AI ಆಧಾರಿತ ಕಾರ್ಪೊರೇಟ್ ಪ್ರವಾಸಕ್ಕೆ ಒತ್ತು

ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಕಾರ್ಪೊರೇಟ್ ಪ್ರವಾಸೋದ್ಯಮ (Business Travel) ಮಾರುಕಟ್ಟೆಯನ್ನು ಗಮನದಲ್ಲಿಟ್ಟುಕೊಂಡು ಜಾಗತಿಕ ಆನ್‌ಲೈನ್ ಪ್ರವಾಸ ವೇದಿಕೆ Booking.com ತನ್ನ 'Booking.com for Business' ಸೇವೆಯನ್ನು ಭಾರತದಲ್ಲಿ ಮತ್ತಷ್ಟು ವಿಸ್ತರಿಸಿದೆ.

ಕೃತಕ ಬುದ್ಧಿಮತ್ತೆ (AI), ಸುಲಭ ಡಿಜಿಟಲ್ ಅನುಭವ ಮತ್ತು ಸಣ್ಣ ಹಾಗೂ ಮಧ್ಯಮ ಉದ್ಯಮಗಳ (SMEs) ಅಗತ್ಯಗಳಿಗೆ ತಕ್ಕ ಸೇವೆಗಳ ಮೂಲಕ ಸಂಸ್ಥೆಯು B2B (Business-to-Business) ಕ್ಷೇತ್ರದಲ್ಲಿ ತನ್ನ ಸ್ಥಾನವನ್ನು ಬಲಪಡಿಸುವ ಗುರಿ ಹೊಂದಿದೆ.

ಭಾರತದ ಕಾರ್ಪೊರೇಟ್ ಪ್ರವಾಸ ಮಾರುಕಟ್ಟೆ ಮುಂದಿನ ಕೆಲವು ವರ್ಷಗಳಲ್ಲಿ ವೇಗವಾಗಿ ಬೆಳೆಯಲಿದ್ದು, ಉದ್ಯೋಗಿಗಳು ವೈಯಕ್ತಿಕ ಪ್ರವಾಸದಲ್ಲಿ ಅನುಭವಿಸುವಂತೆಯೇ ಸರಳ, ವೇಗವಾದ ಮತ್ತು ಪಾರದರ್ಶಕ ಬುಕಿಂಗ್ ವ್ಯವಸ್ಥೆಯನ್ನು ಉದ್ಯಮ ಪ್ರವಾಸದಲ್ಲೂ ನಿರೀಕ್ಷಿಸುತ್ತಿದ್ದರು. ಅದನ್ನು ಗಮನಿಸಿದ Booking.com, AI ಆಧಾರಿತ ತಂತ್ರಜ್ಞಾನ ಮತ್ತು ಸ್ಥಳೀಯ ಅಗತ್ಯಗಳಿಗೆ ಹೊಂದುವ ವೈಶಿಷ್ಟ್ಯಗಳನ್ನು ಸೇರ್ಪಡೆ ಮಾಡಿಕೊಂಡಿದೆ.

ಹೊಸ ವ್ಯವಸ್ಥೆಯಲ್ಲಿ GST-ಅನುಗುಣ ಬಿಲ್‌ಗಳು, ಪ್ರಯಾಣ ವೆಚ್ಚದ ರಿಯಲ್-ಟೈಮ್ ಟ್ರ್ಯಾಕಿಂಗ್, ಉದ್ಯೋಗಿಗಳ ಸುರಕ್ಷತಾ ಸಾಧನಗಳು, ನಗರ ಅಥವಾ ದೇಶವಾರು ವೆಚ್ಚ ಮಿತಿಗಳನ್ನು ನಿಗದಿಪಡಿಸುವ ಸೌಲಭ್ಯ, ಹಾಗೂ ಕಂಪನಿಗಳಿಗೆ ಸುಲಭವಾಗಿ ಕಂಪನಿ ಪ್ರೊಫೈಲ್ ರಚಿಸಿ ತಕ್ಷಣವೇ ಬುಕ್ಕಿಂಗ್ ಆರಂಭಿಸುವ ಅವಕಾಶ ಒದಗಿಸಲಾಗಿದೆ. ವಿಶೇಷವಾಗಿ ಸ್ಟಾರ್ಟ್‌ಅಪ್‌ಗಳು ಮತ್ತು ಸಣ್ಣ ಉದ್ಯಮಗಳಿಗೆ ಯಾವುದೇ ಸಂಕೀರ್ಣ ವ್ಯವಸ್ಥೆ ಇಲ್ಲದೆ ಸೇವೆ ಬಳಸುವ ಅವಕಾಶ ಕಲ್ಪಿಸಲಾಗಿದೆ.

