್ಡಿಯಾಗುತ್ತಿದೆ ಎಂದು ಗುವೇರಾ ಅಭಿಪ್ರಾಯಪಟ್ಟರು. ಹೆಚ್ಚು ವೆಚ್ಚ ಮಾಡುವ ವಿದೇಶಿ ಪ್ರವಾಸಿಗರನ್ನು ಗುರಿಯಾಗಿಸಿಕೊಂಡು ವಿಶೇಷ ಪ್ರಚಾರ ಅಭಿಯಾನಗಳನ್ನು ರೂಪಿಸಬೇಕೆಂದು ಅವರು ಸಲಹೆ ನೀಡಿದರು.

WTTC ಮುನ್ಸೂಚನೆಯಂತೆ, 2026ರಲ್ಲಿ ಭಾರತದ ಪ್ರವಾಸೋದ್ಯಮ ಆರ್ಥಿಕತೆ 8.5% ಬೆಳವಣಿಗೆ ಸಾಧಿಸುವ ನಿರೀಕ್ಷೆಯಿದ್ದು, ದೇಶದ ಜಿಡಿಪಿಗೆ ಸುಮಾರು 286.1 ಬಿಲಿಯನ್ ಡಾಲರ್ ಕೊಡುಗೆ ನೀಡಲಿದೆ. ಉದ್ಯೋಗಗಳ ಸಂಖ್ಯೆಯೂ 4.81 ಕೋಟಿಗೆ ಏರಿಕೆಯಾಗುವ ಸಾಧ್ಯತೆಯಿದೆ.