Booking.com ದಕ್ಷಿಣ ಏಷ್ಯಾ ಪ್ರಾದೇಶಿಕ ಮುಖ್ಯಸ್ಥ ಸಂತೋಷ್ ಕುಮಾರ್ ಅವರ ಪ್ರಕಾರ, ಭಾರತದಲ್ಲಿ ಇನ್ನೂ ಅನೇಕ ಸಂಸ್ಥೆಗಳು ಹಳೆಯ ಟ್ರಾವೆಲ್ ಬುಕ್ಕಿಂಗ್ ವ್ಯವಸ್ಥೆಗಳನ್ನೇ ಅವಲಂಬಿಸಿವೆ. ಇದರಿಂದ ಉದ್ಯೋಗಿಗಳು ವಿಮಾನ ಮತ್ತು ಹೊಟೇಲ್‌ಗಳನ್ನು ಪ್ರತ್ಯೇಕವಾಗಿ ಬುಕ್ ಮಾಡಬೇಕಾಗುತ್ತದೆ. ಹೊಸ ವೇದಿಕೆಯ ಮೂಲಕ ಗ್ರಾಹಕರಿಗೆ ದೊರೆಯುವ ಸರಳ ಮತ್ತು ನಿರಂತರ ಡಿಜಿಟಲ್ ಅನುಭವವನ್ನು ಕಾರ್ಪೊರೇಟ್ ಪ್ರಯಾಣಿಕರಿಗೂ ನೀಡುವ ಉದ್ದೇಶ ಹೊಂದಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಇದನ್ನೂ ಓದಿ: ಸೌದಿ : ಟ್ರಾವೆಲ್ ಪ್ಯಾಕೇಜ್‌ನಲ್ಲೇ ವೀಸಾ, ಪ್ರವಾಸಿಗರಿಗೆ 'ಪ್ಯಾಕೇಜ್ ವೀಸಾ' ಸೌಲಭ್ಯ

ಇತ್ತೀಚಿನ ಜಾಗತಿಕ ಭೌಗೋಳಿಕ ಉದ್ವಿಗ್ನತೆಗಳ ನಡುವೆಯೂ ಭಾರತದಲ್ಲಿ ವ್ಯವಹಾರಿಕ ಪ್ರವಾಸದ ಬೇಡಿಕೆ ಕುಸಿದಿಲ್ಲ. ಕೆಲವು ಅಂತಾರಾಷ್ಟ್ರೀಯ ಮಾರ್ಗಗಳಲ್ಲಿ ಬದಲಾವಣೆಗಳಾದರೂ, ದೇಶೀಯ ಹಾಗೂ ಪರ್ಯಾಯ ಮಾರ್ಗಗಳ ಮೂಲಕ ಕಾರ್ಪೊರೇಟ್ ಪ್ರವಾಸ ಮುಂದುವರಿದಿದೆ ಎಂದು Booking.com ತಿಳಿಸಿದೆ. ಇದೇ ಕಾರಣದಿಂದ ಭಾರತವು ಸಂಸ್ಥೆಯ ಪ್ರಮುಖ ಬೆಳವಣಿಗೆ ಮಾರುಕಟ್ಟೆಯಾಗಿ ಹೊರಹೊಮ್ಮಿದೆ.

ಕಾರ್ಪೊರೇಟ್ ಪ್ರವಾಸ ಕ್ಷೇತ್ರದಲ್ಲಿ AI ಬಳಕೆ, ಸ್ವಯಂಚಾಲಿತ ವೆಚ್ಚ ನಿರ್ವಹಣೆ, ವೇಗವಾದ ಬುಕ್ಕಿಂಗ್ ಮತ್ತು ವೈಯಕ್ತಿಕೀಕೃತ ಸೇವೆಗಳ ಬೇಡಿಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ Booking.com ತನ್ನ B2B ಸೇವೆಗಳನ್ನು ಭಾರತದಲ್ಲಿ ಮತ್ತಷ್ಟು ವಿಸ್ತರಿಸುವ ಯೋಜನೆ ರೂಪಿಸಿದೆ. ಇದರಿಂದ ಭಾರತೀಯ ಉದ್ಯಮಗಳಿಗೆ ಹೆಚ್ಚು ಪರಿಣಾಮಕಾರಿ, ಪಾರದರ್ಶಕ ಮತ್ತು ತಂತ್ರಜ್ಞಾನಾಧಾರಿತ ವ್ಯವಹಾರಿಕ ಪ್ರವಾಸ ಅನುಭವ ದೊರೆಯುವ ನಿರೀಕ್ಷೆಯಿದೆ.